ଭୁବନେଶ୍ୱର, ୨୬।୪(କ୍ରୀଡ଼ା ପ୍ରତିନିଧି)- ଓଡ଼ିଶାର ସଫଳ କରାଟେକାଙ୍କ ମଧ୍ୟରୁ ଅନ୍ୟତମ ହେଉଛନ୍ତି ଦିଲୀପ କୁମାର ଜେନା। ରାଜ୍ୟସ୍ତରରେ ପର୍ଯ୍ୟାପ୍ତ ସଫଳତା ସହିତ ଜାତୀୟ କରାଟେରେ ସ୍ବର୍ଣ୍ଣ, ରୌପ୍ୟ ଓ ବ୍ରୋଞ୍ଜ ପଦକ ହାସଲ କରି ନିଜ କ୍ୟାରିୟରକୁ ରୁଦ୍ଧିମନ୍ତ କରିଥିବା ଦିଲୀପ ଅନ୍ତର୍ଜାତୀୟ ସ୍ତରରେ ସାଉଥ୍ ଏସିଆନ କରାଟେ ଚାମ୍ପିୟନଶିପ୍ରେ ମଧ୍ୟ ଏକ ରୌପ୍ୟ ପଦକ ହାସଲ କରିଛନ୍ତି। ଛୋଟ ବେଳରୁ ଉତ୍କଳ କରାଟେ ସ୍କୁଲରେ ଫିଟ୍ନେସ ଗୁରୁ ଡ. ହରିପ୍ରସାଦ ପଟ୍ଟନାୟକଙ୍କଠାରୁ କୋଚିଂ ନେଇ ଆଗକୁ ବଢ଼ିଥିବା ଏହି ଦୃଢ଼ ମନୋଭାବ ସମ୍ପନ୍ନ କରାଟେକା ଏବେ କରୋନା ଭାଇରସ୍ ସଂକ୍ରମଣ ଜନିତ ଲକ୍ଡାଉନ୍ ସ୍ଥିିତିରେ ଘରେ ରହିଛନ୍ତି। କୋଚ୍ ହରିପ୍ରସାଦଙ୍କଦ୍ୱାରା ଧାର୍ଯ୍ୟ କରାଯାଇଥିବା କାର୍ଯ୍ୟସୂଚୀ ଅନୁସାରେ ସେ ଘରେ ସୀମିତ ପରିବେଶ ମଧ୍ୟରେ ଟ୍ରେନିଂ ଜାରି ରଖିଥିବା ପ୍ରକାଶ କରିଛନ୍ତି। ୧୯୯୦ ଏପ୍ରିଲ ୧୫ରେ ଜନ୍ମିତ ଦିଲୀପଙ୍କ ମା’ ପ୍ରିୟାମଣି ଏବଂ ବାପା ହେଉଛନ୍ତି ନନ୍ଦକିଶୋର ଜେନା।
”ଲକ୍ଡାଉନ୍ ସ୍ଥିତିରେ ଏବେ ଅଭ୍ୟାସ ସ୍ଥଳ କରାଟେ ସ୍କୁଲକୁ ଯିବା ସମ୍ଭବ ହେଉନାହିଁ। ତେଣୁ ହରି ସାର୍ଙ୍କ ପରାମର୍ଶକ୍ରମେ ଘରେ ଯେତିକି ସମ୍ଭବ ସେତିକି ଟ୍ରେନିଂ କରି ନିଜକୁ ଫିଟ୍ ରଖୁଛି। ସକାଳେ କାର୍ଡିଓ (ସ୍କିପିଂ, ରନିଂ, ଷ୍ଟ୍ରେଚିଂ, କିକ୍) ଟ୍ରେନିଂ କରୁଛି। ଦିନବେଳା ବହି ପଢ଼ାପଢ଼ି କରି ସମୟ ବିତାଉଥିବାବେଳେ ଅପରାହ୍ନରେ ଫିଜିଓଥେରାପି (କାନ୍ଧର ଶକ୍ତି ବଢ଼ାଇବା ପାଇଁ ଷ୍ଟ୍ରେନ୍ଥ ଏକ୍ସରସାଇଜ୍) ଟ୍ରେନିଂ ସମ୍ପର୍କରେ ଆମକୁ ଯାହା ଶିଖା ଯାଇଥିଲା ତାହା ଅଭ୍ୟାସ କରୁଛି। ଟୁର୍ନାମେଣ୍ଟ ସମୟରେ ବାମ କାନ୍ଧରେ ଆଘାତ ପାଇଥିବାରୁ ମୁଁ ଚିକିତ୍ସା ପାଇଁ କଳିଙ୍ଗ ଷ୍ଟାଡିୟମରେ ଥିବା ଅଭିନବ ବିନ୍ଦ୍ରା ଟାର୍ଗେଟିଂ ପରଫରମାନ୍ସ ସେଣ୍ଟର(ଏବିଟିପି) ଯାଇଥିଲି। ତେଣୁ ଏବିଟିପିର ଡାକ୍ତର ଅନ୍ଲାଇନ୍ରେ ଯେଉଁ କୋର୍ ଟ୍ରେନିଂ କରାଇଥାଆନ୍ତି ସେହି ଅଭ୍ୟାସ ମୁଁ କରିିଥାଏ।ସନ୍ଧ୍ୟାରେ କମ୍ପ୍ୟୁଟରରେ କରାଟେର ପୁରୁଣା ଭିଡିଓ ଦେଖି ଟେକ୍ନିକ ସମ୍ପର୍କରେ ଜ୍ଞାନ ଆହରଣ କରୁଛି। ଅବସର ସମୟରେ ବହି (ୟୁ କ୍ୟାନ ୱିନ୍, ରିଚ୍ ଡାଡ୍-ପୁଅର ଡାଡ୍) ପଢ଼ୁଛି। ସବୁକିଛି ଚାଲିଥିଲେ ହେଁ ପ୍ରତି ମୁହୂର୍ତ୍ତରେ ଉତ୍କଳ କରାଟେ ସ୍କୁଲର ଅଭାବ ଅନୁଭବ ହେଉଛି। ସତେ ଯେପରି କେଉଁଠି ଫସିକି ରହିଯିବାପରି ଲାଗୁଛି ବୋଲି କହିଛନ୍ତି ଦିଲୀପ। ପୂର୍ବରୁ ପରିବାର ସହିତ ସମୟ କାଟିବା ସମ୍ଭବ ହେଉ ନ ଥିଲା।
