ଦୁବାଇ, ୩୧।୮: ଇଣ୍ଡିଆନ୍ ପ୍ରିମିୟର ଲିଗ୍ (ଆଇପିଏଲ୍)ର ତ୍ରୟୋଦଶ ସଂସ୍କରଣ ସେପ୍ଟେମ୍ବର ୧୯ରୁ ୟୁଏଇରେ ଆରମ୍ଭ ହେବ। ଚଳିତ ବର୍ଷ କରୋନା ମହାମାରୀ ଲାଗି ଆଇପିଏଲ୍ ଭାରତ ପରିବର୍ତ୍ତେ ୟୁଏଇରେ ଖେଳାଯିବ। ବିଶ୍ୱର ଅନ୍ୟତମ ବିସ୍ଫୋରକ ବ୍ୟାଟ୍ସମ୍ୟାନ ଦକ୍ଷିଣ ଆଫ୍ରିକାର ଏବି ଡି ଭିଲର୍ସ ପୁଣିଥରେ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର (ଆର୍ସିବି) ପକ୍ଷରୁ ଖେଳୁଥିବାର ନଜରକୁ ଆସିବେ। କରୋନା ମହାମାରୀ ଲାଗି ୫ ମାସ ଧରି କ୍ରିକେଟ୍ରୁ ଦୂରେଇ ରହିବା ପରେ ୩୬ ବର୍ଷୀୟ ଡି ଭିଲର୍ସ ପୁଣିଥରେ ପଡ଼ିଆକୁ ପ୍ରତ୍ୟାବର୍ତ୍ତନ କରିଛନ୍ତି। ବାଙ୍ଗାଲୋରର ଅଭ୍ୟାସ ସେସନରେ ଡି ଭିଲର୍ସ ନେଟ୍ସରେ ବ୍ୟାଟିଂ ଅଭ୍ୟାସ କରିଥିବା ଦେଖିବାକୁ ମିଳିଛି। କଠିନ ଉଇକେଟ୍ରେ ଅଭ୍ୟାସ କରିବା ଆହ୍ବାନପୂର୍ଣ୍ଣ ଥିଲା ବୋଲି ଡି ଭିଲର୍ସ ନେଟ୍ସ ପରେ କହିଛନ୍ତି। ବ୍ୟାଟିଂ ସମେତ ଏହି ଡାହାଣହାତୀ ବ୍ୟାଟ୍ସମ୍ୟାନ ମଧ୍ୟ କିଛି ସମୟ ଉଇକେଟ୍କିପିଂ ଉପରେ ଗୁରୁତ୍ୱ ଦେଇଥିଲେ। ଏଠାରେ ପ୍ରକାଶଯୋଗ୍ୟ, ୟୁଏଇରେ ପହଞ୍ଚିବା ପରେ ଡି ଭିଲର୍ସ ୬ ଦିନ କ୍ୱାରାଣ୍ଟାଇନରେ ରହିଥିଲେ। ଏହାରି ମଧ୍ୟରେ ତାଙ୍କର ୩ଥର କରୋନା ଟେଷ୍ଟ କରାଯାଇଥିଲା। ଯାହାର ରିପୋର୍ଟ ନେଗେଟିଭ ଆସିବା ପରେ ସେ ନେଟ୍ସକୁ ଓହ୍ଲାଇଥିଲେ। ଏହି ଅଭ୍ୟାସ ସେସନରେ ଡି ଭିଲର୍ସଙ୍କ ସମେତ ପାର୍ଥତ୍ବ ପଟେଲ, ଉମେଶ ଯାଦବ, ଗୁର୍କୀରଟ୍ ସିଂ ପ୍ରମୁଖ ଅଂଶଗ୍ରହଣ କରିଥିଲେ।
