ବିଜେପୁର, ୨୩।୩(ଡି.ଏନ୍.ଏ.): କରୋନା ସଂକ୍ରମଣ ଦେଶରେ କାୟା ବିସ୍ତାର କରିବାରେ ଲାଗିଛି। ବର୍ତ୍ତମାନ ସୁଦ୍ଧା ଏହାର ଔଷଧ ବାହାରି ନାହିଁ। ତେଣୁ ସତର୍କତା ହିଁ ଏକମାତ୍ର ବିକଳ୍ପ। ଫଳରେ ସରକାରଙ୍କ ପକ୍ଷରୁ ବ୍ୟାପକ ସଚେତନତାମୂଳକ ପଦକ୍ଷେପ ନିଆଯାଉଛି। ଏହି କ୍ରମରେ ବରଗଡ଼ ଜିଲା ବିଜେପୁର ଏନ୍ଏସି ପକ୍ଷରୁ ସ୍ଥାନୀୟ ଡେଲି ମାର୍କେଟକୁ ସୋମବାର ହାଇସ୍କୁଲ ପଡ଼ିଆକୁ ସ୍ଥାନାନ୍ତର କରାଯାଇଛି। ସରକାରଙ୍କ ନିର୍ଦ୍ଦେଶ କ୍ରମେ ଡେଲି ମାର୍କେଟ ଉକ୍ତ ପଡ଼ିଆକୁ ସ୍ଥାନନ୍ତର ହେବ ବୋଲି ଏନ୍ଏସି ପକ୍ଷରୁ ସୂଚନା ଦିଆଯାଇଥିଲା। ହେଲେ ସହର ମଧ୍ୟରୁ ଉକ୍ତ ପଡ଼ିଆର ଦୂରତା ପ୍ରାୟ ଏକ କିମି ହେବ। ତେଣୁ ବେପାରୀମାନେ ନିର୍ଦ୍ଦେଶକୁ ବେଖାତିର କରି ପୂର୍ବରୁ ବସୁଥିବା ଜଗନ୍ନାଥ ମନ୍ଦିର ପ୍ରାଙ୍ଗଣରେ ସୋମବାର ସକାଳୁ ପନିପରିବା ଧରି ବସିଥିଲେ। ଖବର ପାଇ ମାଜିଷ୍ଟ୍ରେଟ ଦାୟିତ୍ୱରେଥିବା ତହସିଲଦାର କୁଳମଣି ରଣବିଡ଼ା, ଏନ୍ଏସି କାର୍ଯ୍ୟନିର୍ବାହୀ ଅଧିକାରୀ ରୁକ୍ମଣ ମେହେର ପ୍ରମୁଖ ପହଞ୍ଚି ବ୍ୟବସାୟୀଙ୍କୁ ବୁଝାଇବାପରେ ଡେଲି ମାର୍କେଟ ହାଇସ୍କୁଲ ପଡ଼ିଆକୁ ସ୍ଥାନାନ୍ତର ହୋଇଛି। ସେହିପରି ଏନ୍ଏସି କାର୍ଯ୍ୟନିର୍ବାହୀ ଅଧିକାରୀ ରୁକ୍ମଣ ମେହେରଙ୍କ ତତ୍ତ୍ବାବଧାନରେ କର୍ମଚାରୀଗଣ ପିକେଟିଂକରି ନିତ୍ୟ ଆବଶ୍ୟକ ଦୋକାନ ବ୍ୟତୀତ ଅନ୍ୟ ସମସ୍ତ ଦୋକାନକୁ ବନ୍ଦ କରିବାକୁ ନର୍ଦ୍ଦେଶ ଦେଇଛନ୍ତି।
