ଲକ୍ଷ୍ନୌ, ୨୩।୨: ଉତ୍ତର ପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କ ଶାସନ ପ୍ରଣାଳୀକୁ ନେଇ ବ୍ୟଙ୍ଗାତ୍ମକ ଢଙ୍ଗରେ ଗୀତ ଗାଇବାରୁ ଭୋଜପୁରୀ ଲୋକ ଗାୟିକା ନେହା ସିଂ ରାଥୋଡଙ୍କୁ ୟୁପି ପୋଲିସ ନୋଟିସ ଜାରି କରିଛି। ନୋଟିସ୍ ଜରିଆରେ ନେହାଙ୍କୁ ୭ଟି ପ୍ରଶ୍ନର ଉତ୍ତର ରଖିବା ପାଇଁ କୁହାଯାଇଛି। ତେବେ ଏ ନେଇ ନେହା କହିଛନ୍ତି, ମୁଁ ଜଣେ ଲୋକ ଗାୟିକା। କାହା ଡରରେ ମୁଁ ଗାଇବା ବନ୍ଦ କରିବି ନାହିଁ। ପ୍ରଭାବଶାଳୀ ନେତାଙ୍କ ଆଗରେ ମୁଁ କିଛି ନୁହେଁ। ସରକାରଙ୍କ ଏ ପ୍ରକାର କାର୍ଯ୍ୟ ଗ୍ରହଣୀୟ ନୁହେଁ।
ପ୍ରତ୍ୟେକଙ୍କ ପ୍ରତିବାଦର ସ୍ବରକୁ ଜୋର ଜବରଦସ୍ତ ଦବାଇବାକୁ ଚେଷ୍ଟା କରିବା ଅନୁଚିତ୍। ଏହାର ପ୍ରଭାବ ସେମାନଙ୍କ ଭୋଟ ଉପରେ ପଡ଼ିବ ବୋଲି ନେହା କହିଛନ୍ତି। ଅନ୍ୟପକ୍ଷେ ୟୁପି ପୋଲିସ ନୋଟିସ ଜାରି କରିବା ପୂର୍ବରୁ ନେହାଙ୍କ ସ୍ବାମୀଙ୍କୁ ଫସାଇବାକୁ ଚେଷ୍ଟା କରିଥିବା ସେ ଅଭିଯୋଗ ଆଣିଛନ୍ତି। ନିକଟରେ ନେହା ନିଜ ଗୀତ ‘ୟୁପି ମେ କା ବା’ର ନୂଆ ଭର୍ସନ ଗାଇଥିଲେ। ଏହି ଗୀତରେ ସେ କାନ୍ପୁରରେ ଉଚ୍ଛେଦ ସମୟରେ ପ୍ରାଣ ହରାଇଥିବା ପ୍ରମିଳା ଦୀକ୍ଷିତ (୪୫) ଏବଂ ତାଙ୍କ ଝିଅ ନେହା (୨୦)ଙ୍କ ସମ୍ପର୍କରେ କହିଥିଲେ। ତିନି ଦିନ ମଧ୍ୟରେ ନେହାଙ୍କୁ ପୋଲିସ ପକ୍ଷରୁ ଜାରି ନୋଟିସର ଉତ୍ତର ରଖିବା ଲାଗି କୁହାଯାଇଛି।
