କୋଲକାତା,୧।୫: ପଶ୍ଚିମବଙ୍ଗ ବିଧାନସଭା ନିର୍ବାଚନର ଫଳାଫଳ ଆସିବା ପୂର୍ବରୁ ରାଜ୍ୟରେ ଭାଜପା ଏବଂ ଟିଏମ୍ସି ମଧ୍ୟରେ ରାଜନୈତିକ ଲଢ଼େଇ ତୀବ୍ର ହେବାରେ ଲାଗିଛି। ମେ ୪ ତାରିଖରେ ଭୋଟ ଗଣତି ହେବାକୁ ଥିବାବେଳେ, ତା’ ପୂର୍ବରୁ ଭାରତୀୟ ନିର୍ବାଚନ କମିଶନ (ECI) ୧୫ଟି ପୋଲିଂ ଷ୍ଟେଶନରେ ପୁନଃ ମତଦାନ ପାଇଁ ନିର୍ଦ୍ଦେଶ ଦେଇଛନ୍ତି।
ନିର୍ବାଚନ କମିଶନଙ୍କ ସୂଚନା ଅନୁଯାୟୀ, ଆସନ୍ତାକାଲି ଅର୍ଥାତ ମେ ୨ ତାରିଖରେ ବେଙ୍ଗଲର ୧୫ଟି ବୁଥରେ ରିପୋଲିଂ(ପୁନଃ ମତଦାନ) ଅନୁଷ୍ଠିତ ହେବ। ଏଥିମଧ୍ୟରେ ମଗରାହାଟ ପଶ୍ଚିମର ୧୧ଟି ବୁଥ ଏବଂ ଡାଇମଣ୍ଡ ହାର୍ବରର ୪ ବୁଥ ରହିଛି। ଏହି ସମସ୍ତ କେନ୍ଦ୍ରରେ ପୂର୍ବରୁ ହୋଇଥିବା ମତଦାନକୁ ରଦ୍ଦ କରାଯାଇଛି। ସକାଳ ୭ଟାରୁ ସନ୍ଧ୍ୟା ୬ଟା ପର୍ଯ୍ୟନ୍ତ ଭୋଟ ଗ୍ରହଣ କରାଯିବ। ଏଥିପାଇଁ ପ୍ରଶାସନ ପକ୍ଷରୁ ସମସ୍ତ ପ୍ରସ୍ତୁତି ଶେଷ ହୋଇଛି।
ମୁଖ୍ୟମନ୍ତ୍ରୀ ମମତା ବାନାର୍ଜୀ ଗୁରୁବାର ବିଳମ୍ବିତ ରାତିରେ ନିଜ ନିର୍ବାଚନ ମଣ୍ଡଳୀ ଭବାନୀପୁରର ଗଣତି କେନ୍ଦ୍ର (ସଖାୱତ ମେମୋରିଆଲ ସ୍କୁଲ) ପରିଦର୍ଶନ କରିଥିଲେ। ସେଠାରେ ପ୍ରାୟ ୪ ଘଣ୍ଟା ସମୟ ବିତାଇଥିଲେ। ଉତ୍ତର କୋଲକାତାର ଖୁଦିରାମ ଅନୁଶୀଳନ କେନ୍ଦ୍ରର ଏକ ଭିଡିଓ ଭାଇରାଲ ହେବା ପରେ ଏହି ବିବାଦ ଆହୁରି ବଢ଼ିଛି।
କୋଲକାତା ପୋଲିସ ସହରର ୭ଟି ଗୁରୁତ୍ୱପୂର୍ଣ୍ଣ ସ୍ଥାନରେ, ଯେଉଁଠାରେ ଷ୍ଟ୍ରଙ୍ଗ ରୁମ ରହିଛି, ସେଠାରେ ଭାରତୀୟ ନ୍ୟାୟ ସଂହିତା (BNSS ୨୦୨୩) ର ଧାରା ୧୬୩ ଲାଗୁ କରାଯାଇଛି। କୌଣସି ଅନଧିକୃତ ବ୍ୟକ୍ତିଙ୍କ ପ୍ରବେଶ ଉପରେ କଟକଣା ଲଗାଯାଇଛି। ଷ୍ଟ୍ରଙ୍ଗ ରୁମ ଗୁଡ଼ିକ ୨୪ ଘଣ୍ଟିଆ CCTV ନଜରରେ ରହିଛି। କୌଣସି ପ୍ରକାର ଅପ୍ରୀତିକର ପରିସ୍ଥିତିକୁ ରୋକିବା ପାଇଁ ବ୍ୟାପକ ପୋଲିସ ମୁତୟନ କରାଯାଇଛି।
ଗଣତି କେନ୍ଦ୍ରରେ କୌଣସି ପ୍ରକାରର ଅନିୟମିତତା ପାଇଁ ସୁଯୋଗ ନାହିଁ। ସମସ୍ତ ଅଭିଯୋଗ ଭିତ୍ତିହୀନ ଏବଂ ସୁରକ୍ଷା ବ୍ୟବସ୍ଥା ସମ୍ପୂର୍ଣ୍ଣ ସୁଦୃଢ଼ ଅଛି ବୋଲି ମୁଖ୍ୟ ନିର୍ବାଚନ ଅଧିକାରୀ ମନୋଜ ଅଗ୍ରୱାଲ କହିଛନ୍ତି। ତେବେ ରାଜ୍ୟରେ ଏବେ ଫଳାଫଳକୁ ନେଇ ଦ୍ୱନ୍ଦ୍ୱ ଏବଂ ଉତ୍ତେଜନା ଲାଗି ରହିଥିବାବେଳେ ସମସ୍ତଙ୍କ ନଜର ମେ ୪ ତାରିଖ ଉପରେ ରହିଛି।
