ଦୁବାଇ,୨୯।୧୦(ପି.ଟି.): ଅଭିଜ୍ଞ ଉଇକେଟକିପର ବ୍ୟାଟ୍ସମ୍ୟାନ ରିଦ୍ଧିମାନ ଶାହା ଗ୍ରୋନ୍ ଇଞ୍ଜୁରିର ଶିକାର ହୋଇଛନ୍ତି। ତେବେ ଏହା ସେତେଟା ଗୁରୁତର ନୁହେଁ। କିନ୍ତୁ ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍) ଫ୍ରାଞ୍ଚାଇଜ ସନରାଇଜର୍ସ ହାଇଦ୍ରାବାଦ ତାଙ୍କ ଇଞ୍ଜୁରି ସମସ୍ୟା ନେଇ କାଳକ୍ଷେପଣ ନୀତି ଅବଲମ୍ବନ କରିଛି। ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ମେଡିକାଲ ଟିମ୍ ସହିତ ଆଲୋଚନା ପରେ ଯାହା କିଛି ନିଷ୍ପତ୍ତି ନିଆଯିବ। ଆଇପିଏଲ୍ ପରେ ରିଦ୍ଧିମାନ ଦଳ ସହ ଅଷ୍ଟ୍ରେଲିଆ ଗସ୍ତ କରିବା କାର୍ଯ୍ୟକ୍ରମ ରହିଛି। ତେଣୁ ତରବର ଭାବେ କୌଣସି ନିଷ୍ପତ୍ତି ନେବାକୁ ଚାହୁଁନାହୁଁ ବୋଲି ଫ୍ରାଞ୍ଚାଇଜ୍ ତରଫରୁ କୁହାଯାଇଛି।
ଗତ ମ୍ୟାଚ୍ରେ ଦିଲ୍ଲୀ କ୍ୟାପିଟାଲ୍ସ ବିପକ୍ଷରେ ମଙ୍ଗଳବାର ରିଦ୍ଧିମାନ ୪୫ ବଲରୁ ୮୭ ରନର ଦ୍ରୁତ ଅର୍ଦ୍ଧଶତକୀୟ ପାଳି ଖେଳିଥିଲେ ଓ ଏହି ଅବସରରେ ସେ ଆହତ ହୋଇଥିଲେ। ଫଳରେ ସେ ଉଇକେଟକିପିଂ କରି ନ ଥିଲେ। ତାଙ୍କ ବଦଳରେ ଶ୍ରୀବତ୍ସ ଗୋସ୍ବାମୀ ଏହି ଦାୟିତ୍ୱ ତୁଲାଇଥିଲେ। ଏହି ଇଞ୍ଜୁରି ସେତେଟା ଗୁରୁତର ନୁହେଁ ବୋଲି ତାଙ୍କ ଅଧିନାୟକ ଡେଭିଡ୍ ଓ୍ବାର୍ନର କହିଛନ୍ତି। କେତେଜଣ ଜାତୀୟ ଖେଳାଳିଙ୍କ ଇଞ୍ଜୁରି ନେଇ ସତର୍କ ରହିବାକୁ ବିସିସିଆଇ ଫ୍ରାଞ୍ଚାଇଜ୍ଗୁଡୁକୁ ପରାମର୍ଶ ଦେଇଛି। ଆଉ ୩ ଦିନ ପରେ ହାଇଦ୍ରାବାଦ ତା’ର ପରବର୍ତ୍ତୀ ମ୍ୟାଚ୍ ଖେଳିବ। ତେଣୁ ଏବେଠାରୁ କିଛି କହିବା ଠିକ୍ ହେବ ନାହିଁ ବୋଲି ବୋର୍ଡର ଜଣେ ବରିଷ୍ଠ ଅଧିକାରୀ କହିଛନ୍ତି। ଖୁବ୍ଶୀଘ୍ର ଇଞ୍ଜୁରିରୁ ମୁକ୍ତ ହେବି ବୋଲି ରିଦ୍ଧିମାନ କହିଛନ୍ତି। ଓ୍ବାର୍ନରଙ୍କ କହିବା ଅନୁସାରେ ବ୍ୟାଟିଂ କରିଥିଲି ଓ ଏହା ଶେଷରେ କାମ ଦେଲା ସେ କହିଛନ୍ତି।
