ବ୍ରହ୍ମପୁର ଅଫିସ,୭ା୧୧: ବ୍ରହ୍ମପୁର ଜିଲା କୋର୍ଟରେ ସ୍ବତନ୍ତ୍ର ଭାବେ ଓପିଆଇଡି କୋର୍ଟ ରହିଛି। ଦକ୍ଷିଣ ଓଡ଼ିଶାର ୧୦ ଜିଲା ପାଇଁ ଏହି କୋର୍ଟ ରହିଥିବା ବେଳେ ଏଠାରେ ଏବେ ବିଚାରପତି ପଦବୀ ଖାଲି ରହିଛି। ଫଳରେ ବହୁ ଗୁରୁତ୍ୱପୂର୍ଣ୍ଣ ମାମଲାଗୁଡିକର ବିଚାରରେ ବିଳମ୍ବ ଘଟୁଛି। କ୍ଷତିଗ୍ରସ୍ତ ଜମାକାରୀ ସେମାନଙ୍କ ଟଙ୍କା ଫେରି ପାଇବା ଆଶା ମଉଳି ଯାଇଛି। ରାଜ୍ୟ ସରକାର ଅନ୍ୟାନ୍ୟ କୋର୍ଟ ପାଇଁ ବିଚାରପତି ନିଯୁକ୍ତି କରୁଥିବା ବେଳେ ବ୍ରହ୍ମପୁରରେ ଥିବା ଓପିଆଇଡି କୋର୍ଟ ପ୍ରତି ଅଣଦେଖା କରୁଥିବା ନେଇ ବିଭିନ୍ନ ମହଲରେ ଅଭିଯୋଗ ହୋଇଛି। ତେଣୁ ଏ ଦିଗରେ ଦୃଷ୍ଟି ଦେଇ ତୁରନ୍ତ ବିଚାରପତି ପଦବୀ ପୂରଣ କରିବାକୁ ଓକିଲ ସଂଘ ସଭାପତି ରବି ପାଣିଗ୍ରାହୀ, ପୂର୍ବତନ ଯୁଗ୍ମ ସମ୍ପାଦକ କରୁଣାକର ପାଣିଗ୍ରାହୀ ଓ ଆଇନଜୀବୀ ରଘୁନାଥ ପ୍ରସଦ ପାଣିଗ୍ରାହୀ ପ୍ରମୁଖ ଦାବି କରିଛନ୍ତି। ବ୍ରହ୍ମପୁରରେ ଖୋଲାଯାଇଥିବା ସ୍ବତନ୍ତ୍ର ଓପିଆଇଡି କୋର୍ଟରେ ୧୦୧ ମାମଲା ବିଚାରାଧୀନ ରହିଛି। ଜମାକାରୀଙ୍କ କୋଟି କୋଟି ଟଙ୍କା ଠକେଇ କରିଥିବା ଚିଟଫଣ୍ଡ ମାଲିକମାନେ ବର୍ତ୍ତମାନ ମଣ୍ଡଳ କାରାଗାରରେ ରହିଛନ୍ତି। ଦୀର୍ଘଦିନ ଧରି ଚିଟଫଣ୍ଡ କୋର୍ଟରେ ଜଜ୍ ନ ଥିବାରୁ ମାମଲାଗୁଡିକର ବିଚାର ହୋଇ ନ ପାରି କେବଳ ତାରିଖ ପରେ ତାରିଖ ଧାର୍ଯ୍ୟ ହେଉଛି।
ସୂଚନାଯୋଗ୍ୟ, ଜୁଲାଇରୁ ଚିଟଫଣ୍ଡ ବିଚାରପତି ପଦବୀ ଖାଲିପଡିଛି। ନିକଟରେ ହାଇକୋର୍ଟ ବିଭିନ୍ନ କୋର୍ଟରେ ନୂତନ ଜଜ ନିଯୁକ୍ତି କରିଛନ୍ତି। କିନ୍ତୁ ବ୍ରହ୍ମପୁରରେ ଥିବା ଚିଟଫଣ୍ଡ କୋର୍ଟ ପାଇଁ କୌଣସି ଜଜ ନିଯୁକ୍ତି କରାଯାଇନାହିଁ। ଏ ଦିଗରେ ଦୃଷ୍ଟି ଦେଇ ଜଜ ନିଯୁକ୍ତି କରିବା ପାଇଁ ଜମାକାରୀ ଏବଂ ଓକିଲଙ୍କ ପକ୍ଷରୁ ଦାବି ହେଉଛି।
