ରାହାମା,୧୫ା୮(ଡି.ଏନ.ଏ.):କଟକ-ପାରାଦୀପ ରାସ୍ତାର ରାହାମାଠାରେ ସପ୍ତାହର ସୋମବାର ଓ ଶୁକ୍ରବାର ଦୁଇଦିନ ଧରି ସାପ୍ତାହିକ ହାଟ ବସୁଥିଲା। ତେବେ କରୋନା ସଂକ୍ରମଣ ଯୋଗୁ ଜିଲାପାଳଙ୍କ ନିର୍ଦ୍ଦେଶରେ ମାର୍ଚ୍ଚ ମାସରୁ ଏହାକୁ ବନ୍ଦ କରି ଦିଆଯାଇଥିଲା। ସ୍ଥାନୀୟ କୃଷିଜୀବୀ, ବ୍ୟବସାୟୀ, ରାହାମା ବଜାର କର୍ମୀ ଓ ରାହାମା ନିୟନ୍ତ୍ରିତ ବଜାର କମିଟି ଜିଲାପାଳଙ୍କ ନିକଟରେ ସାପ୍ତାହିକ ହାଟ ଖୋଲିବା ପାଇଁ ଅନୁରୋଧ କରିଥିଲେ। ଏହାକୁ ରକ୍ଷାକରି ଜିଲାପାଳ କୋଭିଡ-୧୯ ନିୟମ ମାନି ହାଟ ଖୋଲିବା ପାଇଁ ଅନୁମତି ପ୍ରଦାନ କରିଛନ୍ତି। ଏହିକ୍ରମରେ କୁଜଙ୍ଗ ତହସିଲଦାର ସ୍ମୃତିପ୍ରଜ୍ଞା ପ୍ରିୟଦର୍ଶିନୀ, ତିର୍ତ୍ତୋଲ ଥାନା ଅଧିକାରୀ, ରାହାମା ନିୟନ୍ତ୍ରିତ ବଜାର କମିଟିର ସୁରେନ୍ଦ୍ରନାଥ ସାହୁ, ରାହାମା ବଜାର କମିଟି ସଭାପତି ଜଟାଧାରି ଦାସ, ସାମାଜିକ କର୍ମୀ ସୁନାକର ବେହେରା, ତାଳପଡା ସରପଞ୍ଚ ମମତା ସାହୁ, ସାଇଲୋ ସରପଞ୍ଚ ରୋଜାଲିନ୍ ମହାପାତ୍ର, ମନୋଜ ସାହୁ, ବାବାଜୀ ସାହୁ ଓ ସ୍ଥାନୀୟ ବୁଦ୍ଧିଜିବୀ, ଗଣମାଧ୍ୟମ ପ୍ରତିନିଧି, ବ୍ୟବସାୟୀ, କୃଷିଜିବୀ ପ୍ରମୁଖଙ୍କ ଉପସ୍ଥିତିରେ ହାଟ ଚାଲୁ କରାଯାଇଥିଲା। ୨୧ ଜଣିଆ କମିଟି ଗଠନ କରାଯାଇ କୋଭିଡ-୧୯ ନିୟମ ଅନୁସାରେ ସାପ୍ତାହିକ ହାଟ ପରିଚାଳନା ପାଇଁ ନିଷ୍ପତ୍ତି ନିଆଯାଇଛି।
