ଭୁବନେଶ୍ୱର, ୧୬।୧ (ତପନ ସ୍ବାଇଁ): ଇନ୍ଦୋରସ୍ଥିତ ଇମରଲାଣ୍ଡ ହାଇଟ୍ସ ଇଣ୍ଟରନ୍ୟାଶନାଲ ସ୍କୁଲ ଗ୍ରାଉଣ୍ଡରେ ଓଡ଼ିଶା-ମଧ୍ୟପ୍ରଦେଶ ଏଲିଟ ଗ୍ରୁପ୍ ‘ଡି’ ରଣଜୀ ଟ୍ରଫି କ୍ରିକେଟ ମ୍ୟାଚ ସୋମବାର ଶେଷ ହୋଇଛି। ମ୍ୟାଚରୁ ଫଳାଫଳ ମିଳିପାରି ନ ଥିବାବେଳେ ପ୍ରଥମ ଇନିଂସ ଅଗ୍ରଣୀ ଭିତ୍ତିରେ ଓଡ଼ିଶାକୁ ୩ ପଏଣ୍ଟ ମିଳିଛି। ପ୍ରଥମ ଇନିଂସରେ କ୍ୟାରିୟର ଶ୍ରେଷ୍ଠ ୨୭୭ ରନ କରିଥିବା ଓଡ଼ିଶାର ଶୁଭ୍ରାଂଶୁ ସେନାପତି ପ୍ଲେୟର ଅଫ୍ ଦି ମ୍ୟାଚ ବିବେଚିତ ହୋଇଛନ୍ତି। ଶୁଭ୍ରାଂଶୁଙ୍କୁ ମ୍ୟାଚ ରେଫରି କଲୋନେଲ ସଞ୍ଜୟ ବର୍ମା ପୁରସ୍କାର ପ୍ରଦାନ କରିଥିଲେ। ଓଡ଼ିଶା ଏହାର ପରବର୍ତ୍ତୀ ମ୍ୟାଚ ଚଳିତ ମାସ ୧୯ ତାରିଖରୁ ଜମ୍ମୁ-କଶ୍ମୀର ବିପକ୍ଷରେ ଖେଳିବ। କଟକର ଡ୍ରିମ୍ସ ଗ୍ରାଉଣ୍ଡରେ ଏହି ମ୍ୟାଚ ଅନୁଷ୍ଠିତ ହେବ। ଅର୍ଥାତ୍ ଓଡ଼ିଶା ବାହାର ପରିବେଶରେ ୨ଟି ମ୍ୟାଚ ଖେଳିବା ପରେ ଚଳିତ ସିଜନରେ ଘରୋଇ ପଡ଼ିଆରେ ପ୍ରଥମ ମ୍ୟାଚ ଖେଳିବ। ଭଦୋଦରାରେ ଓଡ଼ିଶା ଏହାର ପ୍ରଥମ ମ୍ୟାଚରେ ବରୋଦାଠାରୁ ୧୪୭ ରନରେ ହାରି ଯାଇଥିଲା
ଫଲୋଅନ ଡାକିଲା ଓଡ଼ିଶା
ତୃତୀୟ ଦିବସର ଅସମାପ୍ତ ସ୍କୋର ୨୪୬/୬ରୁ ଖେଳ ଆରମ୍ଭ କରିଥିବା ମଧ୍ୟପ୍ରଦେଶ ପ୍ରଥମ ଇନିଂସରେ ମୋଟ ୩୧୮ ରନ କରି ଅଲ୍ଆଉଟ ହୋଇ ଯାଇଥିଲା। ପୂର୍ବଦିନ ଶତକ ହାସଲ କରି ସାରିଥିବା ହର୍ଷ ଗାଓ୍ବଲି ସର୍ବାଧିକ ୧୬୭ ରନ କରିଥିଲେ। ଓଡ଼ିଶା ବୋଲରଙ୍କ ମଧ୍ୟରେ ସୁନୀଲ ରାଉଳ ତୃତୀୟ ଥରପାଇଁ ୫ ଉଇକେଟ ସଫଳତା ପାଇଥିଲେ। ପ୍ରୟାସ ସିଂ ଓ ଗୋବିନ୍ଦ ପୋଦ୍ଦାରଙ୍କୁ ୨ଟି ଲେଖାଏ ଏବଂ ସୂର୍ଯ୍ୟକାନ୍ତ ପ୍ରଧାନଙ୍କୁ ଗୋଟିଏ ଉଇକେଟ ମିଳିଥିଲା। ୧୮୦ ରନରେ ପ୍ରଥମ ଇନିଂସ ଅଗ୍ରଣୀ ଲାଭ କରିଥିବା ଓଡ଼ିଶା ବ୍ୟାଟିଂ ପାଇଁ ପଡ଼ିଆକୁ ନ ଓହ୍ଲାଇ ମଧ୍ୟପ୍ରଦେଶକୁ ଫଲୋଅନ ଡାକିଥିଲା। ଫଳରେ ଘରୋଇ ଦଳ ଦ୍ୱିତୀୟ ଇନିଂସ ଆରମ୍ଭ କରିଥିଲା। ହିମାଂଶୁ ମନ୍ତ୍ରୀ (୧୧୯ ରନ)ଙ୍କ ଶତକ, ୟାଶ ଦୁବେଙ୍କ ଦୃଢ଼ ୯୧ ଓ ଶୁଭମ୍ ଶର୍ମାଙ୍କ ୪୮ ରନ ସହାୟତାରେ ଦଳ ୫୯ ଓଭରରେ ୪ ଉଇକେଟ ହରାଇ ୨୯୧ ରନ କରିଥିବାବେଳେ ଇନିଂସ ଘୋଷଣା କରିଥିଲା। ଓଡ଼ିଶା ପକ୍ଷରୁ ଜୟନ୍ତ ବେହେରାଙ୍କୁ ୨ଟି ଏବଂ ସୁନୀଲ ରାଉଳ ଓ ଗୋବିନ୍ଦ ପୋଦ୍ଦାରଙ୍କୁ ଗୋଟିଏ ଲେଖାଏ ଉଇକେଟ ମିଳିଥିଲା।
ଟାର୍ଗେଟ ୧୧୨
ଓଡ଼ିଶା ଆଗରେ ୧୦ ଓଭରରୁ ୧୧୨ ରନର ବିଜୟ ଲକ୍ଷ୍ୟ ଧାର୍ଯ୍ୟ କରିଥିଲା ମଧ୍ୟପ୍ରଦେଶ। ସ୍କୋର ମାତ୍ର ୧ ରନ ହୋଇଥିବାବେଳେ ଓପନର ଅନୁରାଗ ଷଡ଼ଙ୍ଗୀ (୦) ଆଉଟ ହେବାରୁ ଓଡ଼ିଶା ରନ୍ଚେଜ୍ ଆଭିମୁଖ୍ୟରୁ ଓହରି ଯାଇଥିଲା। ଅଧିନାୟକ ଶାନ୍ତନୁ ମିଶ୍ର ୨୫ ବଲ୍ରୁ ୨ଟି ଲେଖାଏ ଚୌକା ଓ ଛକା ସହାୟତାରେ ୩୩ ରନରେ ଅପରାଜିତ ଥିବାବେଳେ ରାଜେଶ ଧୂପର ସତର୍କତାର ସହ ବ୍ୟାଟିଂ କରି ୩୩ ବଲ୍ରୁ ମାତ୍ର ୫ ରନ ସଂଗ୍ରହ କରିଥିଲେ। ଓଡ଼ିଶା ୧୦ ଓଭରରେ ୧ ଉଇକେଟ ହରାଇ ୩୮ ରନ କରିବାକୁ ସକ୍ଷମ ହୋଇଥିଲା। ମଧ୍ୟପ୍ରଦେଶ ପକ୍ଷରୁ ଉଇକେଟ ହାସଲ କରିଥିଲେ କୁମାର କାର୍ତ୍ତିକେୟ।
