ପୋର୍ଟ ଭେଲ୍ହୋ,୨୯।୮: କିଛି ଦିନ ଧରି ବ୍ରାଜିଲ-ଫ୍ରାନ୍ସ ଚା’ କପ୍ରେ ଉଠିଥିବା ଝଡ଼ ଏବେ ଥମିଛି। ବ୍ରାଜିଲ ରାଷ୍ଟ୍ରପତି ବୋଲ୍ସୋନାରୋଙ୍କ ଜଣେ ସମର୍ଥକ ଫ୍ରାନ୍ସ ରାଷ୍ଟ୍ରପତି ଇମାନ୍ବେଲ ମାକ୍ରଁଙ୍କ ସ୍ତ୍ରୀ ବ୍ରିଜେଟ୍ଙ୍କୁ ନେଇ ଉପହାସ କରିବା ଭଳି ମନ୍ତବ୍ୟ ଦେଇଥିଲେ। ବ୍ୟକ୍ତି ଜଣକ ଫେସ୍ବୁକ୍ରେ ବ୍ରିଜେଟ୍ ଓ ବୋଲ୍ସୋନାରୋଙ୍କ ସ୍ତ୍ରୀ ମିଶେଲଙ୍କ ଫଟୋ ଅପଲୋଡ୍ କରି ଆପତ୍ତିଜନକ କମେଣ୍ଟ୍ ଦେଇଥିଲେ। ତେବେ ଏହାକୁ ନେଇ ବୋଲ୍ସୋନାରୋ ମଧ୍ୟ ସମର୍ଥନ କଲାଭଳି ମନ୍ତବ୍ୟ ଲେଖିଥିଲେ। ଫଳରେ ମାକ୍ରଁଙ୍କୁ ଏହା ପସନ୍ଦ ହୋଇ ନ ଥିଲା । ମାତ୍ର ଏବେ ଫେସ୍ବୁକ୍ରେ ଏଭଳି ମନ୍ତବ୍ୟ ଦିଆଯାଇଥିବା ନେଇ ବ୍ରାଜିଲ୍ର ବହୁ ଜନସାଧାରଣ ଦୁଃଖ ପ୍ରକାଶ କରିବା ସହିତ କ୍ଷମା ମାଗିଛନ୍ତି। ଫଳରେ ଏବେ ଦୁଇ ଦେଶରେ ଲାଗି ରହିଥିବା ଅଯଥା କଳହରେ ପୂର୍ଣ୍ଣଛେଦ ପଡ଼ିବ ବୋଲି ଆଶା କରାଯାଉଛି। ସୂଚନାଯୋଗ୍ୟ, ଫେସ୍ବୁକ୍ର ଏହି ଘଟଣାପରେ ଆମାଜନ ଜଙ୍ଗଲରେ ଲାଗିଥିବା ନିଆଁ ଲିଭାଇବା ପାଇଁ ଫ୍ରାନ୍ସ ରାଷ୍ଟ୍ରପତି ଇମାନ୍ବେଲ ମାକ୍ରଁ ବ୍ରାଜିଲକୁ ୨୦ ନିୟୁତ ଡଲାର ସହାୟତା ଦେବା ଲାଗି ଜି-୭ ସମ୍ମିଳନୀରେ ଘୋଷଣା କରଥିଲେ। କିନ୍ତୁ ଏହାକୁ ବ୍ରାଜିଲ ରାଷ୍ଟ୍ରପତି ଜୈର୍ ବୋଲ୍ସୋନାରୋ ଗ୍ରହଣ କରିବାକୁ ମନା କରିଦେଇଥିଲେ। ମାକ୍ରଁ ତାଙ୍କ ବିରୋଧରେ ଦେଇଥିବା ଅପମାନଜନକ ମନ୍ତବ୍ୟ ପ୍ରତ୍ୟାହାର କଲେ ଏହି ଅର୍ଥ ଗ୍ରହଣ ନେଇ ବିଚାର କରିବେ ବୋଲି ବୋଲ୍ସୋନାରୋ କହିଥିଲେ।
