ବଇଣ୍ଡା,୩୦।୩(ଡି.ଏନ.ଏ.) – କିଶୋରନଗର ବ୍ଲକ ବଇଣ୍ଡା ଛକଠାରେ ଥିବା କିଶୋରଗଞ୍ଜ ପ୍ରାଥମିକ ବିଦ୍ୟାଳୟ ସ୍ଥାନାନ୍ତରକୁ ନୁନୁକାପଶି ପଞ୍ଚାୟତ ଲୋକପ୍ରତିନିଧି, ଅଭିଭାବକ ଓ ଗ୍ରାମବାସୀଙ୍କ ପକ୍ଷରୁ ବିରୋଧ କରାଯାଇଛି। ଏ ନେଇ ମଙ୍ଗଳବାର ବିଦ୍ୟାଳୟ ପରିସରରେ ବୈଠକ ଅନୁଷ୍ଠିତ ହୋଇଥିଲା। ସରପଞ୍ଚ ଦୀପ୍ତିମୟୀ ସାହୁଙ୍କ ସଭାପତିତ୍ୱରେ ଅନୁଷ୍ଠିତ ବୈଠକରେ ମୋ ସ୍କୁଲ କମିଟି ସଭାପତି ଭଗବାନ ଘିୱାଲା, ୱାର୍ଡ ମେମ୍ବର ଲିଲି ପ୍ରଧାନ, ହେମନ୍ତ ବେହେରା, ଜ୍ୟୋତ୍ସ୍ନାମୟୀ ମହାଳିକ, ସୁମନ୍ତ ବେହେରା, ରମାକାନ୍ତ ବେହେରା, ଜିତେନ୍ଦ୍ର ବେହେରା, ପରିକ୍ଷିତ ସାହୁ, ଦିଲୀପ କୁମାର ବେହେରା, ରମେଶ କୁମାର ବେହେରା, ଦେବଦତ୍ତ ବେହେରା, ସୁରେଶ ଚନ୍ଦ୍ର ସାହୁ, ବୁଧେଇ ମହାପାତ୍ର, ଅଞ୍ଜଳି ଶଙ୍ଖାରୀ ଓ ଗ୍ରାମବାସୀ ଯୋଗଦେଇଥିଲେ। ଅଞ୍ଚଳବାସୀ କହିଥିଲେ, କିଶୋରଗଞ୍ଜ ପ୍ରାଥମିକ ବିଦ୍ୟାଳୟକୁ ୫୫ ନମ୍ବର ଜାତୀୟ ରାଜପଥ ପାର ହୋଇ ୫୦୦ ମିଟର ଦୂରରେ ଥିବା ହାଇସ୍କୁଲକୁ ସ୍ଥାନାନ୍ତର କରିବା ପାଇଁ ପ୍ରଶାସନ ଓ କେତେଜଣ କୁଜି ନେତା ଯୋଜନା କରୁଛନ୍ତି। ଏ ନେଇ ଅଭିଭାବକ ଓ ବଇଣ୍ଡା ଗ୍ରାମବାସୀ ବାରମ୍ବାର ଅଭିଯୋଗ କରିଥିଲେ ମଧ୍ୟ ପ୍ରଶାସନ ଶୁଣୁନାହିଁ। କେତେଜଣ ନେତା ବ୍ୟକ୍ତିଗତ ସ୍ବାର୍ଥ ପାଇଁ ରାସ୍ତା କାର୍ଯ୍ୟ ନେଇଥିବା ଠିକା ସଂସ୍ଥା ସହ ସଲାସୁତରା ହୋଇ ବିଦ୍ୟାଳୟ ସ୍ଥାନାନ୍ତର କରିବାରେ ସହଯୋଗ କରୁଥିବା ବଇଣ୍ଡା ଗ୍ରାମବାସୀ ଅଭିଯୋଗ କରିଛନ୍ତି। ତୁରନ୍ତ ପ୍ରାଥମିକ ବିଦ୍ୟାଳୟକୁ ପଛ ପଟେ ଥିବା ୩୯ ଡିସିମିଲ ଜମିରେ ନିର୍ମାଣ କରିବା ପାଇଁ ସରପଞ୍ଚଙ୍କୁ ଦାବିପତ୍ର ପ୍ରଦାନ କରିଥିଲେ। ଏଥିସହ ଶ୍ରେଣୀଗୃହ ନିର୍ମାଣ କରା ନ ଗଲେ ଆନ୍ଦୋଳନ କରାଯିବ ବୋଲି ଚେତାବନୀ ଦେଇଥିଲେ। ଏନେଇ ପଞ୍ଚାୟତ ପକ୍ଷରୁ ଜିଲା ପ୍ରଶାସନକୁ ଅବଗତ କରାଯିବ ବୋଲି ସରପଞ୍ଚ ପ୍ରତିଶ୍ରୁତି ଦେଇଥିବା ସୂଚନା ମିଳିଛି।
