ଭୁବନେଶ୍ୱର, ୩୧।୮(ବ୍ୟୁରୋ): ପ୍ରଦେଶ କଂଗ୍ରେସ କମିଟି(ପିସିସି) ସଭାପତି ନିରଞ୍ଜନ ପଟ୍ଟନାୟକଙ୍କ ବିରୋଧରେ ସିଧାସଳଖ ବିଷୋଦ୍ଗାର କରୁଥିବା ବିଧାୟକ ତାରାପ୍ରସାଦ ବାହିନୀପତି ନିଜ ମତ ପରିବର୍ତ୍ତନ କରିଛନ୍ତି। ନିରଞ୍ଜନଙ୍କୁ ବଡ଼ଭାଇ ବୋଲି ସମ୍ବୋଧନ କରିବା ସହ ପୁରୁଣା ସମସ୍ୟା ଦୂର ହୋଇଥିବା ତାରା କହିଛନ୍ତି। ମାତ୍ର ଦଳୀୟ ସୂତ୍ରରୁ ମିଳିଥିବା ସୂଚନା ମୁତାବକ, ଦଳର ଜାତୀୟ ନେତୃମଣ୍ଡଳୀ କୌଣସି ପ୍ରକାର ଅଭିଯୋଗ ଏବଂ ମତଭେଦ ଶୁଣିବା ଲାଗି ପ୍ରସ୍ତୁତ ନ ଥିବା ସିଧାସଳଖ ଜଣାଇ ଦେଇଛନ୍ତି। ଦଳରେ ଅସନ୍ତୁଷ୍ଟ ଥିଲେ ବାହାରିଯିବାକୁ ପ୍ରଭାରୀ ଏ. ଚେଲ୍ଲାକୁମାର ସିଧାସଳଖ ଜଣାଇଦେଇଛନ୍ତି।
ସୋମବାର ୩ ଦିନିଆ ଓଡ଼ିଶା ଗସ୍ତରେ ଆସିବା ଅବସରରେ ଚେଲ୍ଲାକୁମାର ଗଣମାଧ୍ୟମ ପ୍ରଶ୍ନର ଉତ୍ତରରେ କହିଛନ୍ତି, ଯେଉଁମାନେ ଚାହିଁବେ ଦଳ ଛାଡ଼ିପାରିବେ। ଯେଉଁମାନେ ଦଳ ଛାଡ଼ିବାକୁ ଚାହଁୁଛନ୍ତି ସେମାନେ ପଳାନ୍ତୁ। ଏଥିଲାଗି କିଛି ଚିନ୍ତା ନାହିଁ। କଂଗ୍ରେସ ଚିନ୍ତାଧାରାକୁ ଭଲ ପାଉଥିବା ଏବଂ ନେତୃତ୍ୱକୁ ବିଶ୍ୱାସ କରୁଥିବା ଲୋକମାନେ ଦଳରେ ରହିବେ। ବହୁ ନେତା ଦଳ ଛାଡ଼ିଛନ୍ତି, ତା’ପରେ ବି କଂଗ୍ରେସ ଶକ୍ତିଶାଳୀ ହୋଇଛି। ଅନ୍ୟପଟେ ତାରାଙ୍କ ଉପରେ କାର୍ଯ୍ୟାନୁଷ୍ଠାନ ନେଇ ଚେଲ୍ଲାକୁମାର ମନା କରିଦେଇଛନ୍ତି। ଅନ୍ୟପକ୍ଷରେ ତାରା କହିଛନ୍ତି, ରାଗରେ ନିରଞ୍ଜନଙ୍କ ବିରୋଧରେ ଏଣୁତେଣୁ କହିଦେଇଛନ୍ତି। ନିରଞ୍ଜନ ତାଙ୍କ ବଡ ଭାଇ। ରାଗ ସବୁବେଳେ ରୁହେ ନାହିଁ। ରାଜନୀତିଆ ଲୋକ ସବୁବେଳେ ରାଗିଲେ ଲୋକମାନେ ଗ୍ରହଣ କରିବେ ନାହିଁ। ନିରଞ୍ଜନଙ୍କ ନେତୃତ୍ୱରେ ଦଳ ଆଗକୁ ବଢ଼ିବ। ଚେଲ୍ଲାକୁମାରଙ୍କ ସହ ରବିବାର ଟେଲିଫୋନ୍ ଯୋଗେ ବହୁ ସମୟ ଧରି କଥା ହୋଇଛି। ନିରଞ୍ଜନବାବୁଙ୍କ ସହ ସୋମବାର ସକାଳୁ କଥା ହୋଇଛି। ନିରଞ୍ଜନଙ୍କ ସହ ଥିବା ସମସ୍ୟାର ସମାଧାନ ଘଟିଛି। ଦଳ ଛାଡ଼ିବା ପ୍ରଶ୍ନ ଉଠୁନାହିଁ। କୌଣସି ପରିସ୍ଥିତିରେ ଦଳ ବଦଳାଇବି ନାହିଁ। କଂଗ୍ରେସ ଏବେ ବ୍ୟାକ୍ଫୁଟ୍ରେ ରହିଛି। କୋରାପୁଟ ଜିଲାରେ ଦଳକୁ ଦୃଢ଼ କରିବା ଆମ ସମସ୍ତଙ୍କ ଦାୟିତ୍ୱ। ଯେଉଁମାନେ ପରିସ୍ଥିତିରେ ପଡି ଭାଜପା କିମ୍ବା ବିଜେଡି ଚାଲିଯାଇଛନ୍ତି ସେମାନଙ୍କୁ ଫେରାଇ ଆଣିବା ଦାୟିତ୍ୱ ଆମର। ସମସ୍ତଙ୍କୁ ନେଇ ଆଗକୁ ବଢ଼ିହେବ। ସେହିପରି ପିସିସି କାର୍ଯ୍ୟକାରୀ ସଭାପତି ପ୍ରଦୀପ ମାଝି ଏବଂ ସପ୍ତଗିରି ଉଲାକାଙ୍କ ସହ ଆଲୋଚନା କରିବେ ବୋଲି ତାରା କହିଛନ୍ତି।
