ନୂଆଦିଲ୍ଲୀ,୬।୪: ମୁଖ୍ୟ ନିର୍ବାଚନ କମିଶନର ଜ୍ଞାନେଶ କୁମାରଙ୍କ ବିରୋଧରେ ମହାଭିଯୋଗ ପ୍ରସ୍ତାବକୁ ଖାରଜ କରାଯାଇଛି। ରାଜ୍ୟ ସଭା ଅଧ୍ୟକ୍ଷ ଏହି ପ୍ରସ୍ତାବକୁ ଖାରଜ କରିଛନ୍ତି। ବିରୋଧୀ ଦଳ ସିଇସିଙ୍କୁ ହଟାଇବା ପାଇଁ ଦାବି କରିଥିଲେ। ଟିଏମସିଙ୍କ ନେତୃତ୍ୱରେ ବିରୋଧୀ ଦଳଗୁଡ଼ିକ ମୁଖ୍ୟ ନିର୍ବାଚନ କମିଶନରଙ୍କୁ ପଦରୁ ହଟାଇବା ପାଇଁ ସଂସଦର ଉଭୟ ଗୃହରେ ମହାଭିଯୋଗ ପାଇଁ ନୋଟିସ ଦାଖଲ କରିଥିଲେ। Section 3 of judges inquiry act 1968ର ଅନୁଯାୟୀ, ତାଙ୍କ କ୍ଷମତା ପ୍ରୟୋଗ କରି, ରାଜ୍ୟ ସଭାର ଅଧ୍ୟକ୍ଷ ଏହି ପ୍ରସ୍ତାବକୁ ଗ୍ରହଣ କରିବାକୁ ମନା କରିଦେଇଥିଲେ।
ଏହି ପ୍ରସ୍ତାବ ମାର୍ଚ୍ଚ ୧୨ରେ ରାଜ୍ୟ ସଭାରେ ଆଗତ କରାଯାଇଥିଲା। ଏଥିରେ ରାଜ୍ୟ ସଭାରେ ୬୩ ଜଣ ଏମ୍ପି ସ୍ବାକ୍ଷର କରିଥିଲେ। ଲୋକ ସଭାରେ ୧୩୦ ଜଣ ଏମ୍ପି ଏହି ପ୍ରସ୍ତାବରେ ସ୍ବାକ୍ଷର କରିଥିଲେ। ଏହି ପ୍ରସ୍ତାବର ଉଦ୍ଦେଶ୍ୟ ଥିଲା ମୁଖ୍ୟ ନିର୍ବାଚନ କମିଶନର ଜ୍ଞାନେଶ କୁମାରଙ୍କୁ ତାଙ୍କ ପଦରୁ ହଟାଇବା। ନିୟମ ଅନୁଯାୟୀ, ଜଣେ ମୁଖ୍ୟ ନିର୍ବାଚନ କମିଶନରଙ୍କୁ ହଟାଇବା ପାଇଁ ଅତି କମରେ ୧୦୦ ଜଣ ଲୋକ ସଭା ଏମ୍ପି କିମ୍ବା ୫୦ ଜଣ ରାଜ୍ୟ ସଭା ଏମ୍ପିଙ୍କ ସ୍ବାକ୍ଷର ଆବଶ୍ୟକ।
ବିଶେଷକରି ନୋଟିସ ମୁଖ୍ୟ ନିର୍ବାଚନ କମିଶନରଙ୍କ ବିରୋଧରେ ଅନେକ ଅଭିଯୋଗ ଆଣିଥିଲା। ଏଥିରେ ପଦବୀରେ ଥିବା ସମୟରେ ଏକ ନିର୍ଦ୍ଦିଷ୍ଟ ରାଜନୈତିକ ଦଳକୁ ସମର୍ଥନ କରିବା, ନିର୍ବାଚନ ଅନିୟମିତତାର ତଦନ୍ତରେ ଜାଣିଶୁଣି ବାଧା ସୃଷ୍ଟି କରିବା ଏବଂ ଭୋଟର ତାଲିକାରେ ହେରଫେର କରିବା ଭଳି ଅଭିଯୋଗ ସାମିଲ ଅଛି। ଟିଏମସିର ନୋଟିସରେ ବିହାର ଏବଂ ପଶ୍ଚିମବଙ୍ଗରେ ଭୋଟର ତାଲିକାରୁ ବଡ଼ ପରିମାଣରେ ନାମ ବାଦ ଦେବା ଅଭିଯୋଗ ସମେତ ୭ଟି ପ୍ରାଥମିକ ଅଭିଯୋଗ ତାଲିକାଭୁକ୍ତ କରାଯାଇଥିଲା।
Dharitri – Odisha’s No.1 Odia Daily
