ଲଣ୍ଡନ, ୮ା୪ (ଏଏଫ୍ପି)- କରୋନା ଭାଇରସ୍ ମହାମାରୀ ବିରୋଧରେ ଚାଲିଥିବା ଲଢେଇରେ ସାମିଲ ହୋଇଛି ଫର୍ମୁଲାଓ୍ବାନ ଟିମ୍ ମର୍ସିଡିଜ୍। ଆସନ୍ତା ସପ୍ତାହରୁ ବ୍ରିଟେନର ଜାତୀୟ ସ୍ବାସ୍ଥ୍ୟ ସେବା ପାଇଁ ଶ୍ୱାସ ଉପକରଣ ଯୋଗାଇ ଦେବ। ଏହି ଉପକରଣଟିକୁ ଦି କଣ୍ଟିନ୍ୟୁଅସ୍ ପଜିଟିଭ ଏୟାରଓ୍ବେ ପ୍ରେସର (ସିପିିଏପି) ଡିଭାଇସ୍ କୁହାଯାଉଛି। ଫୁସ୍ଫୁସ୍ ସଂକ୍ରମଣ ଥିବା କରୋନା ଭାଇରସ ରୋଗୀଙ୍କ ଶ୍ୱାସ ପ୍ରକ୍ରିୟାକୁ ସହଜ କରିଥାଏ। ଏକ ସପ୍ତାହରୁ କମ୍ ସମୟ ମଧ୍ୟରେ ଏହା ପ୍ରସ୍ତୁତ ହୋଇ ପାରିଛି। ଲଣ୍ଡନରେ ରୋଗୀଙ୍କ କ୍ଷେତ୍ରରେ ଏହାର ବ୍ୟବହାର ଫଳପ୍ରଦ ହୋଇଛି। ବ୍ରିଟିଶ ସରକାର ଇତିମଧ୍ୟରେ ୧୦,୦୦୦ ଡିଭାଇସ୍ ପାଇଁ ଅର୍ଡର କରିଛନ୍ତି। ନର୍ଥହାମ୍ପଟନଶାୟାର ଅନ୍ତର୍ଗତ ବ୍ରିକ୍ସଓ୍ବର୍ଥସ୍ଥିତ ମର୍ସିଡିଜ୍ ଏଏମ୍ଜି ହାଇ ପରଫର୍ମାନ୍ସ ପାଓ୍ବାରଟ୍ରେନ୍ସ ଟେକ୍ନୋଲୋଜି ସେଣ୍ଟରଠାରେ ଦୈନିକ ୧,୦୦୦ ଡିଭାଇସ୍ ଉତ୍ପାଦିତ ହେଉଛି। ସେଣ୍ଟରର ପରିଚାଳନା ନିର୍ଦ୍ଦେଶକ ଆଣ୍ଡି କୋଓ୍ବେଲ ଏହି ସୂଚନା ଦେଇଛନ୍ତି। ଡିଭାଇସ୍ ଉତ୍ପାଦନ ପାଇଁ ଫର୍ମୁଲାଓ୍ବାନ ପିଷ୍ଟନ ଏବଂ ଟର୍ବୋଚାର୍ଜ ତିଆରି ଲାଗି ବ୍ୟବହାର କରାଯାଉଥିବା ୪୦ଟି ମେଶିନ୍କୁ ବିକଶିତ କରାଯାଇଛି। ୟୁନିଭର୍ସିଟି କଲେଜ ଲଣ୍ଡନ ସହିତ ଏକ ପାର୍ଟନରଶିପ୍ ଜରିଆରେ ମର୍ସିଡିଜ୍ର ଇଞ୍ଜିନିୟରମାନେ ଏହା କରିଛନ୍ତି।
