ମୁମ୍ବାଇ,୨୯।୧୧(ପି.ଟି.):ଶିବସେନା ଅଧ୍ୟକ୍ଷ ଉଦ୍ଧବ ଠାକ୍ରେ ମହାରାଷ୍ଟ୍ରର ମୁଖ୍ୟମନ୍ତ୍ରୀ ଭାବେ ଗୁରୁବାର ଶପଥ ନେଇଛନ୍ତି। ଜଣେ ପେସାଦାର ଫଟୋଗ୍ରାଫରରୁ ଉଦ୍ଧବ ସବୁଠୁ ଧନୀ ରାଜ୍ୟର ମୁଖ୍ୟମନ୍ତ୍ରୀ ହୋଇପାରିଛନ୍ତି। ଜଣେ ମେଳାପୀ, ଭଦ୍ର ରାଜନେତା ଭାବେ ପରିଚିତ ୫୯ ବର୍ଷୀୟ ଉଦ୍ଧବ ମୁଖ୍ୟମନ୍ତ୍ରୀ ପଦକୁ ନେଇ ପୂର୍ବ ମେଣ୍ଟ ସହଯୋଗୀ ଭାଜପା ସହ ଲଢ଼ୁଆ ଆଭିମୁଖ୍ୟ ପ୍ରଦର୍ଶନ କରିଥିଲେ। ଫଳରେ ତିନି ଦଶନ୍ଧିର ଗୈରିକ ମେଣ୍ଟ ଭୁଶୁଡ଼ି ପଡ଼ିଥିଲା। ଭାଜପାଠାରୁ ଦୂରେଇ ଯିବା ପରେ ଉଦ୍ଧବ ଭିନ୍ନ ନୀତି ଆଦର୍ଶର ଦଳ ଏନ୍ସିପି ଓ କଂଗ୍ରେସ ସହ ମିଶି ମହା ବିକାଶ ଅଘାଡି (ଏମ୍ଭିଏ) ଗଠନ କରିଛନ୍ତି। ଦୀର୍ଘଦିନ ଧରି ରାଜନୀତି କରୁଥିଲେ ହେଁ ଉଦ୍ଧବ କେବେ ନିର୍ବାଚନ ଲଢ଼ି ନ ଥିଲେ କିମ୍ବା ସରକାରୀ ପଦ ପଦବୀରେ ନ ଥିଲେ। ତେଣୁ ସେ କିପରି ଶାସନ କଳକୁ ପରିଚାଳନା କରିବେ ଏବଂ ଭିନ୍ନ ମତାବଲମ୍ବୀ ଦଳର ନେତାଙ୍କୁ ସାଙ୍ଗରେ ନେଇ ଚାଲିବେ ତାହା ଉପରେ ସମସ୍ତଙ୍କର ନଜର ରହିଛି। କାରଣ ହିନ୍ଦୁତ୍ୱ ରାଜନୀତି ଏବଂ କଂଗ୍ରେସ ବିରୋଧୀ ଆଭିମୁଖ୍ୟ ଶିବସେନାର ପରିଚୟ ହୋଇ ରହିଆସିଥିଲା। ଏବେ ପରିବର୍ତ୍ତିତ ରାଜନୈତିକ ଦୃଶ୍ୟପଟରେ ଶିବସେନାକୁ ନିଜ ନୀତିରେ ପରିବର୍ତ୍ତନ କରିବାକୁ ପଡିବ।
୧୯୬୦ ଜୁଲାଇ ୨୭ରେ ମୁମ୍ବାଇରେ ଜନ୍ମିତ ଉଦ୍ଧବ ଜେଜେ ସ୍କୁଲ୍ ଅଫ୍ ଆଟର୍ସରୁ ସ୍ନାତକ ଡିଗ୍ରୀ ହାସଲ କରିଥିଲେ, ଯେଉଁଠି ତାଙ୍କର ମୁଖ୍ୟ ବିଷୟ ଥିଲା ଫଟୋଗ୍ରାଫୀ। ଫଟୋଗ୍ରାଫର ଭାବେ ତାଙ୍କର ଅନେକ ଫଟୋ ବିଭିନ୍ନ ପତ୍ରିକାରେ ପ୍ରକାଶ ପାଇବା ସହ ଏକାଧିକ ପ୍ରଦର୍ଶନୀରେ ସ୍ଥାନ ପାଇଥିଲା। ତାଙ୍କର ଦୁଇଟି ଫଟୋ ପୁସ୍ତକ ମହାରାଷ୍ଟ୍ର ଦେଶ୍ (୨୦୧୦) ଓ ପହାବ ବିଠଲ (୨୦୧୧) ପ୍ରକାଶିତ ହୋଇଛି। ୨୦୦୩ ଜାନୁୟାରୀରେ ଉଦ୍ଧବ ଶିବସେନାର କାର୍ଯ୍ୟକାରୀ ଅଧ୍ୟକ୍ଷ ନିଯୁକ୍ତ ହୋଇଥିଲେ। ପିତା ତଥା ଦଳର ପ୍ରତିଷ୍ଠାତା ବାଲ୍ ଠାକ୍ରେଙ୍କ ପରଲୋକ ପରେ ୨୦୧୨ରେ ଉଦ୍ଧବ ଆନୁଷ୍ଠାନିକ ଭାବେ ଦଳ ମୁଖ୍ୟ ଭାବେ ଦାୟିତ୍ୱ ନେଇଥିଲେ। କିଛି ବର୍ଷ ପୂର୍ବେ ସେ କରିଥିବା ଫଟୋ ପ୍ରଦର୍ଶନୀରୁ ସଂଗୃହୀତ ୧୦ ଲକ୍ଷ ଟଙ୍କା କୃଷକମାନଙ୍କ କଲ୍ୟାଣ ପାଇଁ ଦାନ କରିଥିଲେ। କୃଷକ ସମସ୍ୟା ଓ ଚାଷୀ ଆତ୍ମହତ୍ୟା ପ୍ରସଙ୍ଗକୁ ନେଇ ଉଠାଇବା ପାଇଁ ସେ ତାଙ୍କ କର୍ମୀମାନଙ୍କୁ ଉତ୍ସାହିତ କରୁଥିଲେ। ବାନ୍ଦ୍ରାସ୍ଥିତ ଠାକ୍ରେ ବାସଭବନ ‘ମାତୋଶ୍ରୀ’ରୁ ଉଦ୍ଧବ ଏବେ ଦକ୍ଷିଣ ମୁମ୍ବାଇରେ ଥିବା ମୁଖ୍ୟମନ୍ତ୍ରୀଙ୍କ ବାସଭବନ ‘ବର୍ଷା’ରେ ପାଦ ଥାପିଛନ୍ତି। ଏବେ ତାଙ୍କୁ ନୀତି ଆଦର୍ଶରେ ଅନେକ ପରିବର୍ତ୍ତନ ଆଣିବାକୁ ପଡିବ। ନୂଆ ମେଣ୍ଟ ପରିଚାଳନା ଓ ସରକାର ୫ ବର୍ଷ ତିଷ୍ଠିବାକୁ ହେଲେ ତାଙ୍କୁ ନମନୀୟତା ଏବଂ ବିଚକ୍ଷଣତା ଦେଖାଇବାକୁ ପଡିବ ବୋଲି ରାଜନୀତି ବିଶେଷଜ୍ଞମାନେ ମତ ଦେଇଛନ୍ତି।
