ନୂଆଦିଲ୍ଲୀ,୨୧-୭: ନୂଆ ଯୁଗର ପେମେଣ୍ଟ ବ୍ୟାଙ୍କ ପ୍ରଦର୍ଶନ ଅତ୍ୟନ୍ତ ଖରାପ ରହିଛି। ଭୋଡ଼ାଫୋନର ଏମ୍ ପୈସା ପରେ ଆଦିତ୍ୟ ବିର୍ଲା ଆଇଡିଆ ପେମେଣ୍ଟସ ବ୍ୟାଙ୍କ ବନ୍ଦ ହୋଇଯିବ। ମାତ୍ର ୧୭ ମାସ ପୂର୍ବେ ଆରମ୍ଭ ହୋଇଥିବା ଏହି ବ୍ୟାଙ୍କ ଆସନ୍ତା ୨୬ରୁ ସମସ୍ତ ନେଣଦେଣ ବନ୍ଦ କରିବାକୁ ଘୋଷଣା କରିଛି। ଗ୍ରାହକ ନିଜ ଆକାଉଣ୍ଟରେ ଥିବା ଟଙ୍କାକୁ ଅନ୍ୟ ବ୍ୟାଙ୍କକୁ ସ୍ଥାନାନ୍ତର କରିବାକୁ ଆଇଡିଆ ପେମେଣ୍ଟ ବ୍ୟାଙ୍କ ପକ୍ଷରୁ କୁହାଯାଇଛି। ଭୋଡାଫୋନ ଆଇଡିଆ ପକ୍ଷରୁ କୁହାଯାଇଛି ଯେ, ବ୍ୟାଙ୍କ ବନ୍ଦ କରିବା ଲାଗି ନିୟାମକୀୟ ଅନୁମତି ମିଳିଯାଇଛି। ବ୍ୟାଙ୍କ ପକ୍ଷରୁ ଶୁକ୍ରବାର ଷ୍ଟକ୍ ଏକ୍ସଚେଞ୍ଜକୁ ଏ ସମ୍ପର୍କରେ ଜଣାଇ ଦିଆଯାଇଛି। ଅପେକ୍ଷାକୃତ ସଫଳତା ନ ମିଳିବା କାରଣରୁ ବ୍ୟାଙ୍କ ବ୍ୟବସାୟକୁ ଆଗକୁ ବଢ଼ାଇବା ସମ୍ଭବ ନୁହେଁ ବୋଲି ବ୍ୟାଙ୍କ କହିଛି। ଗ୍ରାହକ ଅନ୍ଲାଇନ, ମୋବାଇଲ ବ୍ୟାଙ୍କିଙ୍ଗ ଅଥବା ନିକଟସ୍ଥା ବ୍ୟାଙ୍କିଙ୍ଗ ପଏଣ୍ଟକୁ ଯାଇ ନିଜର ବାଲାନ୍ସ ଟ୍ରାନ୍ସଫର କରିପାରିବେ। ଏଥିପାଇଁ ସମସ୍ତ ବ୍ୟବସ୍ଥା କରାଯାଇଛି ବୋଲି ବ୍ୟାଙ୍କ ପକ୍ଷରୁ କୁହାଯାଇଛି। ଆଦିତ୍ୟ ବିର୍ଲା ନୁଭୋ ଏବଂ ଆଇଡିିଆ ସେଲ୍ୟୁଲାର ଯୁଗ୍ମ ଭାବେ ଆଦିତ୍ୟ ବିର୍ଲା ଆଇଡିଆ ପେମେଣ୍ଟ ବ୍ୟାଙ୍କ ପ୍ରତିଷ୍ଠା କରିଥିଲେ। ରେଗୁଲେଟୋରୀ ସର୍ତ୍ତ ପୂରଣ କରିବା ଲାଗି ୧୮ ମାସ ସମୟ ଦିଆଯାଇଥିଲା। ପରେ ୭ ଜଣ ଆବେଦନକାରୀଙ୍କୁ ପେମେଣ୍ଟ ବ୍ୟାଙ୍କ ଲଞ୍ଚ କରିବାକୁ ଫାଇନାଲ ଲାଇସେନ୍ସ ମିଳି ଥିଲା। ୨୦୧୬ରେ ଆଇଡିଆ ସେଲ୍ୟୁଲାର ଏହାର ସହଯୋଗୀ କମ୍ପାନୀ ଆଇଡିଆ ମୋବାଇଲ କମର୍ସ ସର୍ଭିସେସ୍କୁ ପେମେଣ୍ଟ ବ୍ୟାଙ୍କରେ ମିଶାଇ ଦେଇଥିଲା। ଏଥିରେ ଆଦିତ୍ୟ ବିର୍ଲା ନୁଭୋର ୫୧% ଅଂଶଧନ ରହିଛି। ବ୍ୟାଙ୍କରେ ପ୍ରାୟ ୨୦୦ କର୍ମଚାରୀ ଥିଲେ। ସେମାନଙ୍କ ମଧ୍ୟରୁ ଅଧିକାଂଶଙ୍କୁ ଗ୍ରୁପ୍ର ଅନ୍ୟ କମ୍ପାନୀକୁ ସ୍ଥାନାନ୍ତର କରାଯାଇଥିବା ବେଳେ କେତେକଙ୍କୁ ଚାକିରି ଛାଡ଼ିବାକୁ ନିର୍ଦ୍ଦେଶ ଦିଆଯାଇଛି। ମିଡିଆ ରିପୋର୍ଟ ଅନୁଯାୟୀ, ଡିସେମ୍ବର, ୨୦୧୮ ସୁଦ୍ଧା ପେମେଣ୍ଟ ବ୍ୟାଙ୍କ ମାତ୍ର ୫.୬୨ କୋଟି ଟଙ୍କା ଜମା କରିପାରିଥିଲା। ଏହି ସେଗମେଣ୍ଟରେ ଏୟାରଟେଲ ପେମେଣ୍ଟସ ବ୍ୟାଙ୍କ ଓ ପେଟିଏମ୍ ପେମେଣ୍ଟସ ବ୍ୟାଙ୍କ କାର୍ଯ୍ୟ କରୁଛି। ଡିସେମ୍ବର ୨୦୧୮ ସୁଦ୍ଧା ସମସ୍ତ ପେମେଣ୍ଟ ବ୍ୟାଙ୍କ ନିକଟରେ ୭୮୦ କୋଟି ଟଙ୍କା ରହିଛି। କଡ଼ା କଓ୍ବୋଇସି ନିୟମ ଏବଂ ପ୍ରତିଯୋଗିତା ଯୋଗୁ ପେମେଣ୍ଟସ ବ୍ୟାଙ୍କ ସେଗ୍ମେଣ୍ଟ ଆଗେଇ ପାରୁନାହିଁ।
