ଟୋକିଓ, ୫।୭: ଜାପାନର ପ୍ରଖ୍ୟାତ ମାଙ୍ଗା କଳାକାର ରିୟୋ ତାତସୁକିଙ୍କ ଦ୍ୱାରା କରାଯାଇଥିବା ଏକ ଭବିଷ୍ୟବାଣୀ ଏବେ ଆତଙ୍କ ସୃଷ୍ଟି କରିଛି। ତାଙ୍କର ୨୦୨୧ ମାଙ୍ଗା “ଦ ଫ୍ୟୁଚର ଆଇ ସ’”ରେ ସେ ଜୁଲାଇ ୫, ୨୦୨୫ରେ ଜାପାନରେ ଏକ ବିନାଶକାରୀ ପ୍ରାକୃତିକ ବିପର୍ଯ୍ୟୟ ଘଟିବ ବୋଲି ଭବିଷ୍ୟବାଣୀ କରିଥିଲେ। ଏହି ଭବିଷ୍ୟବାଣୀ ଅନୁଯାୟୀ, ଜାପାନ ଓ ଫିଲିପାଇନ୍ସ ମଧ୍ୟରେ ସମୁଦ୍ର ତଳେ ଏକ ଫାଟ ସୃଷ୍ଟି ହେବ, ଯାହା ୨୦୧୧ ସୁନାମୀ ଅପେକ୍ଷା ତିନି ଗୁଣ ବଡ଼ ଜୁଆର ସୃଷ୍ଟି କରିବ। ଏହି ଭବିଷ୍ୟବାଣୀକୁ “ଜାପାନର ବାବା ଭେଙ୍ଗା” ଭବିଷ୍ୟବାଣୀ କରିଥିଲେ।
ଜୁଲାଇ ୩ରେ ଜାପାନର ଟୋକାରା ଦ୍ୱୀପପୁଞ୍ଜରେ ୫.୫ ମାତ୍ରାର ଏକ ଭୂକମ୍ପ ହେବା ପରେ ଏହି ଆତଙ୍କ ଆହୁରି ବଢିଛି। ଏହି ଭୂକମ୍ପର କେନ୍ଦ୍ରସ୍ଥଳ ଟୋକିଓଠାରୁ ପ୍ରାୟ ୧୨୦୦ କିଲୋମିଟର ଦୂର କାଗୋଶିମା ପ୍ରିଫେକ୍ଚରର ଟୋକାରା ଦ୍ୱୀପ ନିକଟରେ ଥିଲା। ଜାପାନ ମେଟେଓରୋଲୋଜିକାଲ ଏଜେନ୍ସି (JMA) ଅନୁଯାୟୀ, ଏହି ଭୂକମ୍ପ ଅକୁସେକି ଦ୍ୱୀପରେ ୬-ଲୋୟର ତୀବ୍ରତା ସୃଷ୍ଟି କରିଥିଲା, କିନ୍ତୁ ସୁନାମୀ ଚେତାବନୀ ଜାରି ହୋଇନଥିଲା। ଗତ ଜୁନ ୨୧ ତାରିଖରୁ ଏହି ଅଞ୍ଚଳରେ ୯୦୦ରୁ ଅଧିକ କମ୍ପନ ରେକର୍ଡ ହୋଇଛି, ଯାହା ସ୍ଥାନୀୟ ଲୋକଙ୍କ ମଧ୍ୟରେ ଭୟ ବାଇଛି।
ଏହି ଭବିଷ୍ୟବାଣୀ ଏବେ ସୋସିଆଲ ମିଡିଆରେ ଭାଇରାଲ ହେଉଛି, ଫଳରେ ହଂକଂ, ତାଇୱାନ, ଚୀନ ଓ ଦକ୍ଷିଣ କୋରିଆରୁ ଅନେକ ପର୍ଯ୍ୟଟକ ଜାପାନ ଯାତ୍ରା ବାତିଲ କରୁଛନ୍ତି। ନୋମୁରା ରିସର୍ଚ୍ଚ ଇନଷ୍ଟିଚ୍ୟୁଟ ଅନୁଯାୟୀ, ଏହା ଜାପାନର ପର୍ଯ୍ୟଟନ ଶିଳ୍ପକୁ ପ୍ରାୟ ୫୬୦ ବିଲିୟନ ଇୟେନ (୩.୯ ବିଲିୟନ ଡଲାର) କ୍ଷତି ଘଟାଇପାରେ।
ତେବେ, ଜାପାନ ମେଟେଓରୋଲୋଜିକାଲ ଏଜେନ୍ସି ଏହି ଭବିଷ୍ୟବାଣୀକୁ ଏକ ଗୁଜବ ବୋଲି କହି ଖଣ୍ଡନ କରିଛି। ଏଜେନ୍ସିର ଜଣେ ଅଧିକାରୀ କହିଛନ୍ତି, “ବର୍ତ୍ତମାନର ବିଜ୍ଞାନ ଓ ପ୍ରଯୁକ୍ତି ସହାୟତାରେ ଭୂକମ୍ପର ସଠିକ ସମୟ ଓ ସ୍ଥାନ ଭବିଷ୍ୟବାଣୀ କରିବା ସମ୍ଭବ ନୁହେ।” ରିୟୋ ତାତସୁକି ନିଜେ ମଧ୍ୟ ଲୋକଙ୍କୁ ଶାନ୍ତ ରହି ବିଜ୍ଞାନୀଙ୍କ ମତ ଉପରେ ର୍ନିଭର କରିବାକୁ ଅନୁରୋଧ କରିଛନ୍ତି।
ଜାପାନ ସରକାର ଓ ବିଜ୍ଞାନୀମାନେ ଜନସାଧାରଣଙ୍କୁ ଆତଙ୍କିତ ନହେବା ପାଇଁ ଓ ପ୍ରାକୃତିକ ବିପର୍ଯ୍ୟୟ ପାଇଁ ସର୍ବଦା ପ୍ରସ୍ତୁତ ରହିବାକୁ ପରାମର୍ଶ ଦେଇଛନ୍ତି। ନାଙ୍କାଇ ଟ୍ରଫରେ ଆଗାମୀ ୩୦ ବର୍ଷ ମଧ୍ୟରେ ୭ କିମ୍ବା ତା’ଠାରୁ ଅଧିକ ମାତ୍ରାର ଭୂକମ୍ପ ହେବାର ସମ୍ଭାବନା ୮୨% ରହିଛି ବୋଲି ଏକ ସରକାରୀ ରିପୋର୍ଟରେ ଉଲ୍ଲେଖ ରହିଛି।
