ନୂଆଦିଲ୍ଲୀ, ୬।୭- ଭାରତୀୟ କ୍ରିକେଟ୍ରେ ସଚିନ ତେନ୍ଦୁଲକର ଓ ସୌରଭ ଗାଙ୍ଗୁଲି ଓପନିଂ ଯୋଡ଼ିରେ ଯେଉଁ ସଫଳତା ପାଇଛନ୍ତି ତାହା ଆଉ କୌଣସି ପ୍ରାରମ୍ଭିକ ଯୋଡ଼ିଙ୍କୁ ମିଳିନି କହିଲେ କିଛି ଅତ୍ୟୁକ୍ତି ହେବ ନାହିଁ। ୧୯୯୬ରୁ ୨୦୦୭ ପର୍ଯ୍ୟନ୍ତ ସଚିନ ଓ ସୌରଭ ଯୋଡ଼ି ଦେଶ ପାଇଁ ୧୩୬ ଇନିଂସରେ ଓପନିଂ କରିଛନ୍ତି। ଏହି ଯୋଡ଼ି ଓପନିଂରେ ୪୯ରୁ ଊର୍ଦ୍ଧ୍ୱ ଆଭରେଜରେ ୬ ହଜାର ୬୦୯ ରନ୍ ମଧ୍ୟ ସଂଗ୍ରହ କରିଛନ୍ତି। ଯାହାକି ତାଙ୍କୁ ବିଶ୍ୱର ଅନ୍ୟତମ ସଫଳ ଓପନିଂ ଯୋଡ଼ିର ମାନ୍ୟତା ଦେଇଛି। କିନ୍ତୁ ଗ୍ଲେନ ମ୍ୟାକ୍ଗ୍ରା, ସେନ୍ ଓ୍ବର୍ଣ୍ଣ, ସୋଏବ ଅଖତରଙ୍କ ପରି ବୋଲରଙ୍କୁ ସାମ୍ନା କରି ରେକର୍ଡ ଭରା ଇନିଂସ ଖେଳିଥିବା ସଚିନ କେବେ ମଧ୍ୟ ଇନିଂସର ପ୍ରଥମ ବଲ୍ ଖେଳି ନ ଥାନ୍ତି। ସଚିନ ସର୍ବଦା ଗାଙ୍ଗୁଲିଙ୍କୁ ଇନିଂସର ପ୍ରଥମ ବଲ୍ ଖେଳିବା ପାଇଁ ବାଧ୍ୟ କରିଥାନ୍ତି। ଇନିଂସର ପ୍ରଥମ ବଲ୍ ସାମ୍ନା କରିବାକୁ ସଚିନ କାହିଁକି ମନା କରିଥାନ୍ତି ତାହାର ଗୁମର ଖୋଲିଛନ୍ତି ଗାଙ୍ଗୁଲି।
ଭାରତୀୟ ବ୍ୟାଟ୍ସମ୍ୟାନ ମୟଙ୍କ ଅଗ୍ରଓ୍ବାଲ ଓ ସୌରଭଙ୍କ ମଧ୍ୟରେ ହୋଇଥିବା ଏକ ବାର୍ତ୍ତାଳପ ସମୟରେ ଏହି ଘଟଣା ଉପରୁ ପରଦା ଉଠିଛି। ଏହି ବାର୍ତ୍ତାଳପ ସମୟରେ ମୟଙ୍କ ପଚାରିଥିଲେ, ‘ଦିନିକିଆରେ ଯେତେବେଳେ ଓପନିଂ କରିବାକୁ ଯାଇଥାଅ ସେତେବେଳେ ସଚିନ ପାଜି କଣ ପ୍ରଥମ ବଲ୍ ଷ୍ଟ୍ରାଇକ୍ କରିବାକୁ ତୁମକୁ ବାଧ୍ୟ କରିଥାନ୍ତି?’ ଏହାର ଉତ୍ତରରେ ଗାଙ୍ଗୁଲି କହିଥିଲେ, ‘ସବୁବେଳେ ସେ (ସଚିନ) ଏମିତି କରିଥାନ୍ତି। ବେଳେବେଳେ ମୁଁ ତାଙ୍କୁ ମଧ୍ୟ କହିଥାଏ ଯେ ତୁମେ ମଧ୍ୟ କେବେ ପ୍ରଥମ ବଲ୍ ସାମ୍ନା କର। ଯାହାର ସଚିନ ୨ଟା ଉତ୍ତର ରଖିଥାନ୍ତି।’ ପ୍ରଥମେ ସଚିନ କୁହନ୍ତି ‘ବର୍ତ୍ତମାନ ସେ ଭଲ ଫର୍ମରେ ରହିଛନ୍ତି। ଏହି ଫର୍ମକୁ ବଜାୟ ରଖିବା ଲାଗି ତାଙ୍କୁ ନନ୍ ଷ୍ଟ୍ରାଇକରେ ରହିବା ଆବଶ୍ୟକ।’ ସେହିଭଳି ଯେତେବେଳେ ସଚିନ ଖରାପ ଫର୍ମରେ ଥାନ୍ତି କହିଥାନ୍ତି ‘ଚାପ ହଟାଇବା ଲାଗି ତାଙ୍କୁ ନନ୍ ଷ୍ଟ୍ରାଇକରେ ରହିବା ଉଚିତ’। ତେବେ ଗାଙ୍ଗୁଲି ବେଳେବେଳେ କିଛି କୌଶଳ ଅବଲମ୍ବନ କରିଥାନ୍ତି ଯାହା ଫଳରେ ସଚିନ ବାଧ୍ୟ ହୋଇ ଇନିଂସର ପ୍ରଥମ ବଲ୍ ସାମ୍ନା କରିଥାନ୍ତି। ଗାଙ୍ଗୁଲି କହିଛନ୍ତି, ‘ଥରେ ଦୁଇଥର ତାଙ୍କୁ (ସଚିନ) ଆଗୁଆ ଅତିକ୍ରମ କରି ମୁଁ ନନ୍ ଷ୍ଟ୍ରାଇକରେ ଛିଡ଼ା ହୋଇଯାଇଥାଏ। ସେତେବେଳେ ବାଧ୍ୟ ହୋଇ ସଚିନ ଇନିଂସର ପ୍ରଥମ ବଲ୍ ସାମ୍ନା କରିଥାନ୍ତି। କାହିଁକି ନା ଟିଭି କ୍ୟାମେରା ତାଙ୍କ ଉପରେ ପଡ଼ୁଥାଏ।’
