ନୂଆଦିଲ୍ଲୀ,୪ା୪: ସମୀର ରିଜ୍ଭୀଙ୍କ ବିସ୍ଫୋରକ ବ୍ୟାଟିଂ ବଳରେ ଦିଲ୍ଲୀ କ୍ୟାପିଟାଲ୍ସ (ଡିସି) ଶନିବାର ଅପରାହ୍ନରେ ଖେଳାଯାଇଥିବା ଆଇପିଏଲ୍ ମ୍ୟାଚ୍ରେ ମୁମ୍ୱାଇ ଇଣ୍ଡିଆନ୍ସ (ଏମ୍ଆଇ)କୁ ୬ ଉଇକେଟରେ ପରାସ୍ତ କରିଛି। ଏହା ଦିଲ୍ଲୀର କ୍ରମାଗତ ଦ୍ୱିତୀୟ ବିଜୟ ହୋଇଥିବା ବେଳେ ମୁମ୍ୱାଇର ଏହା ପ୍ରଥମ ପରାଜୟ।
ପାଇ ବ୍ୟାଟିଂ କରିଥିବା ମୁମ୍ୱାଇ ଆରମ୍ଭରୁ ରିଆନ ରିକଲଟନ(୯) ଓ ତିଲକ ବର୍ମା(୦)ଙ୍କ ଉଇକେଟ ହରାଇଥିଲା। ଭେଟେରାନ ଓପନର ରୋହିତ ଶର୍ମା କାମଚଳା ଅଧିନାୟକ ସୂର୍ଯ୍ୟକୁମାର ଯାଦବଙ୍କ ସହ ମିଶି ତୃତୀୟ ଉଇକେଟରେ ୫୩ ରନ ଯୋଡ଼ିଥିଲେ। ଏହାପରେ ଦଳ କ୍ରମାଗତ ବ୍ୟବଧାନରେ ରୋହିତ (୨୬ ବଲ, ୩୫ ରନ, ୫ ଚୌକା ଓ ୧ ଛକା), ଶେର୍ଫାନେ ରଦରଫୋର୍ଡ (୫) ଓ ସୂର୍ଯ୍ୟକୁମାର (୩୬ ବଲ ୫୧ ରନ, ୩ ଚୌକା ଓ ୨ ଛକା)ଙ୍କ ଉଇକେଟ ହରାଇଥିଲା। ଶେଷ ଆଡ଼କୁ ନମନ ଧୀର ୨୮ (୨ ଚୌକା ଓ ୧ ଛକା) ଓ ମିଚେଲ ସାଣ୍ଟନର ୧୮(୨ ଚୌକା) ରନ କରିଥିଲେ। ଫଳରେ ମୁମ୍ୱାଇ ୨୦ ଓଭରରେ ୬ ଉଇକେଟ ହରାଇ ୧୬୨ ରନ କରିଥିଲା।
ଜବାବରେ ଦିଲ୍ଲୀ ମାତ୍ର ୭ ରନ ମଧ୍ୟରେ ଲୋକେଶ ରାହୁଲ (୧) ଓ ନୀତୀଶ ରାଣା (୦)ଙ୍କ ଉଇକେଟ ହରାଇଥିଲା। ଅନ୍ୟତମ ଓପନର ପଥୁମ ନିଶଙ୍କା ଓ ସମୀର ରିଜ୍ଭୀ ଦାୟିତ୍ୱ ସମ୍ଭାଳିଥିଲେ। ଦୁହେଁ ୬୬ ରନ ଯୋଡ଼ି ଦଳୀୟ ସ୍କୋରକୁ ଆଗେଇ ନେଇଥିଲେ। ଆଟାକିଂ ବ୍ୟାଟିଂ କରୁଥିବା ନିଶଙ୍କା ୩୦ ବଲରେ ୪୪ (୬ ଚୌକା ଓ ୧ ଛକା) ରନ କରି ଦଶମ ଓଭରରେ ମିଚେଲ ସାଣ୍ଟନରଙ୍କ ବଲରେ ଆଉଟ୍ ହୋଇଥିଲେ। ଏହିଠାରୁ ରିଜ୍ଭୀ ଆଟାକିଂ ବ୍ୟାଟିଂ କରିଥିବା ବେଳେ ଡେଭିଡ୍ ମିଲର ତାଙ୍କୁ ଆବଶ୍ୟକୀୟ ସମର୍ଥନ ପ୍ରଦାନ କରିଥିଲେ। ଦୁଇ ବ୍ୟାଟର ଚତୁର୍ଥ ଉଇକେଟରେ ୩୯ ବଲରେ ୭୮ ରନ ଯୋଡ଼ି ଦଳର ବିଜୟ ନିଶ୍ଚିତ କରିଥିଲେ। ରିଜ୍ଭୀ ୫୧ ବଲରେ ୭ ଲେଖାଏ ଚୌକା ଓ ଛକା ସହିତ ୯୦ ରନ କରି ଆଉଟ୍ ହୋଇଥିଲେ। ଏହା ତାଙ୍କର ଲଗାତର ଦ୍ୱିତୀୟ ଅର୍ଦ୍ଧଶତକ। ଏହାପରେ ମିଲର (୨୧ ରନ, ୪ ଚୌକା) ଓ ଟ୍ରିଷ୍ଟାନ ଷ୍ଟବ୍ସ (୩) ଅପରାଜିତ ରହି ମ୍ୟାଚ୍ ଫିନିଶ କରିଥିଲେ। ଦିଲ୍ଲୀ ୧୮.୧ ଓଭରରେ ୪ ଉଇକେଟ ହରାଇ ୧୬୪ ରନ କରି ନେଇଥିଲା।
