ନୂଆଦିଲ୍ଲୀ,୧୨ା୩: ଆପଣମାନେ ଅନେକ ଦୂରଗାମୀ ବିମାନ ଯାତ୍ରା ବିଷୟରେ ଶୁଣିଥିବେ, କିନ୍ତୁ ଆଜି ଆମେ ଆପଣଙ୍କୁ ଏମିତି ଏକ ପକ୍ଷୀ ବିଷୟରେ କହିବୁ ଯାହା କୌଣସି ସୁପରମ୍ୟାନ୍ଠାରୁ କମ୍ ନୁହେଁ। ମାତ୍ର ୪ ମାସର ଏକ କୁନି ପକ୍ଷୀ ‘B6’, ଯିଏ ବିନା ଅଟକି ସମୁଦ୍ର ଉପରେ ୧୩,୦୦୦ କିଲୋମିଟରରୁ ଅଧିକ ପଥ ଅତିକ୍ରମ କରି ବୈଜ୍ଞାନିକମାନଙ୍କୁ ଚକିତ କରିଦେଇଛି।
ଏହି ବିରଳ ପକ୍ଷୀଟିର ନାମ ହେଉଛି ‘ବାର୍-ଟେଲଡ୍ ଗଡୱିଟ୍’। ୨୦୨୨ ମସିହାରେ ଆମେରିକା ଭୂତତ୍ତ୍ୱ ସର୍ବେକ୍ଷଣ ସଂସ୍ଥା ଏକ ସାଟେଲାଇଟ୍ ଟ୍ୟାଗ୍ ସାହାଯ୍ୟରେ ଜାଣିବାକୁ ପାଇଥିଲା ଯେ, ଏହି ପକ୍ଷୀଟି ଆଲାସ୍କାରୁ ବାହାରି କ୍ରମାଗତ ୧୧ ଦିନ ଉଡ଼ି ତାସମାନିଆରେ ପହଞ୍ଚିଥିଲା। ଏହି ଦୀର୍ଘ ଯାତ୍ରା ପାଇଁ ପକ୍ଷୀଟି ନିଜ ଶରୀରରେ କିଛି ଆଶ୍ଚର୍ଯ୍ୟଜନକ ପରିବର୍ତ୍ତନ କରିଥାଏ।
ଉଡ଼ାଣ ପୂର୍ବରୁ ଏହି ପକ୍ଷୀ ନିଜ ପାକସ୍ଥଳୀ ଓ ଅନ୍ତ୍ର ଭଳି ହଜମ ପ୍ରକ୍ରିୟାର ଅଙ୍ଗଗୁଡ଼ିକୁ ଛୋଟ କରିଦିଏ, ଯାହାଫଳରେ ଏହାର ଓଜନ କମିଯାଏ ଏବଂ ଶକ୍ତି ସଞ୍ଚୟ ହୁଏ। ଯାତ୍ରା ଆରମ୍ଭର କିଛି ସପ୍ତାହ ପୂର୍ବରୁ ଏହା ପ୍ରଚୁର ଖାଦ୍ୟ ଖାଇ ନିଜ ଶରୀରରେ ଚର୍ବି ଜମା କରେ, ଯାହା ଉଡ଼ାଣ ସମୟରେ ଇନ୍ଧନ ଭଳି କାମ କରେ। ପ୍ରାୟ ୨୦,୦୦୦ ଫୁଟ୍ ଉଚ୍ଚତାରେ ଉଡ଼ିବା ଦ୍ୱାରା ଥଣ୍ଡା ପବନ ଏହାର ଶରୀରକୁ ଗରମ ହେବାରୁ ରକ୍ଷା କରିଥାଏ।
ପ୍ରଶାନ୍ତ ମହାସାଗର ଉପରେ ହଜାର ହଜାର କିଲୋମିଟର ପଥ ଅତିକ୍ରମ କରିବା ପାଇଁ ଏହି ପକ୍ଷୀମାନେ ସୂର୍ଯ୍ୟ, ତାରା ଏବଂ ପୃଥିବୀର ଚୁମ୍ବକୀୟ କ୍ଷେତ୍ରକୁ ବ୍ୟବହାର କରନ୍ତି। ଏମାନଙ୍କ ମଧ୍ୟରେ ଏକ ଜୈବିକ କମ୍ପାସ୍ ରହିଥାଏ, ଯାହା ସେମାନଙ୍କୁ କେବେ ବି ବାଟ ହୁଡ଼ିବାକୁ ଦିଏନାହିଁ।
ଖାଲି ଗଡୱିଟ୍ ନୁହେଁ, ଅମୁର ଫାଲକନ୍ ଭଳି ପକ୍ଷୀ ମଧ୍ୟ ଭାରତ ଦେଇ ପ୍ରତିବର୍ଷ ହଜାର ହଜାର କିଲୋମିଟର ଯାତ୍ରା କରନ୍ତି। ପ୍ରକୃତିର ଏହି ଅଦ୍ଭୁତ କ୍ଷମତା ଆଜି ବି ମଣିଷ ପାଇଁ ଏକ ବଡ଼ ରହସ୍ୟ ହୋଇ ରହିଛି।
