ଆଠମଲ୍ଲିକ, ୨୩ା୨ (ଡି.ଏନ.ଏ.): ପୂର୍ବାପେକ୍ଷା ସୁବିଧାଜନକ ହେଲାଣି ଗମନାଗମନ। ବିଶେଷକରି ଆଠମଲ୍ଲିକ-ଧଳପୁର ସେତୁ ଲୋକାର୍ପଣ ପରେ ଅନୁଗୋଳ ଜିଲା ଆଠମଲ୍ଲିକ ଉପଖଣ୍ଡ ସ୍ବାସ୍ଥ୍ୟକେନ୍ଦ୍ର ଉପରେ ବଢ଼ିଛି ରୋଗୀଙ୍କ ନିର୍ଭରଶୀଳତା। ଫଳରେ ଦୈନିକ ରୋଗୀଙ୍କ ପଞ୍ଜୀକରଣ ସଂଖ୍ୟା ବହୁ ପରିମାଣରେ ବୃଦ୍ଧିପାଇଛି। କିନ୍ତୁ ମଞ୍ଜୁରୀପ୍ରାପ୍ତ ଡାକ୍ତର ପଦବୀ ସଂଖ୍ୟା ୧୯ରୁ ୩୪କୁ ବଢ଼ାଯିବା ବ୍ୟତୀତ ଉନ୍ନତ ସ୍ବାସ୍ଥ୍ୟସେବା ପ୍ରଦାନ ନିମନ୍ତେ ଆଉ କୌଣସି ପଦକ୍ଷେପ ନିଆଯାଇ ନାହିଁ। ଏପରି କି ଖାଲି ପଡ଼ିଥିବା ପଦବୀ ପୂରଣ କରିବା କିମ୍ବା ନୂଆ ନିଯୁକ୍ତି ଦିଆଯାଉ ନ ଥିବାରୁ ଏଠାରେ ସ୍ବାସ୍ଥ୍ୟସେବା ପାଇଁ ଆବଶ୍ୟକ ସମ୍ବଳ ନିଅଣ୍ଟ ପଡ଼ୁଛି। ଏବେ ମାତ୍ର ୬ ଜଣ ଡାକ୍ତର ଓ ୪ ଷ୍ଟାଫନର୍ସରେ ଉପଖଣ୍ଡ ଚିକିତ୍ସାଳୟ ଚାଲିଥିବାରୁ ରୋଗୀସେବା ବିପର୍ଯ୍ୟସ୍ତ ହୋଇପଡ଼ିଛି। ଏପରି କି ଦୀର୍ଘଦିନ ହେଲା ଚକ୍ଷୁ ବିଭାଗରେ ରୋଗୀ ଦେଖା ସମ୍ପୂର୍ଣ୍ଣ ବନ୍ଦ ହୋଇଯାଇଛି।
ଆଠମଲ୍ଲିକ ଉପଖଣ୍ଡ ଚିକିତ୍ସାଳୟ ଉପରେ ଆଠମଲ୍ଲିକ ଓ କିଶୋରନଗର ବ୍ଲକର ଲକ୍ଷାଧିକ ଲୋକ ନିର୍ଭରଶୀଳ। ଏଥିସହ ପଡ଼ୋଶୀ ବୌଦ୍ଧ ଜିଲାରୁ ମଧ୍ୟ ରୋଗୀ ଏହି ଡାକ୍ତରଖାନାକୁ ଆସନ୍ତି। ମହାନଦୀ ଉପରେ ଆଠମଲ୍ଲିକ-ଧଳପୁର ସେତୁ ନିର୍ମାଣ ପରଠାରୁ ବୌଦ୍ଧ ଜିଲାର ୮ରୁ ୧୦ ପଞ୍ଚାୟତର ରୋଗୀ ନିୟମିତ ଆଠମଲ୍ଲିକ ଉପଖଣ୍ଡ ଚିକିତ୍ସାଳୟକୁ ଆସୁଛନ୍ତି। କିନ୍ତୁ ରାଜ୍ୟ ସରକାର ଏହି ସ୍ବାସ୍ଥ୍ୟକେନ୍ଦ୍ର ପ୍ରତି ଅଧିକ ଦୃଷ୍ଟି ଦେବା ପରିବର୍ତ୍ତେ ଅବହେଳା କରିଚାଲିଛନ୍ତି। କାରଣ ଦୀର୍ଘଦିନ ହେଲା ଏହି ମେଡିକାଲରେ ବହୁ ଡାକ୍ତର, ନର୍ସ ଓ କର୍ମଚାରୀ ପଦବୀ ଖାଲି ପଡ଼ିଛି। ପୂର୍ବରୁ ୧୯ ଡାକ୍ତର ପଦବୀ ଥିବାବେଳେ ଗତ ୨ ମାସ ତଳେ ସରକାର ଏହାକୁ ୩୪କୁ ବଢ଼ାଇ ଦେଇଛନ୍ତି। ମାତ୍ର ଡାକ୍ତର ନିଯୁକ୍ତି କରୁ ନ ଥିବାରୁ ଜଣେ ଶିଶୁ ରୋଗ ବିଶେଷଜ୍ଞ, ଅସ୍ଥିଶଲ୍ୟ, ପ୍ରସୂତି, ଆନାସ୍ଥେସିଆ ବିଶେଷଜ୍ଞ ଓ ୨ ଜଣ ଏମ୍ବିବିଏସ୍ ଡାକ୍ତରଙ୍କୁ ନେଇ ସ୍ବାସ୍ଥ୍ୟକେନ୍ଦ୍ର ଚାଲିଛି। ସେହିପରି ୩୦ ନର୍ସଙ୍କ ସ୍ଥାନରେ ମାତ୍ର ୪ ଜଣ ଷ୍ଟାଫନର୍ସ ଥିବାରୁ ରୋଗୀସେବା ଗଭୀର ଭାବେ ପ୍ରଭାବିତ ହେଉଛି। ଏପରି କି ଅନେକ ସମୟରେ ଇଞ୍ଜେକ୍ସନ ନେବା ପାଇଁ ରୋଗୀମାନଙ୍କ ଲମ୍ବା ଲାଇନ ଲାଗୁଥିବା ଦେଖିବାକୁ ମିଳୁଛି। ଡାକ୍ତରଖାନାର ନୂଆ ୩ ମହଲା କୋଠା ଓ ଷ୍ଟାଫ କ୍ୱାର୍ଟର୍ସ ନିର୍ମାଣ କରି ରୂପରେଖ ବଦଳାଇବା ପାଇଁ ସରକାର ଉଦ୍ୟମ କରୁଥିବାବେଳେ ରୋଗୀ ସେବା ପ୍ରତି ଯେପରି ଆଖିବୁଜି ଦେଇଥିବା ସାଧାରଣରେ ଅଭିଯୋଗ ହେଉଛି। ଉପଖଣ୍ଡ ମୁଖ୍ୟ ଚିକିତ୍ସା ଅଧିକାରୀ ପଦବୀ ଦୀର୍ଘଦିନ ଧରି ଖାଲି ପଡ଼ିଥିବା ବେଳେ ଗୁରୁତ୍ୱପୂର୍ଣ୍ଣ ଚକ୍ଷୁ ବିଭାଗରେ ଆଦୌ ଡାକ୍ତର, ଟେକ୍ନିସିଆନ ନାହାନ୍ତି। ଫଳରେ ଏହି ବିଭାଗରେ ରୋଗୀ ସେବା ହୋଇପାରୁ ନାହିଁ। ବ୍ଲଡବ୍ୟାଙ୍କରେ ମଧ୍ୟ ସମାନ ଅବସ୍ଥା ସୃଷ୍ଟି ହୋଇଥିବାରୁ ଅନ୍ୟ ବିଭାଗରୁ ଡାକ୍ତର ଓ କର୍ମଚାରୀଙ୍କୁ ଅଣାଯାଇ ପରିଚାଳନା ସହିତ ରକ୍ତଦାନ ଶିବିରରେ ନିୟୋଜିତ କରାଯାଉଛି। ତେଣୁ ରାଜ୍ୟ ସରକାର ତୁରନ୍ତ ଏହି ଉପଖଣ୍ଡ ସ୍ବାସ୍ଥ୍ୟକେନ୍ଦ୍ରରେ ଖାଲି ପଡ଼ିଥିବା ଡାକ୍ତର, ନର୍ସ ଓ କର୍ମଚାରୀ ପଦବୀ ପୂରଣ କରିବାକୁ ଉପଖଣ୍ଡବାସୀ ଦାବି କରିଛନ୍ତି।
