ଭୁବନେଶ୍ୱର,୧୮।୮(ବ୍ୟୁରୋ): ସରକାରୀ ଅଧିକାରୀ ଜନସାଧାରଣଙ୍କ ବିଶ୍ୱାସର ମାର୍ଫତଦାର। ତେଣୁ ଅଧିକାରୀଟିଏ ସେବା ମନୋଭାବ ରଖି ସହୃଦୟତାର ସହ କାର୍ଯ୍ୟ କରିବା ଉଚିତ ବୋଲି ବିଦାୟୀ ମୁଖ୍ୟ ଶାସନ ସଚିବ ଆଦିତ୍ୟ ପ୍ରସାଦ ପାଢୀ କହିଛନ୍ତି। ଲୋକସେବା ଭବନରେ ସାଧାରଣ ପ୍ରଶାସନ ଓ ସାଧାରଣ ଅଭିଯୋଗ ବିଭାଗ ଦ୍ୱାରା ଶନିବାର ଆୟୋଜିତ ବିଦାୟକାଳୀନ ସମ୍ବର୍ଦ୍ଧନା ସଭାରେ ପାଢ଼ୀ ଏହି କଥା କହିଛନ୍ତି।
ଏହି ସଭାରେ ଅର୍ଥ ବିଭାଗ ପ୍ରମୁଖ ସଚିବ ଅଶୋକ କୁମାର ମୀନା ବିଦାୟୀ ପାଢୀଙ୍କ ପ୍ରଶଂସା କରିଥିଲେ। ମୁଖ୍ୟ ଶାସନ ସଚିବ ଆଦିତ୍ୟ ପ୍ରସାଦ ପାଢୀ ନିଷ୍ଠାପର ସେବା, ନ୍ୟାୟ, ନିରପେକ୍ଷତା ଏବଂ ନମ୍ରତାର ଏକ ମାଇଲଖୁଣ୍ଟ ବୋଲି ମୀନା କହିଥିଲେ। ମୁଖ୍ୟ ଶାସନ ସଚିବଙ୍କ ଓଏସ୍ଡି ଦିଲୀପ ରାଉତରାଏ କହିଥିଲେ ଯେ, ସମସ୍ୟାକୁ ବୁଝି ସ୍ଥିତପ୍ରଜ୍ଞ ଭାବେ ନିଷ୍ପତ୍ତି ନେବାରେ ବିଦାୟୀ ମୁଖ୍ୟ ଶାସନ ସଚିବ ସିଦ୍ଧହସ୍ତ। ଅନ୍ୟ ଅଧିକାରୀଙ୍କୁ ପ୍ରେରଣା ଦେଇ କାର୍ଯ୍ୟ କରାଇବାରେ ପାଢୀ ପ୍ରମୁଖ ଭୂମିକା ନେଇଥିବା ଦିଲୀପ କହିଥିଲେ। ଗଣମାଧ୍ୟମ ପ୍ରତିନିଧିଙ୍କୁ ଆଦିତ୍ୟ ପ୍ରସାଦ କହିଥିଲେ ଯେ, ସରକାରୀ ଯୋଜନାର ସଫଳ ରୂପାୟନ ମୁଖ୍ୟ ଶାସନ ସଚିବଙ୍କ ଦାୟିତ୍ୱ। ମୁଖ୍ୟମନ୍ତ୍ରୀଙ୍କ ବଳିଷ୍ଠ ନେତୃତ୍ୱରେ ରାଜ୍ୟର ବିକାଶ ହୋଇଛି, ଆଗକୁ ଏହି ଧାରା ଅବ୍ୟାହତ ରହିବ। ଗ୍ରାମୀଣ ଆବାସ ନିର୍ମାଣରେ ରାଜ୍ୟ ଜାତୀୟସ୍ତରରେ ପ୍ରଶଂସିତ ହୋଇଛି। ବିପର୍ଯ୍ୟୟ ପରିଚାଳନା କ୍ଷେତ୍ରରେ ମଧ୍ୟ ଓଡ଼ିଶା ଅଗ୍ରଣୀ ଭୂମିକା ନେଇଛି। ସରକାରୀ ଦାୟିତ୍ୱ ସମୟରେ ଭାରତୀୟ ତୈଳ ନିଗମ ସହ ଓଡ଼ିଶା ସରକାରଙ୍କ ରାଜସ୍ବ ମୀମାଂସା ତାଙ୍କ ପାଇଁ ସ୍ମରଣୀୟ ଘଟଣା ବୋଲି ପାଢୀ କହିଥିଲେ। ସେହିପରି ଆଗାମୀ ୫ ବର୍ଷ ପାଇଁ ତାଙ୍କୁ ରାଜ୍ୟ ନିର୍ବାଚନ କମିଶନର ଭାବେ ନିଯୁକ୍ତି ଦିଆଯାଇଛି, ଏହା ଏକ ସାମ୍ବିଧାନିକ ପଦବୀ ହୋଇଥିବାରୁ କୌଣସି ମତାମତ ଦେବାକୁ ପାଢୀ ମନାକରିଥିଲେ।
