ପାଲଘର,୧।୯: କଥାରେ ଅଛି ଭାଗ୍ୟରେ ପରିବର୍ତ୍ତନ ଅସିଲେ ମାଟି ଧରିଲେ ସୁନା ପାଲଟି ଯିବ। ଏହାର ସଦ୍ୟତମ ଉଦାହରଣ ପାଲଟିଛନ୍ତି ମହାରାଷ୍ଟ୍ର ପାଲଘରର ଜଣେ ମତ୍ସ୍ୟଜୀବୀ ଚନ୍ଦ୍ରକାନ୍ତ। ସେ ରାତାରାତି କୋଟିପତି ପାଲଟି ଯାଇଛନ୍ତି। ୨୮ ଅଗଷ୍ଟ ରାତିରେ ସେ ଆରବ ସାଗରକୁ ମାଛ ଧରିବାକୁ ଯାଇଥିଲେ।ତାଙ୍କ ଜାଲରେ ଗୋଟିଏ କିମ୍ବା ଦୁଇଟି ନୁହେଁ ବରଂ ୧୫୭ ଘୋଲ ମାଛ ଧରାପଡ଼ିଥିଲେ। ମାଛଗୁଡ଼ିକୁ ଚନ୍ଦ୍ରକାନ୍ତ ଏବଂ ତାଙ୍କ ପୁଅ ସୋମନାଥ ୧.୩୩ କୋଟି ଟଙ୍କାରେ ବିକ୍ରି କରିଥିଲେ। ପ୍ରତି ମାଛକୁ ପ୍ରାୟ ୮୫ ହଜାର ଟଙ୍କାରେ ସେ ବିକ୍ରି କରିଛନ୍ତି।
ବଜାରରେ ଘୋଲ ମାଛର ଚାହିଦା ରହିଛି। ଏହି ମାଛକୁ ଚିକିତ୍ସା କ୍ଷେତ୍ରରେ ବିଭିନ୍ନ ଔଷଧ ପ୍ରସ୍ତୁତିରେ ବ୍ୟବହାର କରାଯାଇଥାଏ। ଚନ୍ଦ୍ରକାନ୍ତଙ୍କ ପୁଅ ସୋମନାଥ କହିଛନ୍ତି ଯେ ଆମେ ହରବା ଦେବୀ ନାମକ ଏକ ଡଙ୍ଗାରେ ୮ ଜଣ ସାଥୀଙ୍କ ସହ ମାଛ ଧରିବାକୁ ଯାଇଥିଲୁ। ସମୁଦ୍ର କୂଳରୁ ୱାଡୱାନ ଆଡକୁ ୨୦ରୁ ୨୫ ନ୍ୟୁଟିକାଲ ମାଇଲ ଦୂରେ ମାଛ ଗୁଡ଼ିକ ଧରାପଡ଼ିଥିଲେ। ଘୋଲ ମାଛକୁ ସମୁଦ୍ର ସୁନା ମଧ୍ୟ କୁହାଯାଏ କାରଣ ଏହି ମାଛଗୁଡ଼ିକର ମୂଲ୍ୟ ସୁନାଠାରୁ କମ ନୁହେଁ। ଏହାର ନାମ ଜୁଲୋଜିକାଲ ନାମ ହେଉଛି ‘ପ୍ରୋଟୋନିବିୟା ଡିଆକାନଥସ’। ଥାଇଲ୍ୟାଣ୍ଡ, ଇଣ୍ଡୋନେସିଆ, ଜାପାନ, ସିଙ୍ଗାପୁର ଭଳି ଦେଶରେ ଏହି ମାଛର ଚାହିଦା ଅଧିକ। ଅସ୍ତ୍ରୋପଚାର ପାଇଁ ବ୍ୟବହୃତ ସୂତା, ଯାହାକି ଶରୀରରେ ଡିଜଲଭ୍ ହୋଇଯାଇଥାଏ। ତାହା ଏହି ମାଛରୁ ପ୍ରସ୍ତୁତ କରାଯାଇଥାଏ।
ଏହି ମାଛଗୁଡିକୁ ଉତ୍ତରପ୍ରଦେଶ ଏବଂ ବିହାରର ବ୍ୟବସାୟୀମାନେ କିଣିଥିବା ଚନ୍ଦ୍ରକାନ୍ତ କହିଛନ୍ତି। ମାଛଗୁଡ଼ିକର ନିଲାମ ପାଲଘରର ମୁର୍ବେଠାରେ ହୋଇଥିଲା ସମୁଦ୍ରରେ ପ୍ରଦୂଷଣର ମାତ୍ରା ବୃଦ୍ଧି ଯୋଗୁୁ ଏହି ମୂଲ୍ୟବାନ ମାଛଗୁଡ଼ିକ କୂଳରେ ମିଳୁ ନାହାନ୍ତି। ଏହି ମାଛ ପାଇଁ ମତ୍ସ୍ୟଜୀବୀଙ୍କୁ ଗଭୀର ସମୁଦ୍ରକୁ ଯିବାକୁ ପଡଥାଏ।
