ନୂଆଦିଲ୍ଲୀ,୨୩ା୮: ବିମାନ ଉଡ଼ାଣ ପୂର୍ବରୁ ହଠାତ୍ ଦିଲ୍ଲୀରୁ ଅମୃତସର ଯାଉଥିବା ଏୟାର ଇଣ୍ଡିଆ ବିମାନକୁ ପାଇଲଟ୍ ଅଟକାଇ ଦେଇଥିଲେ। ଏୟାର ଇଣ୍ଡିଆ ବୋଇଂ ୭୮୭ ବିମାନକୁ ଉଡ଼ାଣର କିଛି ସେକେଣ୍ଡ ପୂର୍ବରୁ କାହିଁକି ଅଟକାଇବାକୁ ପଡ଼ିଲା ତାହା ଏୟାରଲାଇନ୍ସ ଏପର୍ଯ୍ୟନ୍ତ ନିଶ୍ଚିତ କରିନାହିଁ।
ଏହି ଏୟାର ଇଣ୍ଡିଆ ବିମାନଟି ରନ୍ଓ୍ବେରେ ଉଡ଼ାଣ କରିବାକୁ ଯାଉଥିଲା ଏବଂ ହଠାତ୍ ପାଇଲଟ ଫେରାଇ ନେବାକୁ ନିଷ୍ପତ୍ତି ନେଇଥିଲେ, ଯାହା ପରେ ଯାତ୍ରୀମାନଙ୍କ ମଧ୍ୟରେ ଆତଙ୍କ ଖେଳିଯାଇଥିଲା। ଯାତ୍ରୀମାନେ କହିଲେ, ‘ଆଜି ଆମର ଜୀବନ ରକ୍ଷା ହୋଇଛି।’
ଗତ କିଛିଦିନ ଧରି ଏୟାର ଇଣ୍ଡିଆ ବିମାନରେ ସମସ୍ୟା ଦେଖାଯାଉଛି। ଶୁକ୍ରବାର ମୁମ୍ବାଇରୁ ଯୋଧପୁର ଯାଉଥିବା ଏୟାର ଇଣ୍ଡିଆ ବିମାନ AI 645 ଉଡ଼ାଣ ପୂର୍ବରୁ ବନ୍ଦ କରିବାକୁ ପଡ଼ିଥିଲା। ଏୟାର ଇଣ୍ଡିଆର ଜଣେ ମୁଖପାତ୍ର କହିଛନ୍ତି ଯେ, ଯାତ୍ରୀମାନଙ୍କ ସୁରକ୍ଷା ଆମର ସର୍ବୋଚ୍ଚ ପ୍ରାଥମିକତା।
ସେହିପରି ଗୁରୁବାର ଥିରୁଭାନନ୍ତପୁରମ୍ ଅନ୍ତର୍ଜାତୀୟ ବିମାନବନ୍ଦରରେ ମୁମ୍ବାଇରୁ ଥିରୁଭାନନ୍ତପୁରମ୍ ଯାଉଥିବା ଏକ ଘରୋଇ ଏୟାର ଇଣ୍ଡିଆ ବିମାନକୁ ବୋମା ଧମକ ମିଳିଥିଲା ଏବଂ ଆତଙ୍କ ଖେଳିଯାଇଥିଲା। ଘଟଣା ପରେ ବିମାନବନ୍ଦରରେ ତୁରନ୍ତ ଜରୁରୀକାଳିନ ପରିସ୍ଥିତି ଘୋଷଣା କରାଯାଇଥିଲା। ଧମକ ପରେ ବିମାନଟି ସକାଳ ପ୍ରାୟ ୮ଟାରେ ଥିରୁଭାନନ୍ତପୁରମ୍ ବିମାନବନ୍ଦରରେ ଅବତରଣ କରିଥିଲା, ତା’ପରେ ବିମାନଟିକୁ ତୁରନ୍ତ ଆଇସୋଲେଶନ େଓ’୍ବରେ ନିଆଯାଇଥିଲା। ଏହା ପରେ ଯାତ୍ରୀମାନଙ୍କୁ ସୁରକ୍ଷିତ ଭାବରେ ବାହାର କରାଯାଇଥିଲା। ବୋମା ଧମକ ଯୋଗୁ ବିମାନ ଭିତରେ ବସିଥିବା ଲୋକଙ୍କ ମଧ୍ୟରେ ଭୟର ବାତାବରଣ ସୃଷ୍ଟି ହୋଇଥିଲା।
ଅଗଷ୍ଟ ୧୭ରେ କୋଚିରୁ ନୂଆଦିଲ୍ଲୀ ଯାଉଥିବା ଏୟାର ଇଣ୍ଡିଆ ବିମାନ AI504ରେ ଉଡ଼ାଣ ସମୟରେ ଏକ ଯାନ୍ତ୍ରିକ ତ୍ରୁଟି ଦେଖାଦେଇଥିଲା, ଯାହା ପରେ ଉଡ଼ାଣ ବିଳମ୍ବ ହୋଇଥିଲା। କକ୍ପିଟ୍ କ୍ରୁ ମାନକ କାର୍ଯ୍ୟ ପ୍ରକ୍ରିୟା ଫଲୋ କରି ବିମାନକୁ ପୁଣି ଉଡ଼ାଣ କରିଥିଲେ।
