ନୂଆଦିଲ୍ଲୀ: ଦେଶର ପୁଞ୍ଜିବଜାର କାରବାର ସୋମବାର ରେକର୍ଡ ସ୍ତରରେ ରହିଛି। ଉଭୟ ବମ୍ବେ ଷ୍ଟକ୍ ଏକ୍ସଚେଞ୍ଜ(ବିଏସ୍ଇ) ଏବଂ ନ୍ୟାଶନାଲ ଷ୍ଟକ୍ ଏକ୍ସଚେଞ୍ଜ(ଏନ୍ଏସ୍ଇ) ଉଚ୍ଚ ରେକର୍ଡ ସ୍ତରରେ ବନ୍ଦ ହୋଇଛି। ଘରୋଇ ପୁଞ୍ଜିବଜାରକୁ ବିଦେଶୀ ପୁଞ୍ଜି ପ୍ରବାହ ଉନ୍ନତ ହେବାରୁ ଷ୍ଟକ୍ ବଜାରରେ ଏହାର ଉତ୍ସାହ ପରିଲକ୍ଷିତ ହୋଇଛି। ଦିନ ମଧ୍ୟରେ ସେନ୍ସେକ୍ସ ୪୫,୪୫୯ ପଏଣ୍ଟ ସ୍ତର ଛୁଇଁଥିଲା। ୩୦ ଶେୟାର ବିଶିଷ୍ଟ ବମ୍ବେ ଷ୍ଟକ୍ ଏକ୍ସଚେଞ୍ଜ ୩୪୭ ପଏଣ୍ଟ ବା ୦.୭୭% ଊର୍ଦ୍ଧ୍ୱରେ ରହି ୪୫,୨୨୭ ପଏଣ୍ଟରେ ବନ୍ଦ ହୋଇଛି। ସେହିଭଳି ନିଫ୍ଟି ୯୭ ପଏଣ୍ଟ ବା ୦.୭୩% ଉଚ୍ଚରେ ରହିବା ଯୋଗୁ ୧୩,୩୫୫ ସ୍ତରରେ ବନ୍ଦ ହୋଇଛି। ସେନ୍ସେକ୍ସରେ ଭଲ କାରବାର କରିଥିବା କମ୍ପାନୀ ମଧ୍ୟରେ ଓଏନ୍ଜିସି, ଭାରତୀ ଏୟାରଟେଲ, ହିନ୍ଦୁସ୍ଥାନ ୟୁନିଲିଭର, ଆଇଟିସି, ଏଚ୍ଡିଏଫସି ଏବଂ ଏସ୍ବିଆଇ ରହିଛି। ଏମାନଙ୍କ ଶେୟାର କାରବାର ପ୍ରାୟ ୩.୨୮% ବଢିଛି। ଅପରପକ୍ଷରେ କୋଟାକ ବ୍ୟାଙ୍କ, ନେସ୍ଲେ ଇଣ୍ଡିଆ, ବଜାଜ ଫାଇନାନ୍ସ, ମାରୁତି ଏବଂ ଏଚ୍ଡିଏଫ୍ସି ବ୍ୟାଙ୍କର ଶେୟାର କାରବାର ୧.୩୯% ଖସିଛି।
ଏନ୍ଏସ୍ଇ ପ୍ଲାଟ୍ଫର୍ମରେ ପିଏସ୍ୟୁ ବ୍ୟାଙ୍କ, ଫାର୍ମା, ମିଡିଆ ଏବଂ ଏଫ୍ଏମ୍ସିଜି ଶେୟାର ୨.୭୯% ବଢିଛି। ବଜାରର ଅଭିବୃଦ୍ଧି ପ୍ରତ୍ୟାବର୍ତ୍ତନ କରୁଥିବା ବେଳେ ଏହା ନିବେଶକଙ୍କ ମନରେ ନୂଆ ଆଶା ସଞ୍ଚାର କରିଛି। ସେହିଭଳି ଅଭିବୃଦ୍ଧିକୁ ଫେରାଇ ଆଣିବା ଲାଗି ରିଜର୍ଭ ବ୍ୟାଙ୍କର ପଦକ୍ଷେପ ଉପରେ ନିବେଶ ବେଶ ଆଶାବାଦୀ ରହିଛନ୍ତି। ବଜାରରେ ନକାରାତ୍ମକ ପ୍ରଭାବ କମ୍ ରହିବା ଯୋଗୁ ନିବେଶକମାନେ ନିବେଶ ନେଇ ବେଶ୍ ଆଗଭର ହେଉଛନ୍ତି। ବିଦେଶୀ ନିବେଶକମାନେ ବଜାରରେ ନେଟ୍ ନିବେଶରେ ଉନ୍ନତ ସ୍ଥାନରେ ରହିଛନ୍ତି। ଏମାନେ ଶୁକ୍ରବାର ୨,୯୬୯ କୋଟି ଟଙ୍କା ନିବେଶ କରିଛନ୍ତି।
