ନୂଆଦିଲ୍ଲୀ: ଗତ କିଛିଦିନ ଧରି ଦେଶର ପୁଞ୍ଜିବଜାରରେ କାରବାର ଉନ୍ନତ ସ୍ଥିତିରେ ରହିଥିଲା। ଗୁରୁବାର ଏଥିରେ ପ୍ରଭାବ ଦେଖାଯାଇଛି। ଏହି ସମୟରେ ବମ୍ବେ ଷ୍ଟକ୍ ଏକ୍ସଚେଞ୍ଜର ସେନ୍ସେକ୍ସ ୫୮୦ ପଏଣ୍ଟ (୧.୩୧%) ଖସିବା ଯୋଗୁ କାରବାର ୪୩,୬୦୦ ପଏଣ୍ଟ ସ୍ତରରେ ବନ୍ଦ ହୋଇଛି। ସେହିଭଳି ନ୍ୟାଶନାଲ ଷ୍ଟକ୍ ଏକ୍ସଚେଞ୍ଜର ନିଫ୍ଟି ୧୬୭ ପଏଣ୍ଟ(୧.୨୯%) ନିମ୍ନରେ ରହି ୧୨,୭୭୨ ପଏଣ୍ଟରେ ବନ୍ଦ ରହିଛି। ବିଶ୍ୱ ବଜାରରେ କାରବାର ପ୍ରଭାବିତ ରହିବାରୁ ବ୍ୟାଙ୍କିଙ୍ଗ୍ ଏବଂ ଫାଇନାନ୍ସ ଷ୍ଟକ୍ କାରବାର ନିମ୍ନରେ ରହିଛି। ଏସ୍ବିଆଇ, ଆଇସିଆଇସିଆଇ ବ୍ୟାଙ୍କ, ଆକ୍ସିସ ବ୍ୟାଙ୍କ, ଅଲଟ୍ରା ସେମ୍କୋ, ବଜାଜ ଫାଇନାନ୍ସ, ଏଚ୍ଡିଏଫ୍ସି ବ୍ୟାଙ୍କ ଏବଂ ଭାରତୀ ଏୟାରଟେଲ ଭଳି କମ୍ପାନୀ ସେନ୍ସେକ୍ସରେ କାରବାର କ୍ଷତି ସହିଛନ୍ତି। ଏହାବାଦ ପାଓ୍ବାରଗ୍ରୀଡ୍, ଆଇଟିସି, ଏନ୍ଟିପିସି, ଟାଟା ଷ୍ଟିଲ, ଟିସିଏସ୍ ଏବଂ ଟାଇଟାନ ଭଳି କମ୍ପାନୀ ଭଳି କମ୍ପାନୀର ଶେୟାର କାରବାର ବେଶ୍ ଉନ୍ନତ ରହିଛି। ଏନ୍ଏସ୍ଇ ପ୍ଲାଟ୍ଫର୍ମରେ ରାଷ୍ଟ୍ରାୟତ୍ତ ବ୍ୟାଙ୍କ, ଘରୋଇ ବ୍ୟାଙ୍କ ଏବଂ ଫାଇନାନ୍ସିଆଲ ସର୍ଭିସ ଶେୟାର କାରବାର ପ୍ରାୟ ୩%ରୁ ଊର୍ଦ୍ଧ୍ୱ ଖସିଛି। ଆମେରିକା ଏବଂ ୟୁରୋପରେ କରୋନା ଭାଇରସ୍ ପ୍ରଭାବ ରହିବା ଯୋଗୁ ଏହାର ପ୍ରଭାବ ସେଠାକାର ଶେୟାର ବଜାରଗୁଡିକରେ ପଡିଛି।
