ଭବାନୀପାଟଣା,୧୨।୯(ଉତ୍ତମ କୁମାର ଦାଶ): ପଶ୍ଚିମ ଓଡିଶାର ମହାନ ଗଣପର୍ବ ନୂଅଁାଖାଇ ଆସନ୍ତା ୨୦ ତାରିଖରେ ପାଳିତ ହେବ। ଏହି ପରମ୍ପରା ଅନୁଯାୟୀ କଳାହାଣ୍ଡିର ଅଧିଷ୍ଠାତ୍ରୀ ଦେବୀ ଭବାନୀପାଟଣାରେ ଥିବା ମା’ ମାଣିକେଶ୍ୱରୀଙ୍କ ପୀଠରେ ଆସନ୍ତା ୨୪ ତାରିଖ (ରବିବାର) ଭାଦ୍ରବ ଶୁକ୍ଲପକ୍ଷ ଦଶମୀ ଦିନ ସକାଳ ୬.୩୦ ମିନିଟରୁ ସକାଳ ୮.୫୦ ମିନିଟ ମଧ୍ୟରେ ବିଧିବିଧାନ ପୂର୍ବକ ମା’ଙ୍କ ନିକଟରେ ନବାନ୍ନ ଲାଗି ହେବ ବୋଲି କଳାହାଣ୍ଡି ମହାରାଜା ଅନନ୍ତ ପ୍ରତାପ ଦେଓଙ୍କ ପକ୍ଷରୁ ଏକ ନୋଟିସ ଜାରି ହୋଇଛି। ଏଥିସହ ଏହି ଦିନ ସର୍ବସାଧାରାଣଙ୍କ ନିମନ୍ତେ ନବାନ୍ନ ଭକ୍ଷଣ ପାଇଁ ଦିବା ୧.୧୦ ମିନିଟରୁ ଅପରାହ୍ନ ୩ଟା ମଧ୍ୟରେ ସମୟ ଧାର୍ଯ୍ୟ କରାଯାଇଛି। ପରମ୍ପରା ଅନୁଯାୟୀ ମାଣିକେଶ୍ୱରୀଙ୍କ ନବାନ୍ନ ଭୋଗ ପାଇଁ ରାଜରାଜୁଡା ଅମଳରୁ ଜମି ଭୋଗ କରିଆସୁଥିବା ନାଗଝରି ଗ୍ରାମର ଗଣ୍ଡ ସମ୍ପ୍ରଦାୟର ସେବାୟତ ଶନିବାର ସନ୍ଧ୍ୟା ସୁଦ୍ଧା ନବାନ୍ନ ଭୋଗ ନିମନ୍ତେ ନୂଆଧାନ, ନୂଆଚୁଡା, କୁରେଇ ପତ୍ର ଓ ଅନ୍ୟାନ୍ୟ ପୂଜା ସାମଗ୍ରୀ ଧରି ମନ୍ଦିରରେ ପହଞ୍ଚିବେ। ପଶ୍ଚିମ ଓଡିଶାରେ ଗଣପର୍ବ ଭାଦ୍ରବ ଶୁକ୍ଲପକ୍ଷ ପଞ୍ଚମୀ ତିଥିରେ ପାଳିତ ହେଉଥିବା ବେଳେ କଳାହାଣ୍ଡି ଜିଲାରେ କୌଣସି ନିର୍ଦ୍ଦିଷ୍ଟ ତିଥିରେ ଏହି ପର୍ବ ପାଳିତ ହୁଏନାହିଁ। ସର୍ବପ୍ରଥମେ କେସିଙ୍ଗା ବ୍ଲକର ପର୍ଥଲା, ବାହାଦୁରପଦର ଅଞ୍ଚଳରେ ଏହି ପର୍ବ ପାଳନ କରାଯାଏ। ଏହାପରେ ଭାଦ୍ରବ ଶୁକ୍ଲପକ୍ଷ ପଞ୍ଚମୀ ତିଥିରେ ଜିଲାର ଅଧିକାଂଶ ଅଞ୍ଚଳରେ ନୂଆଁଖାଇ ପାଳନ କରାଯାଏ। ପରେ ଶୁକ୍ଲପକ୍ଷ ଦଶମୀ ତିଥିରେ ଥୁ. ରାମପୁର, ଲାଞ୍ଜିଗଡ, ଜୟପାଟଣା, ମୁଖିଗୁଡା, ମହୁଲପାଟଣା ଓ କର୍ଲାପାଟ, ମ.ରାମପୁର ନୂଆଁଖାଇ ଥାନ୍ତି। ଆଶ୍ୱିନ ଶୁକ୍ଲପକ୍ଷ ଦଶମୀ ବିଜୟଦଶମୀ ପର୍ଯ୍ୟନ୍ତ ବିଭିନ୍ନ ଅଞ୍ଚଳରେ ନୂଆଁଖାଇ ପାଳିତ ହୋଇଥାଏ।
