ନୂଆଦିଲ୍ଲୀ,୯।୪: ଅପେକ୍ଷାର ଅନ୍ତ ଘଟିଛି। ଭାରତୀୟ ବଜାରରେ ରୟାଲ ଏନଫିଲ୍ଡ (Royal Enfield) ନିଜର ପ୍ରଥମ ଇଲେକ୍ଟ୍ରିକ ମୋଟରସାଇକେଲ ’ଫ୍ଲାଇଙ୍ଗ ଫ୍ଲି ସି୬’ (Flying Flea C୬)କୁ ଶେଷରେ ଲଞ୍ଚ କରିଦେଇଛି। ଏହା ସହିତ କମ୍ପାନୀ ଅଫିସିଆଲ ଭାବେ ଇଭି (EV) ସେଗ୍ମେଣ୍ଟରେ ପ୍ରବେଶ କରିଛି। ସହରୀ ଚଳାଚଳ ପାଇଁ ଡିଜାଇନ କରାଯାଇଥିବା ଏହି ବାଇକ ଅତ୍ୟନ୍ତ ହାଲୁକା ଏବଂ ଷ୍ଟାଇଲିସ।
ଏହି ବାଇକ୍ର ପ୍ରାରମ୍ଭିକ ମୂଲ୍ୟ ୨.୭୯ ଲକ୍ଷ ଟଙ୍କା ରଖାଯାଇଛି। ଯଦି ଆପଣ ‘ବ୍ୟାଟେରୀ-ଏଜ-ଏ-ସର୍ଭିସ’ ପ୍ଲାନ ନିଅନ୍ତି, ତେବେ ଏହାକୁ ମାତ୍ର ୧.୯୯ ଲକ୍ଷ ଟଙ୍କାରେ କିଣିପାରିବେ। ଏପ୍ରିଲ ୧୦ ତାରିଖ ମଧ୍ୟାହ୍ନ ୧୨ଟାରୁ ଏହାର ବୁକିଂ ଆରମ୍ଭ ହେବ। ମଇ ୨୦୨୬ରୁ କମ୍ପାନୀ ବାଇକ ଡେଲିଭରୀ ଆରମ୍ଭ କରିବ।
ଏହି ବାଇକ୍ରେ ଆଲୁମିନିୟମ ଫ୍ରେମ ବ୍ୟବହାର କରାଯାଇଛି, ଯାହା ଫଳରେ ଏହାର ଓଜନ ମାତ୍ର ୧୨୪ କିଲୋଗ୍ରାମ ରହିଛି। ଏହା ରୟାଲ ଏନଫିଲ୍ଡର ଏପର୍ଯ୍ୟନ୍ତର ସବୁଠାରୁ ହାଲୁକା ବାଇକ। ଏହାର ଲୁକ ରେଟ୍ରୋ ଏବଂ ମଡର୍ଣ୍ଣର ଏକ ମିଶ୍ରଣ। ଏଥିରେ ଗୋଲାକାର ଏଲଇଡି (LED) ହେଡ୍ଲାଇଟ, ୧୯-ଇଞ୍ଚର ଆଲୟ ହୁଇଲ ଏବଂ ଷ୍ଟର୍ମ ବ୍ଲାକ୍ ଓ ଫ୍ଲି ଗ୍ରୀନ ଭଳି ଆକର୍ଷଣୀୟ ରଙ୍ଗ ମିଳୁଛି।
ବାଇକ୍ରେ ୧୫.୪ କିଲୋୱାଟର ମୋଟର ଅଛି, ଯାହା ୨୦.୬ bhp ପାୱାର୍ ଏବଂ ୬୦ Nm ଟର୍କ ପ୍ରଦାନ କରେ। ଏହା ମାତ୍ର ୩.୭ ସେକେଣ୍ଡରେ ୦ ରୁ ୬୦ କିମି/ଘଣ୍ଟା ବେଗରେ ଗତି କରିପାରିବ। ଏହାର ସର୍ବାଧିକ ବେଗ ୧୧୫ କିମି/ଘଣ୍ଟା। ଥରେ ଫୁଲ ଚାର୍ଜ କଲେ ଏହା ୧୫୪ କିମି ପର୍ଯ୍ୟନ୍ତ ଚାଲିବ। ମାତ୍ର ୬୫ ମିନିଟ୍ରେ ବ୍ୟାଟେରୀ ୨୦% ରୁ ୮୦% ଚାର୍ଜ ହୋଇଯିବ।
ବାଇକ୍ରେ ୩.୫-ଇଞ୍ଚର ଟିଏଫ୍ଟି (TFT) ଟଚ୍ସ୍କ୍ରିନ୍ କନସୋଲ୍ ରହିଛି। ଏଥିରେ ସ୍ମାର୍ଟଫୋନ କନେକ୍ଟିଭିଟି, ନେଭିଗେସନ ଏବଂ ମ୍ୟୁଜିକ କଣ୍ଟ୍ରୋଲ ଭଳି ସୁବିଧା ଅଛି। ସୁରକ୍ଷା ପାଇଁ ଏଥିରେ ଡୁଆଲ-ଚ୍ୟାନେଲ ଏବିଏସ (ABS) ଏବଂ ଟ୍ରାକ୍ସନ କଣ୍ଟ୍ରୋଲ ଦିଆଯାଇଛି। ରାଇଡିଂ ଅନୁଭବକୁ ବଢ଼ାଇବା ପାଇଁ ସିଟି, ରେନ, ହାଇୱେ, ସ୍ପୋର୍ଟ ଏବଂ କଷ୍ଟମ ଭଳି ୫ଟି ମୋଡ୍ ମଧ୍ୟ ଉପଲବ୍ଧ ରହିଛି।
