(ଦିନେଶ ଦେହୁରୀ) ବନ୍ତଳା, ୭ା୫ – ବାହାର ରାଜ୍ୟ ଫେରନ୍ତାଙ୍କ ମଧ୍ୟରୁ ଅନେକେ କ୍ୱାରାଣ୍ଟାଇନ୍ ସେଣ୍ଟରରେ ବିଶୃଙ୍ଖଳା ସୃଷ୍ଟି କରୁଛନ୍ତି। ଏପରି କି କେତେଜଣ ଲୁଚି ପଳାଇ ଯାଇ ନିଜ ସହ ପରିବାର, ସମ୍ପର୍କୀୟଙ୍କ ପାଇଁ ବିପଦ ସାଜିବାର ସମ୍ଭାବନା ସୃଷ୍ଟି କରୁଛନ୍ତି। ସରକାରଙ୍କ ସଙ୍ଗରୋଧ ବ୍ୟବସ୍ଥା ଯେ ଜୀବନର ସୁରକ୍ଷା ସହ ସମ୍ମାନ ଦେଉଛି ଏହା ହୁଏତ ସେମାନେ ଜାଣିପାରୁ ନାହାନ୍ତି। କିନ୍ତୁ ଏପରି ବିଶୃଙ୍ଖଳାକାରୀ ବହିରାଗତଙ୍କ ପାଇଁ ଉଦାହରଣ ସୃଷ୍ଟି କରିଛନ୍ତି ଅନୁଗୋଳ ଜିଲା ବନ୍ତଳା ଥାନା ପୋକତୁଙ୍ଗା ଗ୍ରାମର ଜୟନ୍ତ ବେହେରା(୪୦)। ଆନ୍ଧ୍ରପ୍ରଦେଶରୁ ଅନୁଗୋଳ ୮୫୦ କିମି ଦୂର ଚାଲି ଚାଲି ଘରକୁ ଆସିବା ସହ ସରକାରୀ ଭାବେ ନାମ ପଞ୍ଜୀକରଣ କରିବା ଓ ୧୪ ଦିନ ସଙ୍ଗରୋଧରେ ରହି ସେ ବୁଧବାର ଖୁସିର ସହ ଘରକୁ ଫେରିଛନ୍ତି। ଅଧିକ ୧୦ ଦିନ ନିଜକୁ ପରିବାରଠାରୁ ଅଲଗା ରଖିବାର ନିର୍ଦ୍ଦେଶ ମଧ୍ୟ ପାଳନ କରିବେ ବୋଲି ଜୟନ୍ତ ପ୍ରକାଶ କରିଛନ୍ତି।
ଜୟନ୍ତଙ୍କ କହିବା ମୁତାବକ, ସେ ଆନ୍ଧ୍ରପ୍ରଦେଶର ଏକ ଢାବାରେ କାମ କରୁଥିଲେ। ଲକ୍ଡାଉନ୍ ପରେ ଘରକୁ ଆସିବାକୁ ଗାଡ଼ିମୋଟର ସୁବିଧା ନ ପାଇବାରୁ ସେ ଏପ୍ରିଲ ୧୦ରେ ପୋକତୁଙ୍ଗା, ନାକଚି, ଠାକୁରଗଡ଼, ନରସିଂହପୁର ଅଞ୍ଚଳର ୧୦ ଜଣଙ୍କ ସହ ଚାଲି ଚାଲି ଆସିଥିଲେ। ଏଥିପାଇଁ ତାଙ୍କୁ ୧୩ ଦିନ ଲାଗିଥିଲା। ଶାରୀରିକ ପୀଡ଼ା ହେଉଥିଲେ ହେଁ ସେ ଘରକୁ ନ ଯାଇ ସ୍ଥାନୀୟ ସରପଞ୍ଚଙ୍କୁ ଯୋଗାଯୋଗ କରି ପୋକତୁଙ୍ଗା ହାଇସ୍କୁଲ ସଙ୍ଗରୋଧ କେନ୍ଦ୍ରରେ ରହିଥିଲେ। ତାଙ୍କ ଯୋଗୁ ପରିବାର କିମ୍ବା ଗ୍ରାମବାସୀ ଅସୁବିଧାରେ ନ ପଡନ୍ତୁ ତାହା ସେ ଚାହଁିଥିଲେ। ୧୪ ଦିନ ସେଠାରେ ରହିବା ପରେ ତାଙ୍କୁ ଘରକୁ ପଠାଇ ଦିଆଯାଇଛି। ସଙ୍ଗରୋଧ କେନ୍ଦ୍ରରୁ ସେ ସୁସ୍ଥ ଓ ସମ୍ମାନର ସହ ଫେରିଥିବା ଯୋଗୁ ବେଶ୍ ଖୁସି ଅନୁଭବ କରୁଥିବା ଜୟନ୍ତ କହିଛନ୍ତି। ଏ ବିଷୟରେ ପୋକତୁଙ୍ଗା ସରପଞ୍ଚ ରିନାରାଣୀ ପ୍ରଧାନ ଓ ଗ୍ରାମ ସମ୍ପାଦକ ପ୍ରଶାନ୍ତ ପ୍ରଧାନ କହିଛନ୍ତି, ଦୀର୍ଘ ରାସ୍ତା ପାଦରେ ଚାଲି ଆସିବା ପରେ ଜୟନ୍ତ ଫୋନ କରି କ୍ୱାରାଣ୍ଟାଇନରେ ରହିବାକୁ କହିଥିଲେ। ଘରକୁ ଫେରୁଥିବା ସମସ୍ତ ପ୍ରବାସୀ ଶ୍ରମିକ ତାଙ୍କ ଭଳି ସଚେତନ ନାଗରିକର କର୍ତ୍ତବ୍ୟ କରିବା ଉଚିତ ବୋଲି ସେମାନେ ପ୍ରକାଶ କରିଛନ୍ତି।
