ବଳଙ୍ଗା,୪।୩(ଡି.ଏନ୍.ଏ.): ଗ୍ରାମାଞ୍ଚଳରେ ସଡ଼କଠାରୁ ଆରମ୍ଭ କରି ଜଳ, ବିଦ୍ୟୁତ୍ ଭଳି ସବୁ କ୍ଷେତ୍ରରେ ବିକାଶ କରିବା ପାଇଁ ସରକାରଙ୍କ ପକ୍ଷରୁ କୋଟି କୋଟି ଟଙ୍କା ଖର୍ଚ୍ଚ କରି ଉନ୍ନତମାନର କାର୍ଯ୍ୟ କରାଯାଉଛି। ହେଲେ ସରକାରୀ ଅଧିକାରୀମାନେ କାର୍ଯ୍ୟଗୁଡ଼ିକର ତଦାରଖ କରୁ ନ ଥିବାରୁ ତାହା ବିଳମ୍ବ ହେବା ସହ ନିମ୍ନମାନର ହେଉଥିବା ଅଭିଯୋଗ ହେଉଛି। ଏହି ପରିପ୍ରେକ୍ଷୀରେ ପୁରୀ ଜିଲା ବଳଙ୍ଗା ବ୍ଲକ ଅଞ୍ଚଳରେ ପ୍ରଧାନମନ୍ତ୍ରୀ ଗ୍ରାମ ସଡ଼କ ଯୋଜନାରେ ବାୟାବରଠାରୁ ଖେଲାର ପର୍ଯ୍ୟନ୍ତ ୬ କି.ମି.୫୦୫ମି ରାସ୍ତା ୪ କୋଟି ୫୫ ଲକ୍ଷ ୪୩ହଜାର ଟଙ୍କା ବ୍ୟୟରେ ୨୦୨୧ ଡିସେମ୍ବର ୮ ତାରିଖରୁ କାର୍ଯ୍ୟ ଆରମ୍ଭ ହୋଇ ୨୦୨୨ ଡିସେମ୍ବର ୮ ତାରିଖ ମଧ୍ୟରେ ଶେଷ ହେବାର ସୂଚନା ରହିଛି। କିନ୍ତୁ ନିର୍ଦ୍ଧାରିତ ସମୟଠାରୁ ୩ ମାସ ବିଳମ୍ବ ହୋଇଥିଲେ ମଧ୍ୟ କାର୍ଯ୍ୟ ଶେଷ ହୋଇପାରି ନାହିଁ। ଫଳରେ ଉକ୍ତ ରାସ୍ତାରେ ଯାତାୟାତରେ ଲୋକଙ୍କୁ ବହୁ ଅସୁବିଧା ହେଉଛି। ଏ ନେଇ ସ୍ଥାନୀୟ ଲୋକଙ୍କ ଦ୍ୱାରା ପ୍ରଶାସନକୁ ଅଭିଯୋଗ କଲେ ମଧ୍ୟ କେହି ଶୁଣୁନାହାନ୍ତି। ଅନ୍ୟପଟେ କୁଅଁରପୁର ଉଚ୍ଚ ମାଧ୍ୟମିକ ମହାବିଦ୍ୟାଳୟ ଓ ଶିଶୁ ମନ୍ଦିର ନିକଟରେ ପ୍ରାୟ ଏକ ଶହ ମିଟର ରାସ୍ତା ଦୀର୍ଘ ବର୍ଷ ପରେ ବ୍ୟକ୍ତିଗତ ମାଲିକାନା ଥିବା ଦର୍ଶାଇ କାର୍ଯ୍ୟ ବାଧାପ୍ରାପ୍ତ ହୋଇଥିବା ବିଭାଗୀୟ ସୂତ୍ରରୁ ଜଣାପଡିଛି। ସମ୍ପୃକ୍ତ ସ୍ଥାନରେ ଗୋଡି ସବୁ ବିକ୍ଷିପ୍ତ ହୋଇପଡ଼ିଥିବାରୁ ପ୍ରାୟତଃ ଛାତ୍ରୀଛାତ୍ର ଓ ପଥଚାରୀ ଦୁର୍ଘଟଣାଗ୍ରସ୍ତ ହେଉଛନ୍ତି। ସେହିପରି କାଟେଣିପଡିଆ ସଫେଇ ନାଳ ଉପରେ ଥିବା ପୁରାତନ ବ୍ରିଜ୍ଠାରୁ ରାସ୍ତା ପ୍ରାୟ ୪ଫୁଟ ଉଚ୍ଚତାରେ ରହିଛି। ବନ୍ୟା ସମୟରେ ଧନୁଆ ନଦୀ ବ୍ରିଜ୍ ଉପରେ ୬ ଫୁଟରୁ ଊଦ୍ଧର୍ବ ଜଳ ପ୍ରବାହିତ ହେବାବେଳେ ନିକଟସ୍ଥ ୫୦ଟି ଗ୍ରାମକୁ ଯୋଗାଯୋଗ ବିଚ୍ଛିନ୍ନ ହେଉଥିଲେ ମଧ୍ୟ ଉଚ୍ଚ ବ୍ରିଜ ନିର୍ମାଣ ହେଉ ନ ଥିବାରୁ ସମସ୍ୟା ଲାଗି ରହିଛି। ବହୁ ବର୍ଷ ପୂର୍ବରୁ ରାସ୍ତାର ବିଭିନ୍ନ ସ୍ଥାନରେ ଜଳ ନିଷ୍କାସନ ନିମନ୍ତେ ବସିଥିବା ପୋଲ ପକ୍କା କରା ନ ଯାଇ ମରାମତି କରାଯାଉଥିବାରୁ ସ୍ଥାୟୀ ନେଇ ଆଶଙ୍କା ଦେଖାଦେଇଛି। ପୋଲରେ ଯଥେଷ୍ଟ ପରିମାଣରେ ଜଳ ନିଷ୍କାସନ ନ ହେବାରୁ ଦୀର୍ଘ ଦିନ ପାଣି ଜମି ଫସଲ ନଷ୍ଟ ହେଉଥିବା ଚାଷୀମାନେ ଅଭିଯୋଗ କରିଛନ୍ତି। ଏହି ମୁଖ୍ୟ ରାସ୍ତାରେ ଲୋକେ ଧନୁଆ, ବାଇଶି ଶାସନ, ରେଞ୍ଜ, ହରିପୁର, ଗଡପଦନପୁର, ଗୋପୀନାଥପୁର, କୋଟକୁସାଙ୍ଗ ସମେତ ବଳଙ୍ଗା, ଖେଲାର, ଭୁବନେଶ୍ୱର, ନିମାପଡ଼ା, ପିପିଲି ଅନେକ ସ୍ଥାନକୁ ଯାତାୟାତ କରିଥାନ୍ତି। ତେଣୁ ଯଥାଶୀଘ୍ର ଉକ୍ତ ରାସ୍ତାର କାର୍ଯ୍ୟ ସବୁ ଉଚ୍ଚ ଏବଂ ଆବଶ୍ୟକ ସ୍ଥାନରେ ବ୍ରିଜ୍ ନିର୍ମାଣ କରିବାକୁ ସମ୍ପୃକ୍ତ ପଞ୍ଚାୟତବାସୀ ଦାବି କରିଛନ୍ତି। ନଚେତ ଆଗାମୀ ଦିନରେ ଜନଆନ୍ଦୋଳନ କରାଯିବ ବୋଲି ଚେତାବନୀ ଦେଇଛନ୍ତି।
