ଦାରିଙ୍ଗବାଡି,୧୭।୪(ଅରୁଣ ସାହୁ):ଏକଦା ମାଓବାଦୀ ପ୍ରବଣ ଅଞ୍ଚଳ ଭାବେ ଜଣାଶୁଣା ଥିଲା ଭ୍ରମରବାଡି। ଏବେ ଆଉ ସେ ପରିସ୍ଥିତି ନାହିଁ, ସେପଟେ କେନ୍ଦ୍ର ଗୃହ ମନ୍ତ୍ରୀଙ୍କ ନିର୍ଦ୍ଦେଶକ୍ରମେ ରାଜ୍ୟରେ ମାଓବାଦୀ ମୁକ୍ତ ପାଇଁ ଜୋରଦାର ଅପରେଶନ କରାଯାଇ ଦାରିଙ୍ଗବାଡି ଅଞ୍ଚଳରେ ଚଳପ୍ରଚଳ କରୁଥିବା ଟପ ମାଓବାଦୀ ନେତା ଶୁକ୍ରୁ ଓ ତାଙ୍କ ସାଥିମାନେ ଆତ୍ମସମର୍ପଣ କରିସାରିଛନ୍ତି। ଏବେ ଆଉ ମାଓବାଦୀଙ୍କ ଚଳପ୍ରଚଳ କିମ୍ବା ଦୌରାତ୍ମ୍ୟ ନାହିଁ। ଏବେ ଜିଲା ପ୍ରଶାସନ ବିକାଶ ପାଇଁ ପ୍ରୟାସ ଆରମ୍ଭ କରିଛି ଦୁର୍ଗମ ଅଞ୍ଚଳରେ ଜିଲା ପ୍ରଶାସନ ପହଞ୍ଚି ସେହି ଅଞ୍ଚଳର ବିକାଶ ଧାରାକୁ ତ୍ୱରାନ୍ବିତ କରିବାରେ ପଦକ୍ଷେପ ନେଇଛି।
ପ୍ରକାଶ ଯେ, କନ୍ଧମାଳ ଜିଲାପାଳ ବେଦଭୂଷଣ ଦିନିକିଆ ଦାରିଙ୍ଗବାଡି ଗସ୍ତରେ ଆସି ସେ ଉକ୍ତ ବ୍ଲକ ଅଞ୍ଚଳର ଏକଦା ମାଓବାଦୀଙ୍କ ପ୍ରଭାବ ରହିଥିବା ଭ୍ରମରବାଡି, ତାଜୁଙ୍ଗିଆ, ବାଡାବାଙ୍ଗା ଆଦି ପଞ୍ଚାୟତର ଘାଟି ତଥା ଜଙ୍ଗଲ ଅଞ୍ଚଳକୁ ଯାଇ ଉକ୍ତ ଅଞ୍ଚଳର ଚାଲିଥିବା ବିଭିନ୍ନ ଉନ୍ନୟନ ପ୍ରକଳ୍ପଗୁଡିକ ବୁଲି ଦେଖିବା ସହ ଅଞ୍ଚଳର ବିକାଶ ସହ ଅଞ୍ଚଳବାସୀ କିଭଳି ସ୍ବରୋଜଗାରକ୍ଷମ ହୋଇପାରିବେ ଏବଂ ସ୍ବାବଲମ୍ବୀ ହୋଇପାରିବେ ସେ ନେଇ ପଦକ୍ଷେପ ନେବା ଆରମ୍ଭ କରିଛନ୍ତି।
