ଜାତିସଂଘ,୧୮ା୬: ପାକିସ୍ତାନର ଶୀର୍ଷ ଲଶ୍କର-ଇ-ତୋଇବା ନେତା ଅବଦୁଲ ରେହମନ ମକ୍କିଙ୍କୁ ଜାତିସଂଘ ସୁରକ୍ଷା ପରିଷଦ ବିଶ୍ୱ ଆତଙ୍କବାଦୀ ତାଲିକାରେ ସାମିଲ କରିବା ପାଇଁ ଭାରତ ଓ ଆମେରିକା ପକ୍ଷରୁ ଦିଆଯାଇଥିବା ମିଳିତ ପ୍ରସ୍ତାବକୁ ଚାଇନା ବିରୋଧ କରିଛି। ଜାତିସଂଘ ସୁରକ୍ଷା ପରିଷଦର ୧୨୬୭ ଆଇଏସ୍ଆଇଏଲ୍ (ଇସ୍ଲାମିକ ଷ୍ଟେଟ୍ ଅଫ୍ ଇରାକ ଆଣ୍ଡ ସିରିଆ’ ଏବଂ ଅଲ୍ କାଏଦା ସାଙ୍କସନ୍ସ କମିଟିରେ ମକ୍କିଙ୍କୁ ବିଶ୍ୱ ଆତଙ୍କବାଦୀ ଘୋଷଣା କରିବା ଲାଗି ନୂଆଦିଲ୍ଲୀ ଓ ଓ୍ବାଶିଂଟନ ପକ୍ଷରୁ ପ୍ରସ୍ତାବ ରଖାଯାଇଥିଲା। ଶେଷ ମୁହୂର୍ତ୍ତରେ ଚାଇନାର ବିରୋଧ ଯୋଗୁ ତାଙ୍କୁ ଉକ୍ତ ତାଲିକାରେ ସାମିଲ କରାଯାଇପାରି ନାହିଁ। ୭୪ ବର୍ଷୀୟ ମକ୍କିଙ୍କୁ ଆମେରିକା ପୂର୍ବରୁ ଆତଙ୍କବାଦୀ ଘୋଷଣା କରିଛି। ୨୬/୧୧ ଆକ୍ରମଣର ମାଷ୍ଟରମାଇଣ୍ଡ ତଥା ଲଶ୍କର-ଇ-ତୋଇବା ନେତା ହାଫିଜ ସୟିଦଙ୍କର ସେ ଭିଣୋଇ। ପୂର୍ବରୁ କେତେଜଣ ପାକିସ୍ତାନୀ ଆତଙ୍କବାଦୀଙ୍କୁ ଅନ୍ତର୍ଜାତୀୟ ଆତଙ୍କବାଦୀ ତାଲିକାଭୁକ୍ତ କରିବା ଲାଗି ଭାରତ ଓ ଏହାର ସହଯୋଗୀ ରାଷ୍ଟ୍ରଗୁଡ଼ିକର ପ୍ରସ୍ତାବକୁ ବେଜିଂ ବିରୋଧ କରିଥିଲା।
