ମାଲକାନଗିରି,(ଦୁର୍ଯ୍ୟୋଧନ ପାତ୍ର)/ ଖଇରପୁଟ, ୧୮ା୬(ହୃଷୀକେଶ ସେଠୀ) ମାଲକାନଗିରି ଜିଲା ଖଇରପୁଟ ବ୍ଲକ ଅନ୍ତର୍ଗତ ବଣ୍ଡାଘାଟି ଅଞ୍ଚଳରୁ ୧୭ ବଣ୍ଡା ମହିଳା ଓ ପୁରୁଷ ରାଷ୍ଟ୍ରପତି ଦ୍ରୈପଦୀ ମୁର୍ମୁଙ୍କ ନିମନ୍ତ୍ରଣ କ୍ରମେ ରାଷ୍ଟ୍ରପିତ ଭବନ ବୁଲିବାକୁ ଦିଲ୍ଲୀ ଯାଇଥିଲେ। ଏମାନେ ଦୁଇଦିନ ପୂର୍ବେ ନିଜ ଅଞ୍ଚଳକୁ ଫେରିଛନ୍ତି। ଗତ ୧୦ ତାରିଖରେ ଏମାନେ ଦିଲ୍ଲୀଠାରେ ପହଞ୍ଚି ୧୧ ତାରିଖ ଦିନ ସଂସଦ ଭବନ ବୁଲିଥିଲେ ା ୧୨ ତାରିଖରେ ରାଷ୍ଟ୍ରପତି ଭବନ ବୁଲି ରାଷ୍ଟ୍ରପତିଙ୍କ ସହ ଫଟୋ ଉଠାଇ ଆୟୋଜିତ ସଭାରେ ଯୋଗ ଦେଇଥିଲେ। ଏହି ଅବସରରେ ବଣ୍ଡାମାନଙ୍କ ପାରମ୍ପରିକ ମାଳା ରାଷ୍ଟ୍ରପତିଙ୍କୁ ବଣ୍ଡା ଯୁବତୀମାନେ ପିନ୍ଧାଇଥିଲେ। ବଣ୍ଡାମାନଙ୍କ ପାରମ୍ପରିକ ବେଶଭୂଷା ସାରା ଦେଶରୁ ଆସିଥିବା ଆଦିମ ଜନଜାତିଙ୍କୁ ମନ୍ତ୍ରମୁଗ୍ଧ କରିଥିଲା। ଏହା ଛଡା ଦିଲ୍ଲୀରେ ଥିବା ବିଭିନ୍ନ ଦର୍ଶନୀୟ ସ୍ଥାନ ବଣ୍ଡାମାନେ ଭ୍ରମଣ କରିଥିଲେ। ଏମାନଙ୍କ ସହ ମାର୍ଗଦର୍ଶକ ଭାବେ ବଣ୍ଡା ଉନ୍ନୟନ ପ୍ରକଳ୍ପ ପରିଚାଳକ ଅଜିତ କୁମାର ସାହୁ ଯାଇଥିଲେ। ଫେରିବା ପରେ ବଣ୍ଡା ମହିଳା ଓ ପୁରୁଷ ଆଦିବାସୀ ଉନ୍ନୟନ ମନ୍ତ୍ରଣାଳୟ, ରାଷ୍ଟ୍ରପତିଙ୍କ କାର୍ଯ୍ୟାଳୟ ଓ ଟ୍ରାଇବାଲ ଲାଇଭ୍ହୁଡ୍ ପ୍ରୋଜେଷ୍ଟ(ଟିଏଲପି) ସଂସ୍ଥାକୁ ଧନ୍ୟବାଦ ଦେବା ସହ ଖୁସି ପ୍ରକଟ କରିଛନ୍ତି।
