ପଟ୍ଟାଙ୍ଗି , ୧୧।୪(ଶରତ କୁମାର ଧଳ): କୋରାପୁଟ ଜିଲା ପଟ୍ଟାଙ୍ଗି ବ୍ଲକ ଅନ୍ତର୍ଗତ ସୁଙ୍କି ଘାଟିରେ OSRTC ବସ୍ ଦୁର୍ଘଟଣାଗ୍ରସ୍ତ ହୋଇଛି । ଫଳରେ ଯାତ୍ରୀ ଆହତ ହୋଇଥିବା ବେଳେ ସ୍ବାସ୍ଥ୍ୟ କେନ୍ଦ୍ରରେ ଚିକିତ୍ସାଧୀନ ସମୟରେ ଜଣଙ୍କର ମୃତ୍ୟୁ ହୋଇଥିବା ଜଣାପଡିଛି । ସୂଚନା ଅନୁଯାୟୀ, ଭବାନୀପାଟଣାରୁ ପଡୋଶୀ ଆନ୍ଧ୍ର ରାଜ୍ୟ ବିଶାଖାପାଟଣାକୁ OSRTC ବିଭାଗର ଭୋଲଭ ବସ୍ (OD 02 DE 5446) ଅଭିମୁଖେ ଯାଉଥିଲା । ସୁଙ୍କି ଥାନାଠାରୁ ପ୍ରାୟ ୩ କିଲୋମିଟର ଦୂରତା ପଣସମାନଗୁଡି ଗ୍ରାମ ନିକଟସ୍ଥ ଘାଟିରେ ବିଳମ୍ବିତ ରାତି ପ୍ରାୟ ୨ଟା ସମୟରେ ଘଟିଥିଲା। ଏକ ବୁଲାଣିଆ ରାସ୍ତା ଯଥା ଜାତୀୟ ରାଜପଥରୁ ୪୦ ଫୁଟ୍ ତଳକୁ ବସ୍ଟି ଖସି ଓଲଟି ପଡିବା ଫଳରେ ବସ୍ରେ ରହିଥିବା ସମସ୍ତ ଯାତ୍ରୀ ବସ୍ ଭିତରେ ଖେଳି ଯିବା ସହ ଜଣେ ଯାତ୍ରୀ ବସ୍ ତଳେ ଚାପି ହୋଇ ଯାଇଥିଲେ । ଯିଏ କି କଳାହାଣ୍ଡି ଜିଲାର କଲମପୁର୍ ବ୍ଲକ ଅଧିନସ୍ଥ ବଲାଗାଁ ଗ୍ରାମର ଜାମ୍ବବ ବିହାରୀ। ତାଙ୍କୁ ଗୁରୁତର ଅବସ୍ଥାରେ ପଟ୍ଟାଙ୍ଗି ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ଭର୍ତ୍ତି କରାଯାଇଥିଲା। ସେଠାରେ ଚିକିତ୍ସାଧୀନ ଅବସ୍ଥାରେ ମୃତ ଘୋଷଣା କରାଯାଇଛି। ସେପଟେ ୪ଜଣ ଗୁରୁତରଙ୍କୁ ପ୍ରାଥମିକ ଚିକିତ୍ସା ପରେ କୋରାପୁଟ ମେଡ଼ିକାଲ କଲେଜକୁ ସ୍ଥାନାନ୍ତରିତ କରାଯାଇଛି। ଅନ୍ୟ ଦୁଇଜଣ ନିଜସ୍ବ ବ୍ୟବସ୍ଥାରୁ ବିଶାଖାପାଟଣା ସ୍ଥାନାନ୍ତରିତ ହୋଇଛନ୍ତି। ସେପଟେ ବସ୍ର ସମ୍ମୁଖ ଭାଗ ୧ ନଂ ସିଟ ରେ ବସିଥିବା ଯାତ୍ରୀ ଭାଗିରଥି ବାଗଙ୍କ କହିବା ଅନୁସାରେ କୌଣସି ଟ୍ରକ ବସ୍କୁ ଧକ୍କା ଦେଇନାହିଁ । ଡ୍ରାଇଭରଙ୍କ ଆଖି ଲାଗି ଯାଇଥିବାରୁ ଏହିପରି ଦୁର୍ଘଟଣା ଘଟିଛି ବୋଲି ସେ ପ୍ରକାଶ କରିଛନ୍ତି । ଅନ୍ୟପକ୍ଷରେ ସୁଙ୍କି ଥାନା ଅଧିକାରୀ ଚତୁର୍ଭୁଜ ନାୟକ ବିଳମ୍ବିତ ରାତିରେ ଦୁର୍ଘଟଣାସ୍ଥଳେ ପହଞ୍ଚି ବ୍ଲକ ସଦର ମହକୁମାରୁ ଅଗ୍ନିଶମ ବିଭାଗ କର୍ମଚାରୀଙ୍କୁ ଡକାଇ ବସ୍ ଭିତରୁ ସମସ୍ତ ଯାତ୍ରୀଙ୍କୁ ଉଦ୍ଧାର କରି ସ୍ବାସ୍ଥ୍ୟ କେନ୍ଦ୍ରକୁ ସ୍ଥାନାନ୍ତରିତ କରି ଘଟଣା ସମ୍ପର୍କରେ ତଦନ୍ତ ଜାରି ରଖିଛନ୍ତି ।
