ବେଙ୍ଗାଲୁରୁ, ୧।୨ : ଆଇପିଏଲ୍ ପାଇଁ ଖେଳାଳିଙ୍କ ନିଲାମ ପ୍ରକ୍ରିୟା ଫେବୃୟାରୀ ୧୨ ଏବଂ ୧୩ରେ ବେଙ୍ଗାଲୁରୁରେ ହେବ। ଏଥିପାଇଁ ୧୯ ଦେଶର ୫୯୦ ଖେଳାଳିଙ୍କୁ ଚୟନ କରାଯାଇଛି। ସେଥିମଧ୍ୟରେ ୪୮ ଜଣ ଖେଳାଳିଙ୍କ ବେସ୍ ପ୍ରାଇସ୍ ୨ କୋଟି ଟଙ୍କା ରହିଛି। ଅପରପକ୍ଷରେ ୨୦ ଜଣଙ୍କର ବେସ୍ ପ୍ରାଇସ୍ ଦେଢ଼ କୋଟି ଟଙ୍କା ଅଛି। ୩୪ ଜଣଙ୍କର ବେସ୍ ପ୍ରାଇସ୍ ଏକ କୋଟି ଟଙ୍କା ରହିଛି।
ଆଇପିଏଲ୍ର ୧୦ଟି କ୍ରିକେଟ ଟିମ୍ ପାଖରେ ମୋଟ୍ ୨୧୭ ସ୍ଲଟ୍ ଖାଲି ରହିଛି।
ଚଳିତ ବର୍ଷ ଆଇପିଏଲ୍ ନିଲାମ ପାଇଁ ୧୯ ଦେଶର ମୋଟ ୧୨୧୪ କ୍ରିକେଟର ପଞ୍ଜିକରଣ କରିଥିଲେ। ସୋମାନଙ୍କ ମଧ୍ୟରୁ ୫୯୦ ଖେଳାଳିଙ୍କୁ ଚୟନ କରାଯାଇ ସେମାନଙ୍କ ନିଲାମ ତାଲିକା ସହିତ ବେସ୍ ପ୍ରାଇସ୍ ପ୍ରକାଶିତ ହୋଇଛି।
ନିଲାମ ତାଲିକାରେ ଥିବା ଖେଳାଳିଙ୍କ ମଧ୍ୟରୁ ୨୨୮ ଜଣ ଅନ୍ତର୍ଜାତୀୟ ମ୍ୟାଚ୍ ଖେଳିଛନ୍ତି। ସେହିପରି ୩୩୫ ଜଣ ଅନ୍କେପ୍ଡ ଖେଳାଳି ଅଛନ୍ତି।
ନିଲାମ ତାଲିକାରେ ପ୍ରବେଶ କରିଥିବା ମୁଖ୍ୟ ଭାରତୀୟ ଖେଳାଳିଙ୍କ ଶ୍ରେୟସ ଆୟର, ଶିଖର ଧାୱନ, ରବିଚନ୍ଦ୍ରନ ଅଶ୍ୱିନ, ମହମ୍ମଦ ଶାମି, ଇଶାନ କିଶାନ, ଅଜିଙ୍କ୍ୟ ରାହାନେ, ସୁରେଶ ରୈନା, ୟୁଜବେନ୍ଦ୍ର ଚହଲ, ୱାଶିଂଟନ ସୁନ୍ଦର, ଶାର୍ଦ୍ଦୁଳ ଠାକୁର, ଦୀପକ ଚାହର, ଇଶାନ୍ତ ଶର୍ମା , ଉମେଶ ଯାଦବ ପ୍ରମୁଖ କ୍ରିକେଟରଙ୍କୁ ଅନ୍ତର୍ଭୁକ୍ତ କରାଯାଇଛି।
ଏଥି ସହିତ ଡେଭିଡ ୱାର୍ଣ୍ଣର, ଅଶ୍ୱିନ, ଟ୍ରେଣ୍ଟ ବୋଲ୍ଟ, ପ୍ୟାଟ କମିନ୍ସ, କ୍ୱିଣ୍ଟନ ଡିର୍କକ, ଧାୱନ, ଫାଫ ଡୁପ୍ଲେସିସ, ଶ୍ରେୟାସ, କାଗିସୋ ରାବାଡା ଏବଂ ଶାମି ସେହି ଖେଳାଳିଙ୍କ ମଧ୍ୟରେ ଅଛନ୍ତି ଯାହାଙ୍କର ବେସ୍ ପ୍ରାଇସ୍ ୨ କୋଟି ଟଙ୍କା ରହିଛି। ଏହା ବ୍ୟତୀତ ଜନି ବେୟାରଷ୍ଟୋ, ଜେସନ ହୋଲ୍ଡର, ଡୱେନ ବ୍ରାଭୋ, ଶାକିବ ଅଲ ହାସନ ଏବଂ ୱାନିନ୍ଦୁ ହାସରାଙ୍ଗା ଭଳି ବିଦେଶୀ ଖେଳାଳି ମଧ୍ୟ ନିଲାମ ତାଲିକାରେ ଅଛନ୍ତି।
