ବାଙ୍ଗାଲୋର,୧।୩ : ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର (ଆରସିବି) ଓପନର ତଥା କର୍ନାଟକ ବ୍ୟାଟ୍ସମ୍ୟାନ ଦେବଦତ୍ତ ପାଡିକଲ ଏବେ ଚମତ୍କାର ଫର୍ମରେ। ଚଳିତ ବିଜୟ ହଜାରେ ଟ୍ରଫିରେ ଜାରି ରହିଛି ତାଙ୍କ ଶତକ ଧାରା। ଓଡ଼ିଶା ବିପକ୍ଷରେ ୧୫୨ ଓ କେରଳ ବିପକ୍ଷରେ ୧୨୬* ରନ୍ ପାଳି ଖେଳିଥିବା ପାଡିକଲ ପୁଣି ଥରେ ଖେଳିଛନ୍ତି ଶତକୀୟ ଇନିଂସ। ରେଲ୍ଓ୍ବେ ବିପକ୍ଷରେ ରବିବାର ଅନୁଷ୍ଠିତ ମ୍ୟାଚ୍ରେ ପାଡିକଲ ୧୪୫ ରନ୍ର ଅପରାଜିତ ପାଳି ଖେଳିଛନ୍ତି। ୧୨୫ ବଲର ସମ୍ମୁଖୀନ ହୋଇଥିବା ଏହି ବାମହାତୀ ବ୍ୟାଟ୍ସମ୍ୟାନଙ୍କ ଇନିଂସରେ ସାମିଲ ଥିଲା ୯ ଲେଖାଏ ଛକା ଓ ଚୌକା।
୨୦ ବର୍ଷୀୟ ବ୍ୟାଟ୍ସମ୍ୟାନଙ୍କ ସମ୍ପୂର୍ଣ୍ଣ ସହଯୋଗ ଦେଇଥିଲେ ଅଧିନାୟକ ରବିକୁମାର ସମର୍ଥ (୧୩୦*)। ଦୁଇ ଓପନରଙ୍କ ଶତକୀୟ ଇନିଂସ ଯୋଗୁ ରେଲଓ୍ବେ ପକ୍ଷରୁ ଧାର୍ଯ୍ୟ ୨୮୫ ରନ୍ର ବିଜୟ ଲକ୍ଷ୍ୟକୁ କର୍ନାଟକ ୪୦.୩ ଓଭରରେ ହାସଲ କରିନେଇଥିଲା। ଏହି ବିଜୟ ସହ କର୍ନାଟକ ସ୍ଥାନ ପକ୍କା କରିଛି କ୍ୱାର୍ଟର ଫାଇନାଲରେ। ଉଲ୍ଲେଖଥାଉ କି, ଚଳିତ ବିଜୟ ହଜାରେ ଟ୍ରଫିରେ ଏପର୍ଯ୍ୟନ୍ତ ୫ ମ୍ୟାଚ୍ ଖେଳିଥିବା ପାଡିକାଲ ୫୭୨ ରନ୍ କରିସାରିଲେଣି। ଏଥିରେ ଦୁଇଟି ଅର୍ଦ୍ଧଶତକୀୟ ଇନିଂସ ମଧ୍ୟ ରହିଛି।
