ସଜନାଗଡ଼,୧।୮ (ଡି.ଏନ.ଏ.)- ବାଲେଶ୍ୱର ଜିଲା ନୀଳଗିରି ଥାନା ଅଧୀନ ମିତ୍ରପୁର କାଠପାଳ ଅଞ୍ଚଳରେ ଚୋରା ମଦ କାରବାର ବିରୋଧରେ ମହିଳାମାନଙ୍କ ଆନ୍ଦୋଳନ ତେଜିବାରେ ଲାଗିଛି। ଚୋରାମଦ କାରବାର ବୃଦ୍ଧି ଯୋଗୁ ନାନା ବିଶୃଙ୍ଖଳା ଓ ଗଣ୍ଡଗୋଳ ଘଟୁଥିବା ମହିଳାମାନେ ଅଭିଯୋଗ କରି ମଦ ବିରୋଧୀ ଅଭିଯାନ ଆରମ୍ଭ କରିଥିଲେ ମଧ୍ୟ ଅବକାରୀ ଓ ପୋଲିସ ବିଭାଗ କୌଣସି ପଦକ୍ଷେପ ନେଉ ନାହିଁ ା କାଠପାଳ ଇଟାଭାଟି ଛକରେ ଜଣେ ବ୍ୟକ୍ତି ଚୋରା ମଦ ବେପାର କରୁଥିବାରୁ ଗରିବ ଖଟିଖିଆ ଲୋକେ ସେଠାରୁ ମଦ ପିଇ ଘରେ ସ୍ତ୍ରୀ ପିଲାଛୁଆମାନଙ୍କୁ ମାଡ଼ ମାରୁଥିବା ଏବଂ ଏଭଳି ହିଂସା ଘଟଣାକୁ ନେଇ ଆଦିବାସୀ ଶ୍ରମିକ ଓ ଗରିବ ଲୋକଙ୍କ ଘରେ ଚୁଲି ଜଳୁ ନ ଥିବା ପଦାକୁ ଆସିବା ପରେ ବୁଧବାର ସକାଳେ ଶତାଧିକ ମହିଳା ହାତରେ ଝାଡୁ ଓ ଠେଙ୍ଗା ଧରି ସେଠାକାର ମଦ ଦୋକାନକୁ ଭାଙ୍ଗିଦେବା ସହ ବହୁ ମଦକୁ ଫିଙ୍ଗି ନଷ୍ଟ କରିଦେଇଛନ୍ତି। ଦୀର୍ଘ ସମୟ ଧରି ମହିଳା ଗୋଷ୍ଠୀ ସେଠାରେ ଭଙ୍ଗାରୁଜା କରିବା ସହ ବିଭିନ୍ନ ସ୍ଲୋଗାନ ଦେଇ ମଦ ବିରୋଧୀ ଅଭିଯାନ ଚଳାଇଥିଲେ। ସେମାନେ ମଧ୍ୟ ନୀଳଗିରି ଥାନାକୁ ଯାଇ ବିକ୍ଷୋଭ ପ୍ରଦର୍ଶନ କରିଥିଲେ।
ଆନ୍ଦୋଳନକାରୀ ମହିଳା ଦର୍ଶାଇଛନ୍ତି ଯେ, ଘଟଣାସ୍ଥଳରୁ ମାତ୍ର ୩ କି.ମି. ଦୂରରେ ଅଯୋଧ୍ୟା ଫାଣ୍ଡି ଥିବା ସତ୍ତ୍ୱେ ପୋଲିସ ଘଟଣାସ୍ଥଳକୁ ଆସି ନ ଥିଲା। ଏ ନେଇ ଉତ୍ତ୍ୟକ୍ତ ମହିଳା ନୀଳଗିରି ଥାନାକୁ ଯାଇ ଚୋରା ମଦ ବେପାର ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବା ସହିତ କାଠପାଳ ଅଞ୍ଚଳକୁ ଚୋରା ମଦମୁକ୍ତ କରିବା ଲାଗି ଲିଖିତ ଅଭିଯୋଗ କରିଥିଲେ। ରୁକ୍ମିଣୀ ମହାଳିକ, ସୁକାନ୍ତି ମହାଳିକ, ପ୍ରମିଳା ଚୌଧୁରୀ, ଶାନ୍ତିଲତା ଚୌଧୁରୀ, ଗୌରୀମଣି ଚୌଧୁରୀ, ଶକୁନ୍ତଳା ଦଣ୍ଡପାଟ, ଯମୁନା ପାତ୍ର, ଗୀତାଞ୍ଜଳି ମହାଳିକ, ଶୁଭଲକ୍ଷ୍ମୀ ମହାଳିକ, ସୀମା ମହାଳିକ, ଜୟନ୍ତୀ ମହାଳିକ ପ୍ରମୁଖ ଥାନା ଆଗରେ ବିକ୍ଷୋଭ କରି ଦାବି ଜଣାଇଥିଲେ। ଅନ୍ୟମାନଙ୍କ ମଧ୍ୟରେ ନିର୍ମଳା ଦଣ୍ଡପାଟ, ମଞ୍ଜୁଲତା ଦଣ୍ଡପାଟ, ସୁମତୀ ଦାସ, ନିନି ଦଳେଇ, ସସ୍ମିତା ନାୟକ, ରଞ୍ଜିତା ବେହେରା, ଭାନୁମତି ଖଣ୍ଡେଇ ସମେତ ବହୁ ମହିଳା ଉପସ୍ଥିତ ଥିଲେ।
