ଲକ୍ଷ୍ନୌ,୧୨ା୪: ପ୍ରସିଦ୍ଧ କ୍ରିଷ୍ଣାଙ୍କ ଦମ୍ଦାର ବୋଲିଂ ବଳରେ ଗୁଜରାଟ ଟାଇଟନ୍ସ ୭ ଉଇକେଟରେ ଲକ୍ଷ୍ନୌ ସୁପର ଜାଏଣ୍ଟ୍ସ(ଏଲ୍ଏସ୍ଜି)କୁ ପରାସ୍ତ କରିଛି। ଏହା ଗୁଜରାଟର ୪ ମ୍ୟାଚ୍ରେ ଦ୍ୱିତୀୟ ବିଜୟ ହୋଇଥିବା ବେଳେ ଲକ୍ଷ୍ନୌ ପାଇଁ ଏହା ଦ୍ୱିତୀୟ ପରାଜୟ। ଏହି ମ୍ୟାଚ୍ ଜରିଆରେ ଜୋସ ବଟଲର ଟି୨୦ କ୍ରିକେଟରେ ୧୦୦ତମ ଅର୍ଦ୍ଧଶତକ ପୂରଣ କରିଛନ୍ତି।
ଆମନ୍ତ୍ରଣ ପାଇ ପ୍ରଥମେ ବ୍ୟାଟିଂ କରିଥିବା ଲକ୍ଷ୍ନୌ ଆରମ୍ଭରୁ କ୍ରମାଗତ ବ୍ୟବଧାନରେ ଉଇକେଟ ହରାଇ ନିର୍ଦ୍ଧାରିତ ୨୦ ଓଭରରେ ୮ ଉଇକେଟ ହରାଇ ୧୬୪ ରନ କରିବାରେ ସକ୍ଷମ ହୋଇଥିଲା। ଦଳର ପ୍ରାୟତଃ ବ୍ୟାଟରଙ୍କୁ ଭଲ ଆରମ୍ଭ ମିଳିଥିଲା। ହେଲେ କୌଣସି ବ୍ୟାଟର ତାହାକୁ ବଡ଼ ସ୍କୋରରେ ପରିଣତ କରିପାରି ନ ଥିଲେ। ଏଡେନ ମାରାକ୍ରମ ୩୦ (୫ ଚୌକା ଓ ୧ ଛକା), ରିଷଭ ପନ୍ତ ୧୮ (୨ ଚୌକା ଓ ୧ ଛକା), ନିକୋଲସ ପୁରନ ୧୯ (୨ ଛକା), ମୁକୁଲ ଚୌଧାରୀ ଓ ଅବଦୁଲ ସମଦ ୧୮ ଲେଖାଏ ରନ କରିଥିଲେ। ଗୁଜରାଟ ପକ୍ଷରୁ ପ୍ରସିଦ୍ଧ କ୍ରିଷ୍ଣା ୪ ଓ ଅଶୋକ ଶର୍ମା ୨ ଉଇକେଟ ନେଇଥିଲେ।
ଜବାବରେ ସାଇ ସୁଦର୍ଶନ ଏବଂ ଅଧିନାୟକ ଶୁବମନ ଗିଲ ଦଳ ପାଇଁ ୪୫ ରନ୍ ଯୋଡି ଥିଲେ। ସୁଦର୍ଶନ ୧୫ ରନ୍ କରି ଆଉଟ୍ ହେବା ପରେ ଗିଲ୍ ଏବଂ ତୃତୀୟ କ୍ରମରେ ଆସିଥିବା ବଟଲର ଦ୍ୱିତୀୟ ଉଇକେଟରେ ୮୪ ରନ୍ ଯୋଡ଼ି ଦଳର ବିଜୟ ନିଶ୍ଚିତ କରିଥିଲେ।
ଦୁଇ ବ୍ୟାଟର ଅର୍ଦ୍ଧଶତକ ପୂରଣ କରିବା ପରେ ପାଭିଲିଅନ ଫେରିଥିଲେ। ଗିଲ୍ ୪୦ ବଲରେ ୫୬ (୬ ଚୌକା ଓ ୧ ଛକା) ଓ ବଟଲର ୩୭ ବଲରେ ୬୦ (୧୧ ଚୌକା ଓ ୧ ଛକା) ରନ କରିଥିଲେ। ଏହାପରେ ଓ୍ବାଶିଂଟନ ସୁନ୍ଦର (୨୧ ରନ, ୨ ଚୌକା ଓ ୧ ଛକା) ଓ ରାହୁଲ ତଓ୍ବେତିଆ (୧୦ ରନ, ୧ ଚୌକା) ଦଳ ଲାଗି ଆବଶ୍ୟକ ରନ ସଂଗ୍ରହ କରି ନେଇଥିଲେ। ଫଳରେ ଗୁଜରାଟ ୧୮.୪ ଓଭରରେ ୩ ଉଇକେଟ ହରାଇ ୧୬୫ ରନ କରି ନେଇଥିଲା।