ପୂର୍ବରୁ ଏହି ସବୁ ଅଞ୍ଚଳର ଦୁର୍ଗମ ଗାଁକୁ ଜିଲା ପ୍ରଶାସନ ପହଞ୍ଚି ନ ଥିବା ସ୍ଥାନୀୟ ଲୋକ କହିଛନ୍ତି। ପର୍ଯ୍ୟଟକଙ୍କ ପାଇଁ ଏବେ ନୂଆ ଠିକଣା କୁହାଯାଉଥିବା ଭ୍ରମରବାଡ଼ିର ରିଣ୍ଡାବାଲି ଜଳପ୍ରପାତକୁ ଘାଟି କଟାଯାଇ ରାସ୍ତା ନିର୍ମାଣ କାର୍ଯ୍ୟ ଚାଲିଛି। ତାକୁ ଜିଲାପାଳ ପରିଦର୍ଶନ କରିବା ସହ ତାର ଉନ୍ନତିକରଣ କାର୍ଯ୍ୟ ପାଇଁ ବିଡ଼ିଓ ପ୍ରୀତିରଞ୍ଜନ ରଥ ଜିଲାପାଳଙ୍କୁ ନିବେଦନ କରିଥିଲେ। ଏଥିରେ ଜିଲାପାଳ ସହମତି ପ୍ରକାଶ କରି ତାର ଅଟକଳ ପଠାଇବାକୁ ନିର୍ଦ୍ଦେଶ ଦେଇଛନ୍ତି। ଏବେ ବିକଶିତ ଗାଁ ବିକଶିତ ଓଡିଶା ଯୋଜନାରେ ଅର୍ଥ ଖର୍ଚ୍ଚ କରାଯାଇ ଘାଟି ରାସ୍ତା ନିର୍ମାଣ କରାଯାଉଥିବା ବିଡ଼ିଓ କହିଛନ୍ତି।
ସେହିପରି ବହୁମୁଖୀ ଗ୍ରାମ୍ୟ ଜଳଯୋଗାଣ ଯୋଜନା ରେ କରାଯାଇଥିବା ବିଭିନ୍ନ ପ୍ରକଳ୍ପକୁ ଜିଲାପାଳ ଦେଖିବା ସହ ନୂତନ ଅଙ୍ଗନାୱାଡି କେନ୍ଦ୍ର ନିର୍ମାଣ କାର୍ଯ୍ୟକୁ ବୁଲି ଦେଖିଥିଲେ ଏବେ ୧୯ଟି ଅଙ୍ଗନାୱାଡି ଗୃହରୁ ୧୨ଟି ସମ୍ପୂର୍ଣ୍ଣ କାର୍ଯ୍ୟ ହୋଇଥିବା ବେଳେ ଅନ୍ୟ ୭ଟି ଶେଷ ପର୍ଯ୍ୟାୟ କାର୍ଯ୍ୟ ଚାଲିଛି ସେହି ମଧ୍ୟରୁ ବାଡାବାଙ୍ଗା ରେ ଅଙ୍ଗନାୱାଡି ଗୃହକୁ ଜିଲାପାଳ ବୁଲି ଦେଖିବା ସହ ବିଭିନ୍ନ ପ୍ରକଳ୍ପ ବୁଲି ଦେଖିଥିଲେ ପରେ ବ୍ଲକ କାର୍ଯ୍ୟାଳୟରେ ପହଞ୍ଚି ସମସ୍ତ ଉନ୍ନୟନ କାର୍ଯ୍ୟର ସମୀକ୍ଷା କରିଥିଲେ। ଜିଲାପାଳଙ୍କ ସହ ବିଡ଼ିଓ ପ୍ରୀତିରଞ୍ଜନ ରଥ, ସହକାରୀ ନିର୍ବାହୀ ଯନ୍ତ୍ରୀ ସଞ୍ଜୟ ରଥ, ପରିମଳ ଓ ଜଳଯୋଗାଣ ବିଭାଗର ସହକାରୀ ଯନ୍ତ୍ରୀ କ୍ଷୀରୋଦ ରାଉତ, ବ୍ଲକ କନିଷ୍ଠ ଯନ୍ତ୍ରୀ ମନୋଜ ପୃଷ୍ଟି, ସୁଶାନ୍ତ ପ୍ରଧାନ, ପ୍ରମୁଖ ଉପସ୍ଥିତ ଥିଲେ।
Dharitri – Odisha’s No.1 Odia Daily
