ଭୋପାଳ,୧୦।୯: ମଧ୍ୟପ୍ରଦେଶରେ କମଳନାଥ ସରକାର ଝାବୁଆ ବିଧାନସଭା ଉପନିର୍ବାଚନ ପୂର୍ବରୁ ଭୋଟରଙ୍କୁ ଆକର୍ଷିତ କରିବା ଲାଗି ଏସ୍ଟି କାର୍ଡ ଖେଳିଛନ୍ତି। ରାଜ୍ୟର ଜନଜାତି ବହୁଳ ୬ଟି ଜିଲା ପାଇଁ ରାଜ୍ୟ ସରକାର ମୁଖ୍ୟମନ୍ତ୍ରୀ ସହାୟତା ଯୋଜନା ଘୋଷଣା କରିଛନ୍ତି। ଏହି କାର୍ଯ୍ୟକ୍ରମ ୮୯ ବ୍ଲକ୍ରେ ଆରମ୍ଭ ହେବ। ସରକାରଙ୍କ ଏହି ଯୋଜନା ଅନ୍ତର୍ଗତ ଜନଜାତି ପରିବାରରେ ଶିଶୁ ଜନ୍ମ ହେଲେ ୫୦ କିଗ୍ରା ଖାଦ୍ୟାନ୍ନ ଯୋଗାଇ ଦିଆଯିବ। ସେହିପରି ପରିବାର ସଦସ୍ୟଙ୍କ ମୃତ୍ୟୁରେ ଶହେ କିଗ୍ରା ଖାଦ୍ୟାନ୍ନ ମିଳିବ ବୋଲି ଜନଜାତି ବିକାଶ ମନ୍ତ୍ରୀ ଓମ୍କାର ସିଂ କରକମ୍ ସୂଚନା ଦେଇଛନ୍ତି। ସୂଚନାଯୋଗ୍ୟ, ଝାବୁଆ ଜିଲାରେ ଜନଜାତିଙ୍କ ସଂଖ୍ୟା ଅଧିକ ରହିଛି। ସରକାର ଏଭଳି ଘୋଷଣା ଦ୍ୱାରା ଝାବୁଆ ବିଧାନସଭା ଆସନ ହାତେଇବା ପାଇଁ ପ୍ରୟାସ କରୁଥିବା ରାଜନୈତିକ ସମୀକ୍ଷକ ମତପୋଷଣ କରିଛନ୍ତି।
