ଯାଜପୁର ଟାଉନ,୧୨।୪(ପ୍ରଯକ୍ତା ପ୍ରିୟଦର୍ଶିନୀ ମହାନ୍ତି): ଯାଜପୁର ବାହାବଳପୁରରେ ନିର୍ମାଣ ହୋଇଥିବା ପୂର୍ବତନ ବିଧାୟକ ତଥା ବିଜେଡି ନେତା ପ୍ରଣବ ପ୍ରକାଶ ଦାସ(ବବି)ଙ୍କ ଘର ଏବେ ଚର୍ଚ୍ଚାରେ। ଉକ୍ତ ଘରେ କୁଆଡ଼େ ପୁରୀ ଜଗନ୍ନାଥ ମନ୍ଦିର ପରିକ୍ରମା ପ୍ରକଳ୍ପର ଖଣ୍ଡୋଲାଇଟ୍ ପଥର ବ୍ୟବହାର ହୋଇଥିବା ନେଇ ସାମାଜିକ ଗଣମାଧ୍ୟମରେ ପ୍ରଚାର ହେଉଛି। ଏନେଇ ବବିଙ୍କ ବିରୋଧରେ ଗତ ୮ ତାରିଖରେ ପୁରୀ ସିଂହଦ୍ୱାର ଥାନାରେ ଶ୍ରୀଜଗନ୍ନାଥ ସେନାର ଆବାହକ ତଥା ଆଇନଜୀବୀ ପ୍ରିୟଦର୍ଶନ ପଟ୍ଟନାୟକଙ୍କ ପକ୍ଷରୁ ଅଭିଯୋଗ ହୋଇଛି। ଏହି ଅଭିଯୋଗକୁ ବବିଙ୍କ ଦାଦା ତଥା ଯାଜପୁରର ପୂର୍ବତନ ପୌରାଧ୍ୟକ୍ଷ ଯଯାତି କେଶରୀ ଦାସ ଶନିବାର ଖବରଦାତା ସମ୍ମିଳନୀ କରି ଖଣ୍ଡନ କରିଛନ୍ତି। ପୁରୀ ଜଗନ୍ନାଥ ମନ୍ଦିର ପରିକ୍ରମା ପ୍ରକଳ୍ପ ପଥରରେ ବାହାବଳପୁରସ୍ଥିତ ଘର ନିର୍ମାଣ ହୋଇନାହିଁ। ବରଂ ବ୍ୟବହାର ହୋଇଥିବା ପଥର ରାଜସ୍ଥାନ ଯୋଧପୁରର ପ୍ରତିଷ୍ଠିତ ବିଶ୍ୱକର୍ମା ପଥର କମ୍ପାନୀରୁ ଅଣାଯାଇଛି ବୋଲି ଯଯାତି କହିଛନ୍ତି। ଏନେଇ ସେ ୱେବିଲ୍ ଏବଂ ଖରିଦ୍ ବିଲ୍ ମଧ୍ୟ ଦେଖାଇଥିଲେ। କେବଳ ରାଜନୈତିକ ଉଦ୍ଦେଶ୍ୟ ରଖି କେତେଜଣ ବ୍ୟକ୍ତି ବବିଙ୍କୁ ବଦନାମ କରିବାକୁ ଚାହୁଁଛନ୍ତି। ସେମାନଙ୍କ ବିରୋଧରେ ଆଇନ ଅନୁଯାୟୀ କାର୍ଯ୍ୟାନୁଷ୍ଠାନ ନିଆଯିବ ବୋଲି ଯଯାତି ଚେତାବନୀ ଦେଇଥିଲେ।
ସେହିପରି ଶନିବାର ସନ୍ଧ୍ୟାରେ ଯାଜପୁର ସିଭିଲ ସୋସାଇଟି ପକ୍ଷରୁ ଯାଜପୁର ଥାନାରେ ଜଗନ୍ନାଥ ସେନାର ଆବାହକ ପ୍ରିୟଦର୍ଶନ ପଟ୍ଟନାୟକଙ୍କ ନାମରେ ପାଲଟା ଏତଲା ଦିଆଯାଇଛି। ଏହି ଏତଲାରେ ପଟ୍ଟନାୟକ ଜଗନ୍ନାଥ ନାମକୁ ବ୍ୟବହାର କରି ଯାଜପୁରବାସୀଙ୍କ ଧର୍ମୀୟ ଭାବନାକୁ ଆଘାତ କରିଥିବା ଉଲ୍ଲେଖ କରାଯାଇଛି। ତାଙ୍କୁ ତୁରନ୍ତ ଗିରଫ କରିବା ପାଇଁ ସିଭିଲ ସୋସାଇଟି ପକ୍ଷରୁ ଆବାହକ ବରିଷ୍ଠ ଆଇନଜୀବୀ ପ୍ରବୀର କୁମାର ରାୟ ଏତଲାରେ ଦାବି କରିଛନ୍ତି। ଏହି ଅଭିଯୋଗ ପତ୍ର ପ୍ରଦାନ ସମୟରେ ସିଭିଲ୍ ସୋସାଇଟିର ଶତାଧିକ ସଦସ୍ୟ ଉପସ୍ଥିତ ଥିଲେ।
