ବେଙ୍ଗାଲୁରୁ,୨।୫: କର୍ନାଟକର ହୋସପେଟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଙ୍ଗଳବାର ଏକ ଜନସଭାକୁ ସମ୍ବୋଧିତ କରିଛନ୍ତି। ଏହି ସମୟରେ ସେ କଂଗ୍ରେସ ଉପରେ ଖୁବ ବର୍ଷିଛନ୍ତି। ସେ କଂଗ୍ରେସର ଘୋଷଣା ପତ୍ରକୁ ନେଇ କହିଛନ୍ତି, ପ୍ରଥମେ ପ୍ରଭୁ ଶ୍ରୀରାମଙ୍କୁ ନେଇ ଅସୁବିଧା ଥିଲା ଆଉ ଏବେ ଜୟ ବଜରଙ୍ଗି କହୁଥିବା ଲୋକଙ୍କୁ ଘୃଣା କରୁଛନ୍ତି। କଂଗ୍ରେସ ତା’ର ଘୋଷଣା ପତ୍ରରେ ବଜରଙ୍ଗ ଦଳ, ପିଏଫଆଇ ଭଳି ସଙ୍ଗଠନକୁ ବନ୍ଦ କରିବାକୁ ଘୋଷଣା କରିଛି।
ମୋଦି କହିଛନ୍ତି, ଆଜି ମୁଁ ହନୁମାନଙ୍କ ଏହି ପବିତ୍ର ଭୂମିରେ ତାଙ୍କୁ ପ୍ରଣାମ କରୁଛି ଏହା ମୋର ବହୁତ ବଡ ସୌଭାଗ୍ୟ, ହେଲେ ଦୁର୍ଭାଗ୍ୟ ମୁଁ ଆଜି ଯେଉଁଠି ହନୁମାନଙ୍କୁ ପ୍ରଣାମ କରିବାକୁ ଆସିଛି, ଠିକ ସେହି ସମୟରେ କଂଗ୍ରେସ ପାର୍ଟି ତା’ର ଘୋଷଣାପତ୍ରରେ ବଜରଙ୍ଗବଲିଙ୍କୁ ତାଲାରେ ବନ୍ଦ କରିବାର ନିଷ୍ପତ୍ତି ନେଇଛି। ପ୍ରଥମେ ଶ୍ରୀରାମଙ୍କୁ ତାଲାରେ ବନ୍ଦ କଲେ ଆଉ ଏବେ ଜୟ ବଜରଙ୍ଗବଲି କହୁଥିବା ଲୋକଙ୍କୁ ତାଲାରେ ବନ୍ଦ କରିବାର ସଂକଳ୍ପ ନେଇଛନ୍ତି। ଏହା ଦେଶର ଦୁର୍ଭାଗ୍ୟ ଯେ କଂଗ୍ରେସ ପାର୍ଟିକୁ ପ୍ରଭୁ ଶ୍ରୀରାମଙ୍କୁବି ଅଡୁଆ ଲାଗୁଛି ଆଉ ଏବେ ଜୟ ବଜରଙ୍ଗବଲି କହୁଥିବା ବ୍ୟକ୍ତିଙ୍କୁ ବି ଅଡୁଆ ଲାଗିଲାଣି।
ସୂଚନାଯୋଗ୍ୟ, କଂଗ୍ରେସ ତା’ର ଘୋଷଣାପତ୍ରରେ କହିଛି ଯେ ଜାତି ଓ ଧର୍ମ ଆଧାରରେ ସମ୍ପ୍ରଦାୟ ମଧ୍ୟରେ ଘୃଣା ବିସ୍ତାର କରୁଥିବା ସଙ୍ଗଠନ ବିରୋଧରେ କଂଗ୍ରେସ ସଠିକ ଓ ନିର୍ଣ୍ଣାୟକ ପଦକ୍ଷେପ ନେବାକୁ ପ୍ରତିଶ୍ରୁତିବଦ୍ଧ। ଆମେ ବିଶ୍ୱାସ କରୁ ଯେ ଆଇନ ଏବଂ ସମ୍ବିଧାନ ପବିତ୍ର ଅଟେ। କୌଣସି ବ୍ୟକ୍ତି କିମ୍ବା ବଜରଙ୍ଗ ଦଳ, ପିଏଫଆଇ ଏବଂ ଅନ୍ୟାନ୍ୟ ସଙ୍ଗଠନ ଯେଉଁମାନେ ଘୃଣା ଏବଂ ଶତ୍ରୁତା ବିସ୍ତାର କରନ୍ତି ସଂଖ୍ୟା ଗରିଷ୍ଠତା ବା ସଂଖ୍ୟାଲଘୁଙ୍କ ମଧ୍ୟରେ ହେଉ, ସେମାନେ ଆଇନ ଓ ସମ୍ବିଧାନର ଉଲ୍ଲଂଘନ କରିପାରିବେ ନାହିଁ। ଆଇଇନ ଅନୁଯାୟୀ, ଏଭଳି ସଙ୍ଗଠନ ଉପରେ ପ୍ରତିବନ୍ଧକ ଲଗାଇବା ସହିତ ଆମେ ନିର୍ଣ୍ଣାୟକ କାର୍ଯ୍ୟାନୁଷ୍ଠାନ ଗ୍ରହଣ କରିବୁ।
