ବଣାଇଁ,୬।୪(ପ୍ରଦୀପ ତ୍ରିପାଠୀ): ଓଡ଼ିଶା-ଝାଡଖଣ୍ଡ ସୀମା ସଂଲଗ୍ନ ସରଣ୍ଡା ଜଙ୍ଗଲରେ ସୋମବାର ପୁଣି ବିସ୍ଫୋରଣର ଖବର ସାମ୍ନାକୁ ଆସିଛି। ଯାହା ସୁରକ୍ଷା ବ୍ୟବସ୍ଥା ଏବଂ ନକ୍ସଲ କାର୍ଯ୍ୟକଳାପକୁ ନେଇ ନୂଆ ପ୍ରଶ୍ନ ଉଠାଇଛି। ୬ ଏପ୍ରିଲର ସକାଳେ ବାଲିବା ଗାଁ ନିକଟସ୍ଥ ଚଡ୍ରା ଡେରା ଜଙ୍ଗଳରେ ହୋଇଥିବା ଏକ ଲ୍ୟାଣ୍ଡ ମାଇନ ବିସ୍ଫୋରଣରେ କୋବ୍ରା ୨୦୫ ନମ୍ବର ବାଟାଲିୟନର ଜଣେ ଯବାନ ଅନୁଜ କୁମାର ଆହତ ହୋଇଛନ୍ତି। ଘଟଣା ପରେ ସମଗ୍ର ଅଞ୍ଚଳରେ ଆତଙ୍କ ସୃଷ୍ଟି ହୋଇଛି ଏବଂ ସୁରକ୍ଷା ବଳ ଦ୍ୱାରା ସର୍ଚ୍ଚ ଅପରେଶନକୁ ଜୋରଦାର କରାଯାଇଛି। ଆହତ ଯବାନଙ୍କୁ ତୁରନ୍ତ ପ୍ରାଥମିକ ଚିକିତ୍ସା ଦିଆଯାଇ ଥିଲା । ପରେ ତାଙ୍କୁ ଉତ୍ତମ ଚିକିତ୍ସା ପାଇଁ ରାଞ୍ଚି ପଠାଯାଇଥିବା ସୂଚନା ମିଳିଛି। ୩୧ ମାର୍ଚ୍ଚ ୨୦୨୬ ମଧ୍ୟରେ ସମ୍ପୂର୍ଣ୍ଣ ନକ୍ସଲ ମୁକ୍ତ ଭାରତ ନେଇ କେନ୍ଦ୍ର ଗୃହ ମନ୍ତ୍ରଣାଳୟ ପକ୍ଷରୁ ଧାର୍ଯ୍ୟ ଡେଟ ଲାଇନକୁ ମାଓବାଦୀ ନକ୍ସଲ ଚ୍ୟାଲେଞ୍ଜ ଦେଇ କାର୍ଯ୍ୟକଳାପ ଜାରି ରଖିଛନ୍ତି ।
ସରଣ୍ଡା: ସଦା ସଚେତନ ରହିବାକୁ ପଡ଼ୁଥିବା ଅଞ୍ଚଳ। ଉକ୍ତ ଅଞ୍ଚଳ ଦେଶର ସବୁଠୁ ସମ୍ବେଦନଶୀଳ ନକ୍ସଲ ପ୍ରଭାବିତ ଅଞ୍ଚଳମାନଙ୍କ ମଧ୍ୟରୁ ଗୋଟିଏ।
ଘନ ଜଙ୍ଗଲ ଏବଂ ଦୁର୍ଗମ ଭୌଗୋଳିକ ପରିସ୍ଥିତି ସହିତ ଦୁଇଟି ରାଜ୍ୟ ଓଡ଼ିଶା ଓ ଝାଡଖଣ୍ଡର ସମିଶ୍ରଣ ଅଞ୍ଚଳ ଥିବାରୁ ଏହା ମାଓବାଦୀ ନକ୍ସଲଙ୍କ ଲୁଚିବା ପାଇଁ ସହାୟକ ସ୍ଥଳ ସାଜିଛି।
ଅଞ୍ଚଳରେ ପୁଣି ନକ୍ସଲ କାର୍ଯ୍ୟକଳାପ ବଢ଼ୁଛି କି?
ପୂର୍ବରୁ ପ୍ଲାଣ୍ଟ କରାଯାଇଥିବା IED ଏବେ ମଧ୍ୟ ଘାତକ ହୋଇ ରହିଛି କି?
ସର୍ଚ୍ଚ ଅପରେସନ ସମୟରେ ସୁରକ୍ଷାରେ କୌଣସି ତ୍ରୁଟି ହୋଇଥିଲା କି? ଇତ୍ୟାଦି ନେଇ ପ୍ରଶ୍ନବାଚୀ ସୃଷ୍ଟି ହେଉଛି ଓ ସତର୍କତ୍ତା ଅବଲମ୍ବନ ସହ ଗୁଇନ୍ଦା ତତ୍ୱକୁ ଅଧିକ କ୍ରିୟାଶୀଳ କରିବା ପାଇଁ ମତ ପ୍ରକାଶ ପାଇଛି।
