ମେଟ୍ରୋ ସହରଗୁଡ଼ିକରେ ଜନସଂଖ୍ୟା ବୃଦ୍ଧି ପାଇବାରୁ ହଜାର ହଜାର ଲୋକ ସରକାରୀ ଜମି ଜବରଦଖଲ କରି ରହୁଛନ୍ତି। ଏମାନେ ପ୍ରାୟତଃ ନିମ୍ନମଧ୍ୟବିତ୍ତ କିମ୍ବା ଗରିବ ଶ୍ରେଣୀର, ଯେଉଁମାନଙ୍କ ପାଖରେ ଘର କିଣିବା ଲାଗି ଅର୍ଥର ଅଭାବ ରହିଛି। ଏଣୁ ଏଭଳି ସମସ୍ୟାର ସମାଧାନ ପାଇଁ ଆଗେଇ ଆସିଛନ୍ତି ଚେନ୍ନାଇର ଅରୁଣ ପ୍ରଭୁ। ତାଙ୍କ ବୟସ ୨୩। ସେ ଅଟୋରିକ୍ସା ଉପରେ ଏକ ଘର ନିର୍ମାଣ କରିଛନ୍ତି। ୬ ଫୁଟ ଚଉଡ଼ା, ୬ ଫୁଟ ଲମ୍ବ ଓ ପାଖାପାଖି ୧୦ ଫୁଟ ଉଚ୍ଚତା ବିଶିଷ୍ଟ ଏହି ଘରକୁ ଯେକୌଣସି ଗାଡ଼ି କିମ୍ବା ସ୍ଥାନରେ ମଧ୍ୟ ଫିଟ୍ କରାଯାଇପାରିବ। ଅରୁଣ ପେସାରେ ଜଣେ ଆର୍କିଟେକ୍ଟ ହୋଇଥିବାରୁ କମ୍ ଖର୍ଚ୍ଚରେ ସ୍କ୍ରାପ୍ରେ ଉକ୍ତ ଘର ନିର୍ମାଣ କରିଛନ୍ତି। ଏହି ‘ରିକ୍ସା ଘର’ର ନାଁ ରଖିଛନ୍ତି ‘ସୋଲେ ଜିରେ-୧’। ଉଚ୍ଚାରେ ତିନି ଥାକ ବିଶିଷ୍ଟ ଏହି ଘରକୁ ନିର୍ମାଣ କରିବାକୁ ଖର୍ଚ୍ଚ ହୋଇଛି ୧ ଲକ୍ଷ ଟଙ୍କା। ଏଥିରେ ଜଣେ ଆରାମରେ ରହିପାରିବ। ଉକ୍ତ ଘରେ ଖାଇବା ଘର, ଟଏଲେଟ୍ ଓ ବସିବା ପାଇଁ ଜାଗା ମଧ୍ୟ ରଖାଯାଇଛି। ରୋଷେଇ ପାଇଁ ମଧ୍ୟ ବ୍ୟବସ୍ଥା ଅଛି। ଗୃହହୀନ, ନିର୍ମାଣ ଶ୍ରମିକ, ଭେଣ୍ଡରମାନଙ୍କ ପାଇଁ ଉକ୍ତ ଘର ମହାନଗରରେ ଖୁବ୍ ଉପଯୋଗୀ ହୋଇପାରିବ ବୋଲି କହନ୍ତି ଅରୁଣ। ‘ସୋଲେ ଜିରେ-୧’ ଘରେ ୨୫୦ ଲିଟର ପାଣି ଗଚ୍ଛିତ ରହିବାର ବ୍ୟବସ୍ଥା ଅଛି ଓ ଏହା ସମ୍ପୂର୍ଣ୍ଣ ସୌରଶକ୍ତିରେ ଚାଲିଛି।
