ଅନେକ ସମୟରେ ସଡ଼କ ସୁରକ୍ଷା ସଚେତନତା ଅଭିଯାନରେ ସାମିଲ ଲୋକଙ୍କ ହାତରେ ପ୍ଲାକାର୍ଡରେ ଦେଖିବାକୁ ମିଳେ, ଯେଉଁଥିରେ ଲେଖାଥାଏ-‘ସଡ଼କ ସୁରକ୍ଷା ଜୀବନ ରକ୍ଷା’। କିନ୍ତୁ ଦୁର୍ଘଟଣା ଉପରେ ଲୋକଙ୍କୁ ସଚେତନ କରିବା ଲାଗି ଲକ୍ଷ୍ନୌର ଜଣେ ମହିଳା ରାସ୍ତା କଡ଼ରେ ଏକ ପ୍ଲାକାର୍ଡ ଧରି ଠିଆ ହେଉଛନ୍ତି, ଯେଉଁଥିରେ ଲେଖାଅଛି-‘ସାଇକେଲରେ ଲାଇଟ ଲଗାଅ’। ଦୁର୍ଘଟଣା ହ୍ରାସ କରିବା ଲାଗି ୨୨ ବର୍ଷୀୟା ଖୁସି ପାଣ୍ଡେଙ୍କ ଏହି ଅଭିଯାନ ବେଶ୍ ପ୍ରଭାବୀ ହୋଇପାରୁଛି। ଖୁସି ରାସ୍ତା କଡ଼ରେ ଠିଆ ହୋଇ ପ୍ରତିଟି ସାଇକେଲରେ ମାଗଣାରେ ସେଫ୍ଟି ଲାଇଟ୍ ଲଗାଉଛନ୍ତି। ସଡ଼କ ଦୁର୍ଘଟଣାରେ ଖୁସି ତାଙ୍କ ଜେଜେମା’ଙ୍କୁ ହରାଇବା ପରେ ଏହି ଅଭିଯାନ ଆରମ୍ଭ କରିଥିଲେ। ଏବେ ସୁଦ୍ଧା ସେ ୧୫୦୦ ବାଇସାଇକେଲରେ ମାଗଣାରେ ନାଲି ଲାଇଟ ଲଗାଇ ସାରିଲେଣି। ଖୁସିଙ୍କ ଏଭଳି କାର୍ଯ୍ୟ ସମ୍ପର୍କରେ ଆଇଏଏସ୍ ଅଧିକାରୀ ଅଓ୍ବନିଶ ସରନ ସୋସିଆଲ ମିଡିଆରେ ପୋଷ୍ଟ କରିଛନ୍ତି। କେବଳ ଏତିକି ନୁହେଁ ସରନ ମଧ୍ୟ ଏହା ପୂର୍ବରୁ ‘ହେଲ୍ମେଟ ମ୍ୟାନ ଅଫ୍ ଇଣ୍ଡିଆ’ ଭାବେ ଜଣାଶୁଣା ରାଘବେନ୍ଦ୍ର କୁମାରଙ୍କ ଭିଡିଓ ପୋଷ୍ଟ କରିଥିଲେ। ରାଘବେନ୍ଦ୍ର ବିଗତ ୧୦ ବର୍ଷରେ ୫୬,୦୦୦ ହେଲ୍ମେଟ ବାଣ୍ଟି ସାରିଲେଣି।
