ଦାରିଙ୍ଗବାଡ଼ି,୧୨ା୪(ଅରୁଣ ସାହୁ): ବୋଲେରୋ ଧକ୍କାରେ ବାଇକ୍ଚାଳକଙ୍କ ମୃତ୍ୟୁ ଘଟଣାର ଇତିମଧ୍ୟରେ ପ୍ରାୟ ୨୦ ଘଣ୍ଟା ବିତିଯାଇଥିଲେ ମଧ୍ୟ କୌଣସି ମାମଲା ରୁଜୁ ହୋଇ ନ ଥିବା ଓ ମୃତଦେହ ବ୍ୟବଚ୍ଛେଦ ହୋଇପାରି ନ ଥିବା ବେଳେ ଗାଡ଼ିଚାଳକଙ୍କୁ ମଧ୍ୟ ପୋଲିସ ଗିରଫ କରିପାରି ନ ଥିବା ନେଇ ଦେଖାଯାଇଛି ଉତ୍ତେଜନା। ମୃତଦେହକୁ ପୋଲିସ ଜବତ କରିଥିଲେ ମଧ୍ୟ ଅଭିଯୁକ୍ତଙ୍କୁ ଗିରଫରେ ଟାଳଟୁଳ ନୀତି ଅବଲମ୍ବନ କରୁଥିବା ଅଭିଯୋଗରେ ଦାରିଙ୍ଗବାଡ଼ି ଚାରି ଛକରେ ପୀଡ଼ିତା ପରିବାର ଓ ଅଞ୍ଚଳବାସୀ ଅବରୋଧ କରି ରଖିଛନ୍ତି। ଫଳରେ ଦାରିଙ୍ଗବାଡ଼ିରୁ ବ୍ରହ୍ମପୁର, ଫୁଲବାଣୀ, ଗଜପତି ଆଦି ଅଞ୍ଚଳକୁ ଯାତାୟାତ ବାଧାପ୍ରାପ୍ତ ହୋଇଛି।
ପ୍ରକାଶ ଯେ, ଶନିବାର ଅପରାହ୍ନରେ ଦାରିଙ୍ଗବାଡ଼ିରୁ ଏକ ବୋଲେରୋ ବ୍ରହ୍ମପୁର ଅଭିମୁଖେ ଯାଉଥିବା ବେଳେ ବିପରୀତ ଦିଗରୁ ଉକ୍ତ ଥାନା କୁମ୍ଭାରବାଡ଼ି ଅଞ୍ଚଳରୁ ଏକ ବାଇକ୍ ଯୋଗେ ଉକ୍ତ ଗ୍ରାମର ଯୁବକ ଶାଶ୍ୱତ ନାୟକ ଦାରିଙ୍ଗବାଡ଼ି ଅଭିମୁଖେ ଆସୁଥିବା ସମୟରେ ବୋଲେରୋ ଧକ୍କା ଦେଇଥିଲା। ଫଳରେ ଘଟଣାସ୍ଥଳରେ ହିଁ ଶାଶ୍ୱତଙ୍କ ମୃତ୍ୟୁ ଘଟିଥିଲା ଆମ୍ବୁଲାନ୍ସ ଶାଶ୍ୱତଙ୍କୁ ସ୍ବାସ୍ଥ୍ୟକେନ୍ଦ୍ରକୁ ଆଣିଥିବା ବେଳେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ମୃତ ଘୋଷଣା ପରେ ଅଞ୍ଚଳରେ ଘଟଣାକୁ ନେଇ ଉତ୍ତେଜନା ଦେଖାଯିବା ସହ ବୋଲେରୋକୁ ଜଣେ ନାବାଳକ ଚଳାଉଥିବା ଅଭିଯୋଗ ହୋଇଛି। ତୁରନ୍ତ ନାବାଳକ ଚାଳକଙ୍କୁ ଗିରଫ କରିବାକୁ ପୀଡ଼ିତାଙ୍କ ପରିବାର ଦାବି କରୁଥିବା ବେଳେ ମୃତ ଶାଶ୍ୱତ ଙ୍କ ସ୍ତ୍ରୀ ଚୁମୁକି ଜେନା ବର୍ତ୍ତମାନ ଗର୍ଭବତୀ ରହିଥିବାରୁ କ୍ଷତିପୂରଣ ଦେବାକୁ ଦାବି ହୋଇଛି। ତେବେ ଘଟଣାକୁ ପୋଲିସ ଗୁରୁତର ସହ ନେଇଥିବା କହୁଥିବା ବେଳେ ଉତ୍ତ୍ୟକ୍ତ ଲୋକ ପୋଲିସ କାର୍ଯ୍ୟାନୁଷ୍ଠାନ ଗ୍ରହଣ କରୁ ନ ଥିବା ଅଭିଯୋଗ କରିଛନ୍ତି। ପୋଲିସ ପ୍ରକୃତରେ ଗାଡ଼ି କିଏ ଚଳାଉଥିଲା ତାର ତଦନ୍ତ କରୁଥିବା ଆଇଆଇସି ସଂଗ୍ରାମ କେଶରୀ ଜେନା କହିଛନ୍ତି। ଖବର ଲେଖାହେବା ସୁଦ୍ଧା ଉତ୍ତ୍ୟକ୍ତ ଲୋକେ ଟାୟାର ଜାଳି ଚାରିଛକରେ ପ୍ରତିବାଦ ଜାରି ରଖିଛନ୍ତି। ସେପଟେ କିଛି ଉତ୍ତ୍ୟକ୍ତ ଲୋକଙ୍କ ସହ ଥାନାରେ ସମାଧାନର ବାଟ ବାହାର କରିବାକୁ ଆଲୋଚନା ଜାରି ରଖିଛନ୍ତି। ସକାଳ ୬ରୁ ଆରମ୍ଭ ହୋଇଥିବା ଏହି ଆନ୍ଦୋଳନ ପୂର୍ବାହ୍ନ ୧୧ ଟା ପର୍ଯ୍ୟନ୍ତ ଆନ୍ଦୋଳନ ଜାରି ରହିଛି। ଉତ୍ତ୍ୟକ୍ତ ଲୋକଙ୍କୁ ପୋଲିସ ବୁଝାଇବା ପ୍ରୟାସ ଜାରି ରଖିଛି।
