ନୂଆଦିଲ୍ଲୀ,୧୮ା୫: ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲଙ୍କ ସହଯୋଗୀ ବିଭବ କୁମାରଙ୍କ ବିରୋଧରେ ଆମ୍ ଆଦ୍ମୀ ପାର୍ଟି (ଆପ୍)ର ରାଜ୍ୟ ସଭା ସଦସ୍ୟା ସ୍ବାତୀ ମାଲିଓ୍ବାଲ ଆଣିଥିବା ସଙ୍ଗିନ ଅଭିଯୋଗ ନିର୍ବାଚନ ବେଳେ ରାଜନୈତିକ ଝଡ଼ ସୃଷ୍ଟି କରିଛି। ଦିଲ୍ଲୀ ପୋଲିସ ଏବଂ ଫରେନ୍ସିକ୍ ଟିମ୍ ଶୁକ୍ରବାର ସିଲିଲ୍ ଲେନ୍ସ୍ଥିତ ମୁଖ୍ୟମନ୍ତ୍ରୀଙ୍କ ସରକାରୀ ବାସଭବନରେ ପହଞ୍ଚତ୍ ତନାଘନା ଚଳାଇଛି। ଅପରାଧର ସିନ୍ ରିକ୍ରିଏଟ୍ କରିବା ପାଇଁ ସ୍ବାତୀଙ୍କୁ ମଧ୍ୟ ସେଠାକୁ ନିଆଯାଇଥିଲା। ଅନ୍ୟପକ୍ଷେ ବିଭବ ସ୍ବାତୀଙ୍କ ବିରୋଧରେ ପାଲଟା ଆକ୍ରମଣ ଅଭିଯୋଗ ଆଣିଛନ୍ତି।
ମହିଳା ଆୟୋଗର ପୂର୍ବତନ ଅଧ୍ୟକ୍ଷା ସ୍ବାତୀ ମାଲିଓ୍ବାଲ ତିସ୍ ହଜାରି କୋର୍ଟରେ ପହଞ୍ଚତ୍ ନିଜ ବୟାନ ରେକର୍ଡ କରାଇଛନ୍ତି। ତାଙ୍କ ବୟାନ ଆଧାରରେ ବିଭବଙ୍କ ବିରୋଧରେ ମାମଲା ରୁଜୁ ହୋଇଛି। ଜାତୀୟ ମହିଳା କମିଶନ (ଏନ୍ସିଡବ୍ଲ୍ୟୁ) ବିଭବଙ୍କୁ ନୋଟିସ କରିଥିବାବେଳେ ସେ ହାଜର ହୋଇ ନ ଥିଲେ। ତେଣୁ ଏନ୍ସିଡବ୍ଲ୍ୟୁ ଅଭିଯୁକ୍ତ ତାଙ୍କୁ ଦ୍ୱିତୀୟ ଥର ନୋଟିସ କରିଛନ୍ତି। ଦିଲ୍ଲୀ ପୋଲିସ ଅପରାହ୍ନରେ ବିଭବଙ୍କ ଘରକୁ ଯାଇଥିଲା। କିନ୍ତୁ ସେଠାରେ ତାଙ୍କୁ ପାଇ ନ ଥିଲା। ତାଙ୍କୁ ଧରିବା ପାଇଁ ୮ଟି ଟିମ୍ ଗଠନ କରାଯାଇଛି। ବିଭବ ପଞ୍ଜାବକୁ ଫେରାର ହୋଇଯାଇଥିବା ସନ୍ଦେହ କରାଯାଉଛି। କାଳେ ସେ ମହାରାଷ୍ଟ୍ରକୁ ଚାଲିଯାଇଥିବେ ମନେକରି ସେଠାକାର ପୋଲିସ ସହ ଦିଲ୍ଲୀ ପୋଲିସ ଯୋଗାଯୋଗ କରିଛି। କେଜ୍ରିଓ୍ବାଲଙ୍କ ବାସଭବନରେ ପୋଲିସ ଅପରାହ୍ନ ୪ଟା ୪୫ରୁ ରାତି ପର୍ଯ୍ୟନ୍ତ ତଦନ୍ତ ଚଳାଇଥିଲା। ସେଠାରେ ସ୍ବାତୀ ତାଙ୍କ ସହ ଘଟିଥିବା ସବୁ ଘଟଣା ସମ୍ପର୍କରେ ପୁଙ୍ଖାନୁପୁଙ୍ଖ ଭାବେ ବତାଇଥିଲେ। ପୋଲିସ ଟିମ୍ ୮ ସିସିଟିଭି କ୍ୟାମେରାରୁ ଫୁଟେଜ୍ ସଂଗ୍ରହ କରିଛି। ମୁଖ୍ୟମନ୍ତ୍ରୀଙ୍କ ବାସଭବନର କେତେଜଣ ସୁରକ୍ଷା କର୍ମୀଙ୍କ ମଧ୍ୟ ବୟାନ ରେକର୍ଡ କରିଛି।
ଇତିମଧ୍ୟରେ ମୁଖ୍ୟମନ୍ତ୍ରୀ କେଜ୍ରିଓ୍ବାଲଙ୍କୁ ଭେଟିବା ପାଇଁ ଗତ ୧୩ ତାରିଖରେ ତାଙ୍କ ବାସଭବନକୁ ଯାଇଥିବାବେଳେ ଡ୍ରଇଂରୁମ୍ରେ ସୁରକ୍ଷା କର୍ମୀଙ୍କ ସହ ଯୁକ୍ତିତର୍କ ବେଳର ୫୨ ସେକେଣ୍ଡ ବିଶିଷ୍ଟ ଏକ ଭିଡିଓ କ୍ଲିପ୍ ଭାଇରାଲ ହେବାରେ ଲାଗିଛି। ସୁରକ୍ଷା କର୍ମୀମାନେ ତାଙ୍କୁ ସେଠାରୁ ଚାଲିଯିବା ପାଇଁ କହୁଥିବାବେଳେ ସ୍ବାତୀ ପୋଲିସକୁ ଫୋନ୍ କରୁଥିବା ଏଥିରେ ଦେଖିବାକୁ ମିଳିଛି। ଏହି ଅଭାବନୀୟ ଘଟଣା ପରେ ସ୍ବାତୀ ଟୁଇଟ୍ କରିଥିଲେ, ଜଣେ ‘ପଲିଟିକାଲ ହିଟ୍ମ୍ୟାନ୍’ (କେଜ୍ରିଓ୍ବାଲ)ଙ୍କ ନିର୍ଦ୍ଦେଶକ୍ରମେ ତାଙ୍କ ଲୋକେ ଆକ୍ରମଣ କରିଛନ୍ତି।
