ମାଧପୁର, ୨୩ା୮: ଅନୁଗୋଳ ଜିଲା ଆଠମଲ୍ଲିକ ବ୍ଲକ ମାଧପୁର ବଜାରରେ ପରିତ୍ୟକ୍ତ ଅବସ୍ଥାରେ ଥିବା ଶୌଚାଳୟକୁ ନେଇ ବ୍ୟବସାୟୀଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି। ୪ବର୍ଷ ତଳେ ମାଧପୁର ପଞ୍ଚାୟତ ପ୍ରଶାସନ ପକ୍ଷରୁ ଏହି ଶୌଚାଳୟ ନିର୍ମାଣ କରାଯାଇଥିଲା। ରକ୍ଷଣାବେକ୍ଷଣ ଅଭାବରୁ ତାହା ବ୍ୟବହାରରେ ଆସୁନାହିଁ। ଫଳରେ ବଜାରକୁ ଆସୁଥିବା ଜନସାଧାରଣ, ଦୂରଦୂରାନ୍ତକୁ ଯିବାକୁ ବସ୍କୁ ଅପେକ୍ଷା କରୁଥିବା ଯାତ୍ରୀ ଏବଂ ବ୍ୟବସାୟୀମାନେ ଅସୁବିଧାର ସମ୍ମୁଖୀନ ହେଉଛନ୍ତି।
ମାଧପୁର ବଜାର ଉପରେ ଆଖପାଖ ୮ ପଞ୍ଚାୟତ ମାଧପୁର, ଲୁଣହାଣ୍ଡି, କମ୍ପଲା, କନ୍ଧପଡ଼ା, କୁଦଗଁା, ପୁରୁଣାମାଣତ୍ରୀ, କିଆକଟା ଓ ବାସୁଦେବପୁରର ଲୋକେ ନିର୍ଭର କରନ୍ତି। ଏଠାରେ ସ୍କୁଲ, କଲେଜଠାରୁ ଆରମ୍ଭ କରି ପ୍ରାଥମିକ ସ୍ବାସ୍ଥ୍ୟକେନ୍ଦ୍ର, ପ୍ରାଣୀ ଚିକିତ୍ସାଳୟ, ଆର୍ଆଇ କାର୍ଯ୍ୟାଳୟ, ସେବା ସମବାୟ ସମିତି, ପୋଷ୍ଟ ଅଫିସ, ରେଞ୍ଜ ଅଫିସ୍, ବ୍ୟାଙ୍କ ସହ ଅନ୍ୟ ସରକାରୀ ଓ ବେସରକାରୀ ଅଫିସ ରହିଛି। ଏହାଛଡ଼ା ଏଠାରୁ ପ୍ରତ୍ୟେକ ଦିନ ଆଠମଲ୍ଲିକ, ଅନୁଗୋଳ, କଟକ, ରେଢାଖୋଲ, ସମ୍ବଲପୁର, ବୌଦ୍ଧ, ଫୁଲବାଣୀକୁ ବହୁ ଯାନବାହନ ଯାତାୟାତ କରେ। କିନ୍ତୁ ଭଲ ଶୌଚାଳୟଟିଏ ନ ଥିବାରୁ ଗାଡ଼ିକୁ ଅପେକ୍ଷାରତ ଯାତ୍ରୀମାନେ ଅସୁବିଧାର ସମ୍ମୁଖୀନ ହେଉଛନ୍ତି। ଏହାକୁ ନେଇ ସ୍ଥାନୀୟ ଅଞ୍ଚଳବାସୀଙ୍କ ମଧ୍ୟରେ ଅସନ୍ତୋଷ ବଢ଼ିବାରେ ଲାଗିଛି।
ଦାବିପ୍ରତି କର୍ଣ୍ଣପାତ କରାଯାଉନାହିଁ
ମାଧପୁର ବଜାରରେ ଭଲ ଶୌଚାଳୟ ଆବଶ୍ୟକ ଅଛି। ଏ ନେଇ ସ୍ଥାନୀୟ ଲୋକପ୍ରତିନିଧିଙ୍କ ଦୃଷ୍ଟି ଆକର୍ଷଣ କରାଯାଇଆସୁଛି। କିନ୍ତୁ କିଛି ବି ପଦକ୍ଷେପ ନିଆଯାଉ ନାହିଁ। ଫଳରେ ଶହ ଶହ ଲୋକ ଦୈନିକ ଅସୁବିଧାର ସମ୍ମୁଖୀନ ହେଉଛନ୍ତି।
-ଋ଼ତୁକାନ୍ତ ସାହୁ, ଦୋକାନୀ
ମହିଳାମାନେ ଉପକୃତ ହେବେ
ପଞ୍ଚାୟତ ପ୍ରଶାସନ ବଜାରରେ ଶୌଚାଳୟଟିଏ ନିର୍ମାଣ କଲେ ବସ୍କୁ ଅପେକ୍ଷା କରୁଥିବା ମହିଳାମାନେ ଅଧିକ ଉପକୃତ ହେବେ। ଏତେବଡ଼ ବଜାରରେ ଶୌଚାଳୟଟିଏ ପ୍ରଶାସନ କରି ନ ପାରିବା ଦୁଃଖର ବିଷୟ।
-ଦୁଃଶାସନ ମେଣ୍ଡୁଲି, ସମ୍ପାଦକ, ଚୌରାଶୀ ମହାଲଷ୍ମୀ ପୂଜା କମିଟି
ସ୍ଥାନ ନିରୂପଣ ହୋଇପାରୁନି
ଏହି ସମସ୍ୟା ବିଷୟରେ ଅବଗତ ଅଛି। କିନ୍ତୁ ସ୍ଥାନ ନିରୂପଣ ହେଇପାରୁ ନ ଥିବାରୁ କିଛି କରାଯାଇପାରୁନାହିଁ। ପୁରୁଣା ଶୌଚାଳୟ ବିଷୟରେ ଅବଗତ ନାହିଁ। ଅନୁଧ୍ୟାନ କରାଯିବ।
-ଗଣେଶ୍ୱର ଜେନା, ସରପଞ୍ଚ, ମାଧପୁର
