ନାଗପୁର,୧୭।୧: କେନ୍ଦ୍ର ସରକାରଙ୍କ ନୂଆ କୃଷି ଆଇନ ବିରୋଧରେ ଚାଲିଥିବା ଚାଷୀ ଆନ୍ଦୋଳନ ୨୦୨୪ ମେ’ ପର୍ଯ୍ୟନ୍ତ ଜାରି ରହିବ। ଏଥି ନେଇ ସମ୍ପୂର୍ଣ୍ଣ ପ୍ରସ୍ତୁତ ଅଛନ୍ତି ଆନ୍ଦୋଳନରତ କୃଷକମାନେ। ଏଭଳି ମନ୍ତବ୍ୟ ଦେଇ କେନ୍ଦ୍ର ସରକାରଙ୍କୁ ଚେତାବନୀ ଦେଇଛନ୍ତି ଭାରତୀୟ କିଷାନ ୟୁନିୟନ (କିକେୟୁ) ନେତା ରାକେଶ ଟିକାଇଟ୍।
ନାଗପୁରଠାରେ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ କୃଷକ ଆନ୍ଦୋଳନ କେତେ ଦିନ ଚାଲିବ ବୋଲି ପ୍ରଶ୍ନ କରାଯାଇଥିଲା। ଏହାର ଉତ୍ତରରେ ଟିକାଇଟ୍ କହିଛନ୍ତି, ଯଦି ନୂଆ ଆଇନ ପ୍ରତ୍ୟାହାର ନ କରାଯାଏ, ତେବେ ୨୦୨୪ ମେ ପର୍ଯ୍ୟନ୍ତ ଆନ୍ଦୋଳନ ଜାରି ରହିବ। ଚାଷୀମାନେ ଏଥି ପାଇଁ ପ୍ରସ୍ତୁତ ଅଛନ୍ତି। ସରକାର ଜିଦ୍ ଧରି ବସିଲେ, ଆନ୍ଦୋଳନ ଚାଲିବ। ଆମେ ଏମ୍ଏସ୍ପି ଉପରେ ଆଇନଗତ ଗ୍ୟାରେଣ୍ଟି ଚାହୁଁ। ଆଇନ ପ୍ରତ୍ୟାହାର ପୂର୍ବରୁ ଆମେ ଆନ୍ଦୋଳନ ସ୍ଥଳରୁ ଫେରି ଆସୁ ଚାଷୀମାନେ ଚାହୁଁ ନାହାନ୍ତି। ଉଲ୍ଲେଖଥାଉ କି, ୨୦୨୪ ଏପ୍ରିଲ-ମେ’ ମଧ୍ୟରେ ସାଧାରଣ ଲୋକସଭା ନିର୍ବାଚନ ହେବାର ଅଛି।
କୃଷକମାନେ ଗତ ବର୍ଷ ନଭେମ୍ବର ୨୦ ତାରିଖରୁ ଦିଲ୍ଲୀର ବିଭିନ୍ନ ସୀମାରେ ଆନ୍ଦୋଳନ କରୁଛନ୍ତି। ସରକାରଙ୍କ ଅନୁଯାୟୀ, ନୂଆ ଆଇନ କାର୍ଯ୍ୟକାରୀ ହେଲେ ଦଲାଲ ନୀତି ବିଲୋପ ଘଟିବ। ଆଉ ଚାଷୀମାନେ ଦେଶର ଯେକୌଣସି ସ୍ଥାନରେ ତାଙ୍କ ଶସ୍ୟ ବିକ୍ରି କରିପାରିବେ।
