ନୂଆଦିଲ୍ଲୀ, ୧୪ା୫ (ପି.ଟି.)-ଚଳିତ ବର୍ଷରୁ ଅର୍ଜୁନ ପୁରସ୍କାର ପାଇଁ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ଜାତୀୟ ଦଳର ପ୍ରମୁଖ ପେସ୍ ବୋଲର ଯଶପ୍ରୀତ୍ ବୁମ୍ରାଙ୍କ ନାମ ସୁପାରିସ କରିବାର ଯଥେଷ୍ଟ ସମ୍ଭାବନା ରହିଛି। ଗୁଜରାଟର ଏହି କ୍ରିକେଟର ୪ବର୍ଷ ହେଲା ଜବରଦସ୍ତ ପ୍ରଦର୍ଶନ କରି ଆସୁଥିବାରୁ ତାଙ୍କୁ ସବୁଠାରୁ ଯୋଗ୍ୟ ପ୍ରାର୍ଥୀ ବିବେଚନା କରାଯାଉଛି। ବିସିସିଆଇ ଯଦି ପୁରୁଷ ବିଭାଗରେ ଏକାଧିକ ନାମ ସୁପାରିସ କରେ ତେବେ ଓପନର ଶିଖର ଧାଓ୍ବନଙ୍କୁ ପ୍ରାର୍ଥୀ କରିପାରେ। ବୋର୍ଡ ୨୦୧୮ରେ ଧାଓ୍ବନଙ୍କ ନାମ ପଠାଇଥିଲା, ମାତ୍ର ସେ ପୁରସ୍କାର ପାଇଁ ବିବେଚିତ ହୋଇପାରି ନ ଥିଲେ। ଗତବର୍ଷ ଆମେ ପୁରୁଷ ବିଭାଗରେ ବୁମ୍ରା, ରବୀନ୍ଦ୍ର ଜାଡେଜା ଓ ମହମ୍ମଦ ଶାମିଙ୍କ ନାମ ସୁପାରିସ କରିଥିଲୁ। ପୁରସ୍କାର ପାଇଁ ଉଚ୍ଚସ୍ତରରେ ୩ ବର୍ଷର ପ୍ରଦର୍ଶନକୁ ମାନଦଣ୍ଡ କରାଯାଇଥିବାରୁ ବୁମ୍ରାଙ୍କ ନାମ କାଟ୍ ଖାଇଯାଇଥିଲା। କାରଣ ସେତେବେଳେକୁ ଅନ୍ତର୍ଜାତୀୟ କ୍ରିକେଟରେ ତାଙ୍କର ମାତ୍ର ୨ ବର୍ଷ ପୂରଣ ହୋଇଥିଲା। ଜାଡେଜା ତାଙ୍କଠାରୁ ସିନିୟର ରହିଥିବାବେଳେ ବହୁ ବର୍ଷ ହେଲା ସ୍ଥିର ପ୍ରଦର୍ଶନ କରି ଆସୁଥିବାରୁ ତାଙ୍କୁ ଅର୍ଜୁନ ପୁରସ୍କାର ମିଳିଥିଲା। ୨୬ ବର୍ଷୀୟ ବୁମ୍ରା ୧୪ଟି ଟେଷ୍ଟ ମ୍ୟାଚରେ ୬୮ ଉଇକେଟ ଅକ୍ତିଆର କରିଥିବାବେଳେ ୬୪ ଅନ୍ତର୍ଜାତୀୟ ଦିନିକିଆରୁ ୧୦୪ ଉଇକେଟ ଏବଂ ୫୦ ଅନ୍ତର୍ଜାତୀୟ ଟି୨୦ରୁ ୫୯ ଉଇକେଟ ହାସଲ କରିସାରିଛନ୍ତି। ସେ ଏକଦା ଆଇସିସିର ନମ୍ବର ଓ୍ବାନ ଅନ୍ତର୍ଜାତୀୟ ଦିନିକିଆ ବୋଲର ବିବେଚିତ ହୋଇଥିଲେ। ଏସିଆର ଏକମାତ୍ର ବୋଲର ଭାବେ ଦକ୍ଷିଣ ଆଫ୍ରିକା, ଇଂଲଣ୍ଡ, ଅଷ୍ଟ୍ରେଲିଆ ଓ ଓ୍ବେଷ୍ଟଇଣ୍ଡିଜରେ ୫ ଉଇକେଟ ସଫଳତା ହାସଲ କରିପାରିଛନ୍ତି।
