କାଏମା,୨୪ା୪(ଶିବପ୍ରସାଦ ମହାନ୍ତି):ଯାଜପୁର ଜିଲାର ଧର୍ମଶାଳା ନିର୍ବାଚନ ମଣ୍ଡଳୀରେ ମଙ୍ଗଳବାର ଆହୂତ ଏକ ବାଇକ୍ ଶୋଭାଯାତ୍ରାରେ କର୍ମୀମାନେ ପିନ୍ଧିଥିବା ଟି-ସାର୍ଟରେ ଭାଜପା ଉଚ୍ଚ ନେତୃବର୍ଗଙ୍କୁ ଉପେକ୍ଷା କରାଯାଇଥିବା ଚର୍ଚ୍ଚା ହେଉଛି। ଉକ୍ତ ଟି-ଶାର୍ଟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ ଧର୍ମେନ୍ଦ୍ର ପ୍ରଧାନଙ୍କ ଫଟୋ ଛୋଟ ଆକାରରେ ଥିବା ସହ ନେତ୍ରୀ ସ୍ମୃତିରେଖା ପହି ନିଜ ଫଟୋକୁ ବଡ଼ କରି ପ୍ରିଣ୍ଟ କରିଛନ୍ତି। କିନ୍ତୁ ବିଡ଼ମ୍ବନା ଯେ, ଭାଜପା ରାଜ୍ୟ ସଭାପତି ମନମୋହନ ସାମଲଙ୍କ ଫଟୋ ଉକ୍ତ ଟି-ଶାର୍ଟରେ ଦେଖିବାକୁ ମିଳିନାହିଁ। ଏଥିରୁ ରାଜ୍ୟ ଭାଜପା ସଭାପତିଙ୍କୁ ଅଣଦେଖା କରାଯାଇଛି ବୋଲି କେତେ ଜଣ ଭାଜପା କର୍ମୀ ମତବ୍ୟକ୍ତ କରିଛନ୍ତି। କିଛିଦିନ ହେବ ଧର୍ମଶାଳା ଭାଜପାରେ ଟିକେଟ୍ କଳି ଲାଗି ରହିଥିଲା। ଗୋଟିଏପକ୍ଷେ ହିମାଂଶୁ ଶେଖର ସାହୁ ଟିକେଟ୍ ପାଇଁ ଦାବିଦାର ଥିବାବେଳେ ଦଳ କିନ୍ତୁ ସ୍ମୃତିରେଖା ପହିଙ୍କ ନାମ ଘୋଷଣା କରିଛି, ଯାହାକୁ ନେଇ ଦଳ ମଧ୍ୟରେ ଅସନ୍ତୋଷ ବଢ଼ିବାକୁ ଲାଗିଥିଲା। ବଡ଼ କଥା ହେଲା ହିମାଂଶୁ ପୂର୍ବରୁ ଯେତେଥର ସାଧାରଣ ସଭାର ଆୟୋଜନ କରୁଥିଲେ ସେଥିରେ ଭାଜପା ରାଜ୍ୟ ସଭାପତି ମନମୋହନ ସାମଲ ପ୍ରାୟ ସାମିଲ ହେଉଥିଲେ। ଏହି କାରଣରୁ ସ୍ମୃତିରେଖା ରାଜ୍ୟ ସଭାପତିଙ୍କ ଫଟୋ ପ୍ରିଣ୍ଟ କରି ନ ଥିବା ଆଲୋଚନାର ବିଷୟ ହୋଇଛି। ଏ ବିଷୟରେ ଭାଜପା ନେତା ଚନ୍ଦ୍ରମଣି ପଣ୍ଡିତ କହିଛନ୍ତି, ଏହା ଅନ୍ଧାରିଆ ଶୋଭାଯାତ୍ରା ଏବଂ ସ୍ଥାନୀୟ ଜଣେ ବିରୋଧୀ ନେତାଙ୍କ ଟଙ୍କାରେ କରାଯାଇଛି ।
ରାଜ୍ୟ ସଭାପତି ମନମୋହନ ହିମାଂଶୁଙ୍କୁ ସମର୍ଥନ କରୁଥିଲେ । ତେଣୁ ନେତ୍ରୀ ତାଙ୍କ ଫଟୋ କେମିତି ରଖିବେ ବୋଲି ଓଲଟା ପ୍ରଶ୍ନ କରିଛନ୍ତି। ନିର୍ବାଚନ ଯେତେ ପାଖେଇ ଆସୁଛି ଦଳ ଭିତରେ ଥିବା ଗୋଷ୍ଠୀକନ୍ଦଳ ସେତେ ପଦାକୁ ଆସୁଛି। ସୂଚନା ମୁତାବକ, ସ୍ମୃତିରେଖା ନିଜର ଶକ୍ତି ପ୍ରଦର୍ଶନ କରିବା ନିମନ୍ତେ ମଙ୍ଗଳବାର ଏକ ବାଇକ୍ ଶୋଭାଯାତ୍ରା ଆୟୋଜନ କରିଥିଲେ। ଏହା ନାକପୋଲ ହାଟ ପଡ଼ିଆଠାରୁ ବାହାରି ଜାରକା ବଜାର ମଧ୍ୟ ଦେଇ ଉତ୍ତରପ୍ରତାପ ଗ୍ରାମପଞ୍ଚାୟତର ନରସିଂହପୁର ଖେଳପଡ଼ିଆଠାରେ ପହଞ୍ଚିଥିଲା। ଏ ସଂକ୍ରାନ୍ତରେ ସ୍ମୃତିରେଖାଙ୍କ ମତାମତ ନେବାକୁ ତାଙ୍କ ମୋବାଇଲକୁ ଯୋଗାଯୋଗ କରାଯାଇଥିଲେ ହେଁ ସେ ଫୋନ୍ କଲ୍ ଗ୍ରହଣ କରି ନ ଥିଲେ।
